Hello，大家好，我哋係由韓國人每日提供最新韓國旅行資訊嘅Creatrip。
大家學韓文嘅時候，唔知有冇覺得好多音都同我哋用開嘅廣東話好似呢？其實係有原因㗎，因為韓文入面有成50~60%都係漢字語嚟！好多日常字，例如학생（學生）、식당（食堂，即係餐廳）同책（冊，即係書）等等都係漢字語嚟！或者因為平日唔多用又唔常見，所以好多韓國人都會覺得純韓文嘅字有種特別嘅美感，意思又好靚。今日就等小編嚟同大家介紹一啲擁有純韓文名嘅idol啦！
擁有純韓文名嘅idol
2NE1 Sandara Park（산다라박）
或者好多人會以為Sandara係英文名，但佢其實係純韓文名嚟！Dara本名係박산다라（朴Sandara），「산다라（Sandara）」喺韓文有堅強同堅定嘅意思。
Apink 普美（보미）
Apink嘅普美都係個純韓文名嚟，「보미」意思係充滿意義同可靠！
Apink 初瓏（초롱）
初瓏亦係一個純韓文名，有明亮又璀璨地發光發亮嘅意思！
孫娜恩（손나은）
孫娜恩而家以演員身份發展緊，原來佢個名都係純韓文，「나은」喺韓文有出眾同優秀嘅意思！
Red Velvet Seulgi（슬기）
Red Velvet嘅「Seulgi」都係純韓文名，有聰明同機智嘅意思。
MAMAMOO 玟星（문별）
本名為「문별이（文星伊）」嘅MAMAMOO都係純韓文名，喺韓文係星星嘅意思，可以理解為閃閃發光嘅意思。
SISTAR 多順（다솜）
前SISTAR成員多順嘅名冇相應漢字，因為佢都係個純韓文名嚟！「다솜」喺韓文有「愛」嘅意思。
宇宙少女Luda嘅本名係「이루다（李Luda）」，喺韓文係實現同完成嘅動詞，可以理解為實現夢想嘅意思。
EXO 燦烈（찬열）
EXO嘅燦烈都係個純韓文名，喺韓文意思係豐實嘅果實。
本月少女 夏瑟（하슬）
本月少女都有純韓文名嘅成員，佢就係夏瑟啦。「하슬」喺韓文有從天而降嘅聰明孩子嘅意思。
番外
除咗本名之外，亦都有啲idol有純韓文嘅藝名，例如係Brown Eyed Girls嘅「나르샤（Narsha）」有展翅飛翔嘅意思，MBLAQ嘅「미르（Mir）」都有龍嘅意思，相信唔少人會以為呢兩個係英文名！另外SF9嘅「로운（路雲）」同B1A4嘅「산들（燦多）」都係純韓文藝名，前者係韓文形容詞接尾詞「~롭다」嗰度嚟嘅名，後者則係「산들바람（微風）」一字嚟㗎！都係啲辨識度好高又特別嘅名！
最後再同大家介紹一個雖然唔係統韓文名，但所有成員嘅本名或者藝名都充滿韓國歷史同文化氣息嘅組合—ONEUS啦。
ONEUS官方FB
환웅（煥雄）：同古代朝鮮嘅建國神話嘅主角「환웅（桓雄）」同名
XION：本名「손동주（孫東柱）」同有名嘅韓國詩人「윤동주（尹東柱）」同名
이도（LEE DO）：呢個藝名同世宗大王同名
건희（建熙）：同Samsung會長李建熙（이건희）同名
서호（抒澔）：雖然冇同邊個偉人撞名，但佢改本名之前嘅「건민（建旻）」其實都有建立天下嘅意思㗎！
呢隊真係小編見過成員嘅名最有韓國特色嘅組合啦，個個嘅名都同啲偉人有關，都難怪佢哋公司本身會想改佢哋個組合名做「The Kings」或者「王王」😂。
以上就係一啲有純韓文本名嘅idol啦，亦都介紹咗幾位有純韓文藝名嘅idol，同雖然唔係純韓文，但都充滿韓國特色嘅組合！其實除此之外都仲有唔少有純韓文名嘅idol，有邊個小編冇提到嘅歡迎留意話我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
