韓國網吧文化
高級裝備嘅電腦？仲有過百款美食？小編帶你體驗一吓韓國獨有嘅網吧文化！
Hello，大家好，我哋係由韓國人每日提供最新韓國旅行資訊嘅Creatrip。
韓國10~20歲嘅男仔，最常去嘅地方係邊度呢？就係網吧啦！相信有打開機嘅人都鍾意約埋一齊online打，韓國人都唔例外，仲特別鍾意去網吧，今日小編帶大家去睇吓韓國嘅網吧有咩特別啦！
韓國網吧文化介紹
網吧
網吧（韓文叫「PC방」，字面意思係PC房）係一個按時收費，可以用電腦嘅空間。 俾咗錢嘅客人可以利用網吧嘅電腦做自己想做嘅事情。 但事實上，超過95%去網吧嘅人都係為咗打機。
韓國最先有網吧呢個概念係由1994年開始，第一間網吧係喺首爾瑞草開嘅「BNC(BIT COMMUNICATION CAFE)」，聽講當時係叫「internet cafe」。
유튜브 KLAB
internet cafe 時期，唔係個個屋企都有電腦，所以好多人會去嗰度上網同對方交流，或者用電腦處理業務。
next daily
咁點解網吧會變成一個打機勝地呢？ 係因爲90年代尾開始，遊戲產業迅速發展。 美國遊戲公司「暴雪娛樂」（Blizzard Entertainment）發行嘅遊戲《星海爭霸》對韓國嘅online game產業產生咗好大嘅影響。 1998年開始，短短5年間，全國竟然開咗2萬間網吧，係咪好驚人呢？ 由嗰陣開始online game佔咗韓國玩樂文化之中一個好重要嘅位置。
연합뉴스
隨住online game急速增長嘅需求，網吧亦開始不斷升級。 為咗令打機時個game行得順啲，比單純處理業務嘅電腦需要更高級，更多功能嘅電腦。 所以網吧嘅老闆喺互聯網服務同電腦設備方面投入咗大量資金。
令人驚訝嘅係，呢個都係韓國擁有世界最快網絡功能嘅原因之一。 韓國嘅互聯網供應商透過網吧賺取巨大嘅收益，然後再投資，令到韓國嘅網絡市場變得非常大。
而家網吧已經成為咗韓國人生活中不可或缺嘅文化之一。 喺學生時代，放學之後同鍾意打機嘅朋友仔一齊去網吧係家常便飯嘅事！ 韓國好多職業電競選手都話，細細個就同朋友一齊係網吧打機，對自己有好大嘅影響。
咁點解韓國人比起自己一個喺屋企打機，更加鍾意去網吧呢？
去網吧嘅原因
1. 同輩文化嘅發展
同輩集體意識係韓國其中一個文化，特別係10多歲嘅時候，比起自己一個人，覺得同年紀嘅人一齊更重要。 根據韓國文化產業振興院（한국콘텐츠진흥원）發佈嘅《2020遊戲用戶實態報告書》顯示，喺網吧打機嘅原因，排名第一係「為咗同朋友相處」。
喺韓國網吧玩得最多嘅遊戲嘅係《絕地求生》（食雞）、《英雄聯盟》（LoL）、《鬥陣特攻》（overwatch）等競爭嘅遊戲。 同朋友一齊去網吧嘅時候，可以坐埋一齊，組隊打，或者同朋友對打。 小編身邊鍾意打機嘅朋友都會定期約住喺附近嘅朋友一齊去網吧打機。
2. 高級設備
之前都提到，韓國嘅網吧大多都有超好功能嘅電腦。 一般家庭好難買到可以玩高級遊戲嘅顯示卡或者ram。 為咗可以100%享受打機嘅快感，都會揀網吧嘅電腦，而唔係屋企嘅電腦！
gmanager
而且網吧嘅mon同keyboard都好啱打機用，好有feel！
3. 網吧優惠
網吧優惠係指遊戲公司會提供優惠俾喺網吧打機嘅人。 同喺屋企打機嘅唔同，喺網吧打嘅話，可以獲得更多嘅經驗值，或者免費用道具嘅優惠！ 透過呢啲優惠政策，如果玩game嘅人去多咗網吧，遊戲公司最終都會獲得更多嘅利益，雙方可以獨得雙贏嘅效果！
4. 飲食
近嚟嘅網吧已經唔係單純打機地方！喺韓國網吧可以食到各種各樣嘅嘢食。 幾年前嘅網吧淨係有杯麵同零食，但而家幾乎同餐廳冇咩分別。 韓國大部分網吧都另外有經營餐廳嘅牌照，同時提供網吧、餐飲服務。
有蓋飯、熱狗、漢堡包、炸雞、咖喱⋯⋯款式分分鐘仲多過普通嘅小食店啊！ 所以有人話喺網吧打工好唔簡單😅 又要管理網吧，仲要識得煮返幾味！ 小編有朋友喺網吧打過工，話比起管理網吧，煮嘢食花嘅時間更多！
網吧體驗記
為咗俾大家呈現更真實嘅體驗，小編親自去網吧玩啦！ 因為平時唔多打機，所以網吧對小編嚟講唔係好熟悉🙄只係喺需要快速上網嘅時候先會去網吧（例如搶飛、reg 科😜）！ 所以今次叫埋一個由細去網吧去到大嘅朋友一齊去！
今次去嘅係一間位於新村大學街嘅網吧！ 可能係因為星期日夜晚，加上疫情關係，喺大學街附近嘅學生唔多，所以好少人。
