Hello，大家好，我哋係由韓國人每日提供最新韓國旅行資訊嘅Creatrip。
最近宣佈同李多寅拍拖嘅李昇基，新聞全部都係佢嘅戀愛消息。不過除咗最近嘅緋聞之外，大家又知唔知韓國網民最常召喚李昇基竟然係發生災難嘅時候？今日就等小編同大家解釋吓點解啦！
一有災難發生就召喚李昇基嘅原因
李昇基 ig
雖然李昇基的確係由出道到而家都幾乎一啲負面新聞都冇，形象非常正面，但究竟因為咩事，先令咁多人都話只要有李昇基就有好事發生，仲叫佢做人間護身符呢？
事源就係一個綜藝節目提到，李昇基嘅時辰八字非常靚，唔好話自然災害，就連打仗都避得過咁話喎🤣 而且真係有好多次都證明（？）我哋嘅人間護身符的確有發揮到佢嘅作用！
例如李昇基曾經有次一由日本番韓國，日本就大地震；李昇基一出國到日本，韓國就發生大規模嘅停電；參加祭典嘅時候明明落緊雨，但李昇基一出場雨就停咗，到佢表演完落台又落過。
仲有當超強颱風布拉萬吹襲韓國嘅時候，李昇基咁啱喺日本，而佢一入境韓國，颱風嘅影響就即刻減弱，令更多人覺得佢簡直係國民護身符！之後超強颱風玲玲吹襲韓國嘅時候帶嚟咗唔少損失，而咁啱嗰陣李昇基就去咗印尼拍攝，仲好一段時間都唔會番韓國住...🤣
拍攝綜藝《Twogether》嗰陣，李昇基嘅任務係影安納布爾納峰嘅相，不過當日嘅天氣好差，連當地居民都話，絕對睇唔到安納布爾納峰，所有人都預咗任務會失敗。不過當李昇基上到山頂，啲雲同霧就好似拍戲咁消失哂，最後任務成功，就連李昇基都話好神奇！
仲有一次係最近《 Mouse》演員閱讀劇本嘅片入面，李昇基提到話佢希望落大雪，之後條片upload咗後，韓國就真係落咗好幾日大雪，今年仲要零舍落咗好多雪添！
온라인커뮤니티
不過小編覺得最搞笑都係一次打風嘅時候，一間貢茶都慘受影響，店門都碎埋，不過貼住李昇基poster嘅就真係好似符咒咁咩事都冇🤣 呢件事即刻喺sns有好多討論，有網民更話呢個係「有李昇基門」同「冇李昇基門」。唔怪得有人戲稱，李昇基嘅八字係靚到，就算打仗嗰陣，有人想搵李昇基嚟擋子彈都好，中槍嗰個都唔會係李昇基哈哈。
隨着人間護身符呢個講法越嚟越出名，喺2020年頭韓國啱啱爆新冠疫情嗰陣，有好多人都搵李昇基，想確保佢喺韓國，之後都令佢特登出po澄清自己喺韓國。不過幾個月後，當佢接受有關綜藝《Twogether》嘅訪問嗰陣提到新冠疫情，佢就笑稱自己只係自然災害專家，佢都對疫症冇辦法咁話，而且仲提醒大家要注意個人衛生添。（ 而家可以證明佢真係只係天氣專家？🤣 ）
以上就係點解韓國人每逢國家性大災難就係咁搵李昇基嘅原因啦！當然呢個講法冇任何科學根據，好多事都可能只係咁啱一齊發生，但如果成日都咁好運遇到咁都好事嘅話亦都真係好神奇！唔知大家又點睇呢？歡迎留言話我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk