韓劇穿煲畫面
韓劇穿煲畫面，劇組人員眼大睇過龍？朝鮮時代已經有CCTV？仲有gas爐？
Hello，大家好，我哋係由韓國人每日提供最新韓國旅行資訊嘅Creatrip。
近年嘅韓劇唔再係只係得生cancer嘅情節，題材變得多樣化，劇情都好有趣，製作又好用心，所以受到大家嘅喜愛！不過人總係會有失手嘅時候，韓文將呢啲穿煲位叫做「옥에 티」，字面意思係「玉上嘅小瑕疵」。一套精心製作嘅劇就好似一塊玉咁，出現一啲穿煲鏡頭就成為咗玉上面嘅小瑕疵啦！
小編搜集咗好幾個喺古裝劇出現嘅穿煲鏡頭，唔知大家睇嘅時候有無留意到呢？！
韓國古裝劇穿煲鏡頭
1. Dr. JIN
《Dr. JIN》係講述一個現代嘅醫生，穿越到17世紀朝鮮時代嘅故事，但竟然出現咗現代化嘅CCTV？雖然只係一閃而過嘅鏡頭，但大家睇到都覺得好好笑，仲話唔通醫生係同個CCTV一齊穿越過去嘅？
2. 大長今
《大長今》仲誇張，喺御膳房度出現大大個gas爐，攝影師竟然都無發現到！一睇就知用嚟整完道具，不過拍嘅時候就應該記得要收返埋去啊！
另外為咗令啲宮女嘅身高睇落差唔多，拍出嚟嘅畫面靚啲，所以俾佢哋著高踭鞋。之但係喺佢地大步快走嘅時候，就睇到佢哋嘅高踭鞋啦，令人懷疑究竟嗰陣係咪已經有呢種嘅鞋呢？
3. 張玉貞，為愛而生
金泰熙同劉亞仁主演《張玉貞，為愛而生？》，都影到金泰熙跑嘅時候著住高踭鞋。金泰熙飾演嘅張玉貞係出生於1659年嘅朝鮮時代，當時嘅女性大多數係著矮踭嘅鞋（꽃신），呢個畫面一出都成為左大家嘅話題
4. 朱蒙
另一部超高人氣嘅古裝劇《朱蒙》，主要講高句麗第一個皇帝嘅故事，套劇喺真實係歷史遺跡、文化村度拍攝，但出現咗現代嘅排水渠、告示板、甚至電線，睇到即刻出戲！而家科技咁犀利，應該可以用電腦效果將嗰啲唔應該出現嘅嘢整走去掛！
5. 不滅的李舜臣
《不滅的李舜臣》係描述韓國民族英雄李舜臣嘅一生，而喺拍攝日軍場景時，枱上面竟然出現咗現代嘅紙巾盒！喺2014年重製再播嘅時候，同樣畫面就無咗紙巾盒啦！
6. 推奴
「推奴」係朝鮮時代專門去捉逃走奴婢嘅一個職業。呢個倒水嘅鏡頭，見到水壺底下嘅價錢牌！小編睇嘅時候一眼就睇到，真係超明顯！點解當時嘅攝影師、導演無發現㗎？
7. 王與我
《王與我》係講朝鮮時代第九位國王成宗同宦官金處善、後宮之間嘅故事。當中呢個飾演廢妃嘅具惠善匿喺被入面嘅鏡頭，見到被袋嘅拉鍊...身處於而家現代睇落就好自然，但小編敢肯定，當時嘅年代係無拉鍊呢樣嘢！
8. 樹大根深
《樹大根深》係講述15世紀世宗大王創造韓文拼寫，頒佈「訓民正音」前一個星期所發生嘅事。劇中出現咗羅馬數字「14」，而羅馬數字係19世紀之後先開始傳入，所以唔應該喺劇度出現！另外就係故事係講創造韓文拼寫，但究竟出現咗充滿韓文嘅紙，時間上亦都唔合理。
9. 屋塔房王世子
呢一套係講朝鮮時代嘅王世子同佢嘅朋友一齊超越到現代，發生好多搞笑嘅故事。劇中多次出現街燈、喇叭、告示版 拍嘅時候，工作人員都無發現到？
10. 哲仁皇后
《哲仁王后》最後一集時，哲宗同中殿被人用槍攻擊，雖然古代已經有類似火炮、槍出現，但劇入面嘅槍型係唔會喺哲宗嗰個時代會出現嘅槍型。另外，戲中出現嘅漢字係簡體字，亦都係劇組無做好功課而出現嘅穿煲位。
唔單係古裝劇，現代劇都有唔少穿煲嘅鏡頭，小編揀咗幾個經典嘅同大家分享吓啦！
現代劇嘅穿煲鏡頭
1. 來自星星的你
女主角全智賢同金秀賢飾演嘅都民俊告白時，都民俊大褸個領係平嘅，但同一個場景，鏡頭一轉，個領就反起上來。唔通凍得濟，都民俊用超能力令件褸個領豎起嚟保暖？
2. 鬼怪－孤單又燦爛的神
《鬼怪》呢一個幕都好經典！李東旭一邊唱住「도깨비 빤스」，一邊晾衫。但鏡頭一拉，手上條褲嘅顏色竟然由灰色變咗做藍色！觀眾睇到都問「係咪其中一個超能力？」，定係「有啲咩暗示？」
3. 金秘書為何那樣
另一套浪漫愛情劇《金秘書為何那樣》亦都唔少穿煲鏡頭。其中第15集講到飾演本部長嘅朴敍俊向飾演金祕書嘅朴敏英求婚，鏡頭先影住戴上戒指，然後二人擁吻，但係竟然錫錫下，隻戒指就唔見咗！
唔知大家有無發現到以上嘅穿煲位呢？ 其實都幾搞笑！大家下次睇劇嘅時候，可能細心啲就會發現到更加多穿煲位呢
如果有更多想知嘅內容，都可以隨時留言或者dm話俾我哋知：）
Instagram：creatrip.hk
