首爾傳統跳蚤市場尋寶
5000won就可以買到idol同款衫？鐘意復古衫嘅朋友絕對唔可以錯過呢度！
Hello，大家好，我哋係由韓國人每日提供最新韓國旅行資訊嘅Creatrip。
今日小編嚟帶大家去韓國最大嘅二手市場「首爾傳統跳蚤市場」，去睇吓呢個二手市場係點，同埋試吓喺度搵BTS同款！如果對韓國嘅二手市場有興趣，亦可以參考東廟跳蚤市場嘅介紹！
首爾傳統跳蚤市場（서울풍물시장）
- 地址: 首霰東大門區千戶大路４街 ２１（서울 동대문구 천호대로4길 21）
- 營業時間: 10:00-19:00（餐廳由10:00-20:00）逢星期二休息
首爾傳統跳蚤市場（서울풍물시장）
好多韓國人都鐘意去跳蚤市場尋寶，因為喺呢啲地方可以買到比出面更平同更特別嘅復古嘢。而喺首爾除咗東廟跳蚤市場，你仲可以揀去韓國最大嘅二手市場—首爾傳統跳蚤市場。
當你去到市場門口，就會見到好多街鋪，無論係衫、裝飾物、書、黑膠唱片、玩具同其他二手物品等等，貨品多到可以話咩都有！
首爾傳統跳蚤市場有分室內同室外，室外都好多賣衫嘅攤當，而且價錢都好平，只係1,000-5,000won。當然有啲貨品如果有牌子嘅話會貴少少，但整體都係好平！
除咗衫仲可以喺度搵到好多復古小物添。
除此之外，肚餓嘅時候仲可以去買嘢食，喺呢度嘅路邊攤你可以買到魚糕，糖煎餅（호떡）、熱狗同飲品等等。
參觀完室外，而家就等我哋一齊入室內啦！室內可以話係室外嘅升級版市場，因為呢度啲鋪頭都好整齊，地方仲好乾淨同涼爽添。
1樓有好多二手衫鋪，而大部分都賣有牌子嘅二手商品，所以價錢會貴過室外。不過如果係想買有牌子嘅平貸嘅話，呢度絕對係尋寶嘅天堂！
呢度亦有好多其他二手物品鋪頭同雜貨店，所以要小心唔好喺度蕩失路啊！
呢度甚至有得買家俬同裝飾物，樣樣都好獨特同好靚，小編仲喺度搵到一間樂器鋪添！
二樓喺少女時代成員潤娥同Sunny拍攝《Running Man》嘅時候到訪過地方，如果係《Running Man》或者少女時代嘅粉絲嚟到記得要跟住佢哋去過嘅路線踩點啊！
喺二樓亦可以搵到好多唔同嘅商品，由衫到眼鏡，連高價嘅牌子產品都可以喺度買到，不過都要記得喺買之前問清楚價錢啊！
喺室內都有一個兩層嘅food court，大部分都係韓式餐廳，例如紫菜包飯，韓式煎餅或者係湯料理等等。
另外室內最特別嘅就係二樓嘅「青春一號街」啦！喺呢度可以睇到韓國人嘅童年係點，了解更多舊時韓國嘅模樣。
你仲可以去「青春茶房（韓國舊式cafe）」坐吓，呢度嘅飲品只係賣1,500-2,000won。
你亦可以參觀到韓國舊式嘅遊戲鋪、唱片鋪同漫畫店，每個地方都好得意同好靚，係打卡嘅好地方！
喺度絕對可以影到人生照！
呢度仲提供租借復古服裝嘅服務添！係絕對唔可以錯過嘅體驗。
挑戰搵BTS同款服裝
今日小編打算挑戰喺呢個市場入面搵《防彈少年團2021年Season Greetings》入面成員着過嘅復古look！想去BTS影Season Greetings嘅拍攝地方踩點嘅朋友可以點呢度！
1. 柾國
小編喺行行吓無意中搵到同柾國着過嘅衫好相似嘅T-shirt。本身佢係Ralph Lauren嘅衫，如果買新衫嘅話會好貴，但小編喺度以5,000 won就買到啦！雖然唔係完全一樣，但都已經好似啦係咪？
2. J-Hope
夏天唔少得就係T-shirt，喺度亦都可以輕易咁搵到同J-Hope呢件紅色衫類似嘅款。呢件亦都只係5,000 won！就算唔係100%一樣都唔緊要啦！呢件衫咁啱係紅白配色，真心已經算同J-Hope着過嘅好似樣！
3. V同Jin
V同Jin着過嘅恤衫其實算係少見嘅款，但小編都盡量搵咗個最貼近嘅款。最後揀咗呢件幾高質嘅橙黃色恤衫，仲要都只係5,000won！大家又覺得似唔似V同Jin着過嘅嗰件衫？
4. RM
至於呢件衫，都同RM着過嘅好似係咪？呢件只係賣5,000won嘅恤衫睇落好復古，襯埋牛仔褲一齊着嘅時候好好睇！大家又覺得小編着得似唔似RM？
5. Suga
最後小編要挑戰嘅係Suga呢個綠色T-shirt look！呢件都同樣係5,000 won，就咁睇真係同Suga身上嘅幾似，而且就算係二手衫，quality都好好！
以上就係有關首爾傳統跳蚤市場嘅介紹啦！大家又想唔想嚟呢度搵idol同款衫呢？歡迎留言話我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
