愛寶樂園Safari Tram
之後嚟韓國愛寶樂園又有新體驗！今月14號開始新運行「Safari Tram」
마타티카
3 years ago
Hello，大家好 ，我哋係由韓國人每日提供最新韓國旅行資訊嘅Creatrip。
之前韓國新聞宣佈愛寶樂園會停運45年嘅「野生動物觀光巴士」之後，尋日（10號）再次宣佈會喺嚟緊14號有新車運行，名為「Safari Tram」 (사파리 트램) ，佢到底同以往嘅車有咩分別呢？等小編為大家講解吓啦！
愛寶樂園Safari Tram
之前講到愛寶樂園「野生動物觀光巴士」要成為回憶嘅時候，唔少人都覺得好可惜，不過大家又唔需要太灰心，因為尋日（10號）又有新聞講話會有新車運行（Safari Tram），呢架新車比以往嘅車有一個更大嘅玻璃窗，而且佢仲降低咗車輛嘅高度，大家可以同動物有更近距離同睇得更清。
呢次嘅大改造，最吸引莫過於佢超大玻璃窗，由玻璃同聚碳酸酯製成嘅防彈玻璃。佢比起一般普通玻璃強硬150至200倍，可以最多承受3500公斤嘅衝擊力，即係話如果有15隻重220公斤嘅老虎同時衝去車度，大家都會係相當安全。
Hyundai Everdigm負責人表示：「因為我哋已經進行過數百次測試，大家之後嚟都可以放心咁坐。」
另外，每一架新車都會有通風口，大家可以直接感受到動物嘅聲音同氣味。同時新車高度同地面差大約1.6米，坐低嘅時候啱啱好可以同動物近距離接觸，唔需要再好似以前咁企起身先會睇到。
聽落新車都幾唔錯，如果大家之後去愛寶樂園，唔好錯過呢個新體驗啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
熱門文章
