弘大成為年輕文化街頭嘅歷史
1970年至今弘大到底變咗幾多？大家又會唔會好奇充滿自由同活力嘅弘大，係點樣誕生嘅呢？
Hello，大家好，我哋係由韓國人每日提供最新韓國旅行資訊嘅Creatrip。
大家對弘大有啲咩印象呢？好多美食嘅地方？ 購物天堂？全部都啱！不過，如果仔細觀察弘大呢個地區，就會發現呢度蘊含住非常多彩多姿嘅文化。
弘大係一個集合多種文化藝術嘅地方，呢邊有好多shopping嘅地方、有好多好好食嘅餐廳、好靚嘅cafe、充滿hiphop藝術作品嘅畫廊、又有可以盡情跳舞嘅club、或者聽地下音樂嘅live cafe同club、製作唔同書籍嘅出版社、飾物店等等。
大家想唔想知弘大係點樣成爲一個充滿年輕文化嘅街頭呢？ 今日就同小編一齊去探討吓弘大嘅歷史啦！
1970-1980年代： 美術文化
弘大之所以集合咗咁多種文化藝術，係有一段歷史嘅，咁就要由弘益大學（홍익대학교）搬到嚟麻浦區開始講起啦。
弘大係弘益大學嘅簡稱，1955年弘益大學搬到嚟麻浦區之後，大學街就逐漸形成，嗰區好自然就被稱爲弘大啦。喺1990年代以前，「弘大」只係指弘益大學前嘅一部分，但1990年代以後，「弘大」嘅意義就慢慢擴大。 到而家，包括本來嘅弘大在內，延南洞（연남동）、合井（합정）同上水（상수）都被認爲係「弘大區」！
서울시
弘益大學進駐之後，呢度亦自然形成咗一個住宅區。 喺嗰時，弘益大學嘅美術學院有咗好大嘅發展。 1961 年 5.16 軍事政變當時，政府向大學落緊急令，強制取消晒除美術大學以外嘅所有學科，美術大學就自然開始發展，變得越嚟越出名。 到目前爲止，弘益大學美術學院嘅形象都係相當強烈，絕大部分想學美術韓國嘅初高中生都想考入弘益大學。
마포구
由1970年開始，弘大就形成咗「美術文化」。 因爲有好多想考入美術大學嘅學生，所以弘大嗰邊仲出現咗好多好出名嘅美術學院，後嚟被稱爲「弘大美術學院街」。
내 손안에 서울
一到大學入學試嘅時期，全國各地嘅考生就會湧去位於弘大嘅美術學院。 記得當時小編有一個學美術嘅朋友每一日都想來回3個鐘咁去弘大嘅美術學院上堂，準備考試。
스트리트 h
聽講當時讀美術嘅學生將一個弘大嘅住宅車庫改建成工作室。 嗰陣嘅保證金大約係100萬won，月租8萬won，所以改咗個名叫「108工作室」。 美術嘅學生聚埋一齊做嘢，一齊玩，形成一個專屬弘大嘅氛圍。
visit seoul
象徵弘大美術文化嘅其中一個地方就係「HOMI畫坊」(호미화방)，佢係一間喺1975年開嘅畫房，肩負起弘大近50年嚟嘅美術文化。
visit seoul 2
最初只係一間 14 坪嘅小畫房，到而家已經變成有 300 坪嘅大型畫房，仲有online shopping mall，規模超大。 唔單只有顏料、毛筆、帆布，仲有各種唔同嘅美術用料。 小編記得幾年前，同做美術工作嘅朋友一齊嚟到HOMI畫房時，見到有咁多材料，真係嚇咗一跳！
visit seoul 3
連咁偏門嘅材料都賣嘅原因係，老闆希望大家喺呢度見到啲新材料之後，可以獲得靈感。 老闆任何時候都將美術家放喺第一位，所以喺凌晨嘅時候，如果接到好緊急嘅電話，都會即刻開門等佢哋嚟！就係咁HOMI畫房成為咗弘大美術文化最有象徵性嘅地方啦。
1990年代：音樂文化
오마이뉴스
由90年代開始，弘大「音樂文化」開始發展起嚟，live club開始聚集喺弘大一帶，掀起咗一股音樂潮流。 搬嚟弘大之前嘅live club都叫做「rock cafe」。 雖然個名係咁叫，但係幾乎無播過搖滾音樂，更加係聽住唔同嘅音樂跳舞嘅dance club， 亦都可以講係而家大家所認知嘅club嘅初形。