網吧入口嗰度有部咁樣買使用券嘅機器，喺首頁揀付款方式 ，可以用現金（현금）、信用卡（신용카드）等等，小編揀用信用卡嚟俾錢。
撳去下一個畫面，就係按時收費嘅價目表。 因為小編唔係呢度嘅會員，所以撳非會員價（비회원요금）嗰頁度買！ 1個鐘30分鐘要2000won（約HKD14）， 小編覺得幾平，但朋友話有啲貴。 因為成日去網吧嘅人都會喺屋企附近嘅網吧做會員，會員價比非會員價平！ 充值之後就可以用，通常一充就充幾個鐘。
按照呢個方法揀使用時間嘅話，就會有一張好似相入面咁嘅收據印出嚟！ 雖然每間網吧嘅售票機都有啲唔同，但使用方法都差唔多。 如果唔識用嘅話，可以去counter搵職員幫手 😊
網吧入面好大好闊落！ 喺外面完全睇唔出有咁大！行個圈，揀個位坐就得啦！
喺counter入面打工嘅職員係度整緊嘢食， 一次要準備三樣嘢，真係好忙⋯⋯
網吧正中間有吸煙室，以前網吧係冇設吸煙室，因為唔屬於禁煙區，所以以前啲人經常喺網吧一路打機一路食煙，令到啲父母好唔鍾意自己未成年嘅仔女去網吧。 不過2013年開始禁止喺網吧食煙，網吧入面就出現咗吸煙室！ 打打吓機想食煙嘅話，就可以入去食。
小編同朋友想靜靜哋咁玩game，所以揀咗個角落頭嘅位嚟坐。
開著電腦之後就會自動彈出一個登入嘅畫面，頭先係售票機買使用券嘅收據上面寫住「670」，就係非會員登入嘅號碼啦！輸入之後撳登入就可以用部電腦㗎啦！
右上方嘅程式menu上可以確認剩餘時間。 有時打機打得太投入，冇睇到剩低嘅時間，夠鐘就會被強制終止，所以一定要好好check住時間啊！
個mon係咪好大呢？畫面同功能都好好，唔係好識打機嘅小編睇到都覺得喺咁嘅設備之下玩game會過癮！網吧嘅電腦登入之後會自動打開menu，喺嗰度可以揀遊戲。 「人氣遊戲」（인기 게임）、「online game」（온라인 게임）、「FPS/體育」（FPS/스포츠）、「休閒遊戲」等多個menu，揀自己鍾意嘅遊戲撳入去就可以！
小編細個嘅時候玩過game，大咗之後幾乎冇再玩過，所以就撳入去小學時玩過嘅game😂 隻game叫「爆爆王」（Crazy Arcade），係2000年代韓國小學生最鍾意玩嘅game！ 雖然好耐冇玩，但同朋友一齊組隊，邊傾偈邊玩game，真係特別有趣！ 感受到點解打機嘅人咁鍾意去網吧啦！ 玩玩吓，個肚就開始餓啦。
去返頭先顯示剩餘時間嗰個畫面，撳入「點餐」（먹거리 주문），就會顯示可以叫嘢食嘅menu，小編一撳入去，嚇咗一跳！有咁多可以揀嘅？
而家俾大家睇嘅只係其中一部分嘅menu！即食麵、蓋飯、薯條等等，真係有好多唔同種類嘅嘢食，單係即食麵就好多款！成個menu應該有過百款嘢食，有選擇困難症嘅小編真係頭都大埋😂
揀好咗之後就會顯示金額，再撳黃色嘅「落單」（주문하기），喺counter嘅職員就會收到order㗎啦！
之後就會彈個「落單完成」嘅畫面，唔使再撳其他嘢，一邊玩game一邊等，嘢食好快就搞掂！ 職員攞過嚟嘅時候，準備好現金或者卡，方便職員過嚟收錢。
咖哩浣熊即食麵（카구리 ）+ 白飯（공기밥 ）+ 汽水（탄산음료 ）- 7500원（約HKD52）
呢個係朋友叫嘅餐，網吧將即食麵發明咗唔同嘅menu，其中呢個 카구리係「카레」（咖哩）同韓國一款即食麵「너구리」（浣熊即食麵）合併而成！ 浣熊即食麵比一般即食麵粗啲，再加埋咖喱，就好似食緊咖喱烏冬咁，係網吧嘅人氣menu。 小編試咗一啖，唔辣，仲好香咖哩味 ，真係好好食！
炸雞沙律醬蓋飯（치킨마요덮밥 ）+ 汽水（탄산）- 6500원（約HKD45）
切到啱啱好大細嘅炸雞同雞蛋、紫菜，鋪喺飯上面，喺韓國小吃店、賣飯盒嘅舖頭好常見嘅menu。
撈勻咁食，可以食到撈咗香噴噴沙律醬嘅炸雞，同紫菜鹹鹹哋嘅味道！ 第一次喺網吧食飯，玩緊game嘅時候食一啖，覺得特別好味🤗
電腦game撈飯，唔知大家又試過未呢？ 同小編一齊去嘅朋友都話，就算係食平時食開嘅嘢食，喺呢度咁朋友邊玩邊食會覺得更加好味😋
最後玩嘅係韓國好多人玩嘅game——絕地求生（食雞）！ 雖然朋友真係好努力咁教小編玩，但係短時間內要學識實在太難啦😂😂最後都係放棄咗，一邊食住飯，一邊認真咁睇住朋友玩game，都幾開心啊！😆
大家睇完又想唔想嚟韓國嘅網吧度玩吓呢？鍾意打機嘅朋友一定要去！保證你唔會反悔，玩到唔想走啊！😁
如果有更多想知嘅內容，都可以隨時留言或者dm話俾我哋知：）
Instagram：creatrip.hk
