Hello，大家好，我哋係由韓國人每日提供最新旅行資訊嘅Creatrip。
講到YG，大家第一時間都會諗到BIGBANG、WINNER、iKON、BLACKPINK、TREASURE等知名團體，今日小編想同大家介紹YG上星期先開幕嘅cafe「the sameE」，佢正正喺公司對面，而且唔少藝人都會去，之後想撞星，又可以多個地方去啦！
YG cafe 「ThesameE」介紹
營業時間：每日10:00 - 21:00
地址：서울시마포구희우정로 1길 6-3
小Tips：由合井站8號出口行大約10分鐘左右
係YG fans嘅一齊大叫聲先 等咗咁耐，YG終於喺公司對面開咗一間cafe，佢喺6月1號先開幕，小編當然都快啲去完之後即刻大家分享啦
cafe名叫theSameE，後面加咗E係因為希望fans都可以好似EGO咁，一樣團結
cafe總共分咗3層，一、二樓係cafe區，地下一樓係YG小店。一入到去只係睇裝修設計已經好有YG嘅感覺，唔知大家又feel唔feel到呢？
喺fans嘅大家，亦都可以買佢哋嘅杯帶返屋企。
呢度主打係冬甩，總共有5款口味，每一個睇落都好大，而且好吸引。
如果唔太鍾意食冬甩嘅朋友，呢度仲有麥片買。
呢度有好多飲品提供，但最主大係車厘子梳打同青提子梳打，而令小編最驚喜嘅係以為娛樂公司開嘅cafe，飲品或者甜品都應該好貴，但點知嚟到發現係比預期中平。
大家拎完餐，都可以再去一樓或二樓嘅自助吧度拎飲管同紙巾等。
喺等緊飲品期間大家可以先擺定靚位，或者可以好似小編咁出去門口同呢個打卡位影相，不過因為小編去個日都多人，唔少人都等影，不過唔緊要，小編下次會再去影
喺二樓大家仲可以同KRUNK熊一齊影相。
二樓呢度有個超大螢幕一直播住BIGBANG、BLACKPINK、iKON、WINNER、TREASURE等YG藝人嘅MV，全日喺度等都覺得好幸福
同時呢度仲有一個小露台，行到出去就可以望到YG公司，邊個藝人返工同放工都可以一眼睇得出
影到差唔多，係時間要同大家介紹呢度嘅飲品同甜品，小編最後叫咗佢哋招牌車厘子梳打同青提子梳打。甜品方面叫咗The SameE冬甩同埋Rasberry冬甩。
車厘子梳打 ￦5,000 won（約HKD35）
只係睇個色已經俾佢吸引，呢度嘅糖漿落得有啲太多，好香車厘子味，飲嘅時候唔會覺得太甜，幾好味。
青提子梳打 ￦6,500 won（約HKD45）
如果同車厘子梳打相比，小編會比較推薦呢款，飲嘅時候會覺得好清爽，而且仲有啲提子粒，好有咬口。
冬甩係唔係睇落好吸引呢？至於點解小編會叫呢兩個口味，因為原本The SameE冬甩上面會有Treasure嘅小牌，而Rasberry冬甩會有BLACKPINK，不過當日職員唔記得加...小編就冇影到
The SameE冬甩 ￦5,000 won（約HKD35）
呢個係Tiramisu口味，有淡淡咖啡香，裡面唔會有太多忌廉，甜道啱啱好。
Rasberry冬甩 ￦5,000 won（約HKD35）
真係好推薦呢個Rasberry冬甩！酸酸甜甜好開胃，令人忍唔住食完一啖又一啖！
食完之後梗係要行埋佢哋B1，睇吓有咩商品買啦
呢度有好多YG藝人嘅專輯，大家如果有興趣想買可以直接請職員幫大家拎。
如果大家仲未有應援棒都可以喺度買
如果係BLACKPINK fans見到呢一個區應該會忍唔住尖叫，真係令人好想曬返屋企....
呢度嘅商品真係應有盡有，平時出面難買到嘅呢度都有。
大家係唔係都開始擔心緊自己嘅銀包呢.....
呢度有冇TREASURE嘅fans呢？
佢哋每一個商品嘅配色都超靚，就連日常用品，口罩、牙刷等都可以買得到。
大家平時鍾意收集嘅小卡呢度都有！
之後就到BIGBANG嘅模型啦！每一個都做得超有風格，不過佢冇標價錢....唔使諗應該都係好貴..
呢度連GD創立嘅 PEACEMINUSONE都可以買得到！係GD嘅fans，之前買唔到，而家都可以喺度買啦！
小編當日去發覺暫時商品都係以BLACKPINK同TREASURE為主多，雖然其他藝人都有，不過相對可能就少咗啲 希望之後大家去都有更多藝人商品買啦！
職員有同小編講，希望大家嚟嘅fans都可以積極話俾佢知想要咩商品，之後佢會再同公司反映，大家記住要為自己爭取啊！話唔定下次再去就會買到想要嘅嘢
KPOP迷之後嚟韓國，又有多個地方可以去打卡啦！唔知大家又會最期待撞到邊個呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