seoul &
呢啲rock cafe大多都喺新村（신촌）一帶。 新村係首爾最大嘅大學街，俾延世大學、西江大學、梨花女子大學、明知大學4間大學包圍住 ，年輕嘅大學生都會聚喺rock cafe度玩。
서울사랑
但係90年代初，首爾市制定計劃，將大學街建設成健全嘅文化街，以新村爲中心，集中管制大學街嘅娛樂場所。 嗰時啲rock cafe亦受到管制，所以本來喺新村嘅rock cafe就搬到去相對無咁嚴嘅弘大。
플랫폼
然後，rock cafe文化開始變成live club文化， 發展成爲一種複合文化空間，好多 獨立音樂人都會喺呢度演出。93年live club「Rockworld」開張之後，Drugs、Jammers、Rolling Stones等好多live club都相繼登場，而韓國嘅獨立樂隊文化就喺呢度開始發展。
獨立樂隊唔靠大型經紀公司或其他人嘅投資，自己撐自己，同韓國其他大眾音樂有住唔同嘅形態。 Punk、另類搖滾等多種類型嘅樂隊亦喺弘大live club開始發展。
유튜브 Crying Nut
獨立樂隊想喺弘大嘅live club演出，就一定要通過選拔，如果認為同演出場地嘅性質相符，就可以keep住喺嗰度演出，一展所長。 喺25坪~30坪左右，細細哋嘅空間入面舉行live club show，用非常平啲嘅價錢就可以睇到。 當時有live club嘅入口處寫住「唔好坐係度睇」、「撞到你散為止」（享受rock演出，同觀衆之間互相撞身體嘅遊戲）、「賺返票價先返去啦」，大家應該都可以想像到當時嘅氣氛？
스트리트 h
弘大之所以令音樂文化咁流行，係因爲弘大有住一班自由奔放嘅美術人。聽講當時韓國仲係好保守，呢一類band嘅風格好難令人接受，唯有喺弘大先可以完完全全咁展現自己。
而家大部分獨立音樂人都會喺弘大表演。唔單止因為弘大有最多演出場地，仲因爲弘大live club非常有象徵性，玩音樂嘅人都好鍾意弘大！ 小編都好鍾意獨立音樂人，所以有時都會去睇弘大嘅live show，同一般大型嘅concert感覺真係好唔同㗎！
90年代後期 : dance club文化
내 손 안에 서울
90年代後期，dance club文化逐漸形成。 以1992年開業嘅「發電站」（발전소）開始，Golden Helment（황금투구）、MWG（명월관）等唔同嘅club慢慢出現。 仲記唔記得之前介紹美術文化嘅時候，美術界人士喺工作室聚埋一齊玩，直接影響弘大嘅文化呢？ 弘大嘅club就係咁嘅地方啦。
내 손 안에 서울
Dance club唔係單純跳舞嘅娛樂場所，而係美術、音樂等各個領域獨特文化藝術結合埋一齊，係一個喺大眾文化感受唔到嘅新文化空間。喺呢度仲可以聽到當時好難接觸到嘅海外音樂， 所以呢度就成爲咗渴望新娛樂文化嘅年輕一代聚腳點。
중앙일보
弘大dance club成爲了引領最hit、最潮文化嘅空間。為咗俾人覺得自己都好潮，去弘大dance club嘅人開始慢慢變多。
dj asia
弘大嘅club喺2000年初期，因為「club day」而有好大嘅發展。 2001年3月，以「club嘅朋友聚首一堂嘅日子(Clubber's Harmony)」為口號開始嘅「club day」，每個月最後一個星期五都會進行，持續咗10年。
bnt 뉴스
club day好有系統，喺第一次去嘅club度買飛，就可以去晒同club day有聯繫嘅所有club。 另外，由2007年開始，啲band同可以演出嘅live club簽約，擴大咗規模。可以一整日享受唔同形式，唔同concept嘅club party同 live show，成個弘大就成爲咗一個文化藝術玩樂地方。
2000年代：商業化
내 손 안에 서울
弘大吸收多元文化，發展爲超大型嘅文化藝術街。 大家都認為韓國最潮最hit嘅嘢，全部都集中喺弘大。同時間巨大嘅資本亦都開始流入。
스트리트 h
當然，1990年代都有發展商業，但係冇對文化空間造成威脅。當時高級嘅cafe、餐廳、連鎖店，同綜合文化空間都一齊成長。不過到咗2000至2010年之間，政府對弘大嘅「步行街」項目嘅支持增加，大量商業資本開始流入。最具象徵意義事件係「Duliban鬥爭」（두리반 투쟁）。
중앙일보
Duliban係一間位於弘大入口站附近賣刀削麵嘅平凡餐廳。 不過喺2009年，因爲弘大入口站起機場鐵路，所以Duliban面臨要被拆除。 負責工程嘅公司淨係俾300萬韓元（約HKD20,844）做補償金，所以老闆夫婦反對拆遷。
스트리트 h
被強行遷拆嘅唔只發生喺好似Duliban一樣嘅舖頭，亦都發生喺令弘大發展起嚟嘅文化空間。 睇住自己鍾意嘅弘大文化消失，感到憤怒嘅藝術家為咗守護弘大，喺弘大參加反對拆除嘅鬥爭。鬥爭嘅方式就係音樂，每一個禮拜都會喺面臨拆遷危機嘅Duliban前面進行live show。
파티 51
2010年5月1號勞動節120週年，喺Duliban舉辦咗超過60個band show嘅「新都市文化派對51+」，吸引咗超過2500名觀衆。 最終，經過531天嘅鬥爭，Duliban唔單只得到合理補償金，仲可以喺同原本商圈相似嘅地方營業（直到而家都仲係營業中）。
내 손안에 서울
隨住大眾娛樂文化流入，形成自身文化嘅文化藝術地區租金大幅上升。 實際上，根據2019年商家信息研究所嘅調查結果顯示，弘大區商舖嘅租金同2018年相比升咗22.58%。所以初期構成弘大文化嘅live club 「Drugs」、dance club 「MWG」等等嘅綜合文化空間，同埋細型嘅商戶都被逼搬去附近嘅地區，甚至關門大吉。
現時嘅弘大
之前講到文化發展同商業資本既流入，令到而家嘅弘大成爲可以享受多種文化嘅巨大空間。 唔只係弘益大學附近，連埋延南洞、合井、上水等在內成個弘大區，各個區域都扮演着住唔同嘅角色！ 而家開始就等小編用弘大地區嘅地圖，帶大家一一去睇吓各區有啲咩啦！
1. 主要街道
紅色標示住嘅係弘大主街，最受商業化影響嘅地方。
弘大入口 9號出口
弘大入口站9號出口係通往弘大主街最近嘅出口。 約喺弘大等嘅話，好多時都會話「喺弘大入口站9號出口見！」， 所以被稱爲「人間地獄」，因為真係超多人。 特別係週末或者假期，啲人係咁喺個出口湧出嚟，真係好誇張。尾班車時間行去9號出口方向，就會見到好似地獄咁嘅景象。 喺弘大酒吧飲到醉醺醺嘅人返屋企都會湧去9號出口。
Shopping
不愧係受商業化影響最大嘅地方，弘大主街真係有好多shopping嘅地方。 除咗FILA、ADIDAS、H&M等多個品牌嘅服裝店，仲有Innisfree、Nature Republic等等多個美妝品牌嘅舖頭！
마포구
唔單止咁，仲有啲個人經營嘅舖頭店鋪賣衫同飾物。要留意嘅係，呢啲舖頭賣得比較平，不過質素就唔係咁好！
唔好食嘅餐廳
SBS NEWS
弘大主街有好多餐廳同酒吧。 當然有唔少好食嘅餐廳，但係大部分嘅餐廳嘅好評唔多，仲有啲伏。 加上因為受到商業化嘅影響，連鎖餐廳同飲酒嘅餐廳多咗，冇咩特色。 所以主要係啱啱成年嘅大學生想要感受吓弘大火熱嘅文化嘅時候，先會成日幫襯呢度嘅餐廳同酒吧。 年紀慢慢大嘅話，反而就會選擇去弘大外圍嘅其他餐廳。
2.弘大嘅周圍
呢度就係距離弘大主街稍為遠嘅幾個area，有好多唔錯嘅餐廳、cafe、服裝店。 雖然唔係位於弘大主街，但都好受歡迎，所以租金都好高。每個地區都有自己嘅特色，逐個睇吓啦！
延南洞
弘大入口站 3 號出口嗰邊，以沿着京義線林蔭大道建成嘅延央公園（延南洞+中央公園）（연트럴파크）爲中心，有好多好有特色嘅cafe、餐廳、小店，非常之受歡迎。 最近呢3、4年，因為弘大主街太過逼，好多人都搬到延南洞，所以呢度嘅流動人口大幅增加！
延南洞同弘大主街唔同，比起連鎖店，私人開嘅舖頭會多啲，仲有好多同延南洞整體氛圍好夾嘅餐廳！
京義線林蔭大道
呢度係喺弘大入口站 5 號同6 號出口出就可以去到嘅地方，係沿住延南洞建成嘅京義線林蔭大道嘅延長線。 不過同延南洞唔一樣，呢度有一條「京義線書街」，係為咗發展首爾嘅書文化而建成嘅街道，所以大家喺呢度可以享受到同書相關嘅各種文化。
喺以京義線鐵路爲中心建成嘅散步徑，同附近嘅舖頭行吓嘅話，時間會過得超快！ 呢度有超受歡迎嘅餐廳同唔同類型嘅小店，所以最近都成為拍拖熱點之一。
合井、上水
地鐵2號線同6號線都會經過合井，如果由弘大入口站行過去嘅話，15分鐘左右就會到。 6 號線合井站嘅下一個站係上水站，同弘大入口主街大約有15分鐘步行距離。
弘大商圈一直延伸到呢度，最近合井同上水都發展得好快，有超多好食嘅餐廳同又潮又有feel嘅cafe。
3. 出版社、設計等公司
之前講弘大歷史嘅時候冇提到，而家就喺呢度同大家講吓啦。 弘大有好多設計公司同出版社。 弘大前面一帶聚集咗超過3,000間出版社。 隨住美術、音樂等多種文化藝術嘅發展，自自然然出版文化都喺弘大發展起嚟。
스트리트 h
所以，而家弘大嘅出版園區同坡州出版城一齊被選爲韓國最大嘅出版地區。 呢個亦都係之前介紹嘅京義線書街形成嘅契機。
YG ENT
除此之外，合井站附近仲有好多辦公室大樓。 YG娛樂嘅新公司大樓都喺呢度！
4. 夜店
地圖上標示住嘅地方就係弘大夜店聚集嘅地方。 弘大Club文化好似之前講嘅咁，隨住club day消失，已經冇之前咁蓬勃，不過依然同江南、梨泰院一齊被選爲首爾三大夜店區。
중앙뉴스
一到星期五夜晚，夜店街就會人頭湧湧。一啲係為咗去夜店而排隊嘅人、一啲係喺夜店玩完去第二度玩嘅人、又有啲係拉客。大約喺30年前開始出現嘅弘大dance club，依然喺呢度延續自身嘅文化，係咪好神奇呢？
track
5. 街頭表演（Busking）
最後想介紹嘅地方就係街頭表演區。 沿住之前介紹嘅弘大主街中間咁行，就可以見到各種各樣街頭表演。
마포구
過去弘大街頭表演聖地就係弘大公園旁邊嘅空地，有各種獨立音樂家嘅表演，又有美術、魔術等等唔好類型嘅街頭表演。 但隨住弘大中間條大路正式指定為街頭表演區之後，喺弘大公園表演就變咗犯法啦。
내 손안에 서울
雖然政府曾經因為疫情禁止街頭表演，但係而家唔同嘅舞團、YouTuber歌手都成日會嚟到呢度表演。 亦都有人批評過話，因為弘大商業化，令到街頭表演嘅質素變差。
시정일보
以上就係弘大成爲年輕文化街頭嘅一段歷史啦，大家覺得點呢？ 小編都好鍾意弘大呢個地方，希望弘大嘅文化藝術同商業文化可以搵到平衡點，和諧相處，共同發展。🙏
最後，小編仲整理咗弘大好食好玩嘅清單，大家可以撳入下面嘅link睇吓，下次嚟嘅時候就可以玩盡啲啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
