Hello，大家好，我哋係由韓國人每日提供最新韓國旅行資訊嘅Creatrip。
隨着物價水平嘅上升同我哋對家庭觀念嘅改變，越嚟越多後生仔都會選擇唔結婚唔生仔，但大家又知唔知大部分人印象中好重視家庭觀念嘅韓國竟然會係全世界生育率最低嘅國家？
동아
根據上面由聯合國人口基金（UNFPA）公布嘅2021年世界人口現況嘅統計資料，最右邊嘅數值為總和生育率，即係每一位育齡婦女（15至49歲）一生會生幾多個小朋友嘅意思，由呢個圖表可見，韓國嘅生育率為1.1個，喺全世界198個國家之中排行最尾。
根據上圖韓國統計廳喺2021年2月發表嘅資料，可以見到韓國2015年、2018年同2020年「新生嬰兒數目同總和生育率」嘅趨勢持續咁下降。
| 出生人數 | 總和生育率 | |
| 2015年 | 438,400 名 | 1.24 |
| 2018年 | 326,800 名 | 0.98 |
| 2020年 | 272,400 名 | 0.84 |
為咗容易啲比較數據大家可以參考呢個表，可見韓國嘅生育率每年都以好快嘅速度咁下降緊，韓國統計廳更加預計，2020年嘅生育率會達到好低嘅0.84（姐係一個都唔生）。
今日就等小編同大家探討吓韓國低生育率嘅問題啦，究竟係啲咩原因形成咁嘅情況呢？
不過必須一提嘅係，雖然育齡婦女嘅總和生育率一直跌緊，只不過已婚女性嘅生育率其實係一直增加緊㗎。根據一項統計嘅話，2016年已婚女性嘅總和生育率係2.23位。
不過就算已婚女性會生2個以上，整體嘅總和生育率都唔夠一個，證明好多人都索性唔結婚，或者結唔到婚嘅意思。根據韓國統計廳嘅話，2020年嘅結婚註冊數係有史以來最低嘅一年。
잡코리아X알바몬
而根據Jobkorea同albamon嘅問卷調查，可以見到而家韓國嘅20-30代對於結婚嘅意識比起以前變咗好多。上圖綠色嘅部分代表「計畫不婚」，紅色代表「計畫結婚」，而白色就係「未定」嘅意思。而從上而下就代表全體、女性同男性嘅意思。可以見到整體20至30代有24.8%都打算唔結婚，姐係每4個入面就有1個唔會結婚！特別係韓國咁樣咁重視家庭，傳統覺得一定要結婚嘅國家，竟然有咁大比例嘅年輕人都唔打算結婚，真係好令人驚訝！
以下就嚟睇吓現實中有咩原因令到韓國嘅後生仔唔想結婚啦！
韓國低生育率嘅四大原因
經濟方面原因
1. 樓價
第一個原因就係韓國嘅高樓價啦，為咗組織自己嘅家庭就一定要有一個安樂窩，只但係而家連買樓都好難做到。因為樓價嘅問題，有好多青年甚至無法自己一個住，只可以同父母一齊住，更唔好講買樓再結婚組織家庭啦。
2020年首爾4人家庭嘅收入中位數係一年5,700萬won左右，而首爾嘅樓價中位數超過9億。即係就算連飯都唔食，只係做嘢都要16年先可以買到一層樓，現實中新婚夫婦喺首爾根本冇咩可能買到一層樓。雖然話有唔同嘅制度等新婚夫婦可以借錢買樓，但借完錢都要還好一段時間錢，所以對好多新婚夫婦嚟講都係個好大嘅負擔。
2. 養育費用
全世界邊個地方養小朋友開支都一定好大，而韓國好重視教育嘅風氣都同樣令養大小朋友嘅費用增加。
韓國學生為咗入好大學，由細個開始就會補好多習，而補習嘅費用當然全部都由父母負擔。實際上，根據2019年嘅數據，有成74.8%嘅韓國學生有補習嘅習慣，每個月更平均花429,000won喺補習上面添，呢個情況就更加令到養育小朋友呢件事難上加難啦。有唔少統計資料都顯示，養大一個小朋友到佢大學畢業平均需要3億won左右。
但實際上韓國嘅年輕一代根本冇呢個經濟能力去應付呢樣嘢，韓國嘅大學畢業生有30%都搵唔到全職工作，工作不穩定性非常高。喺呢個情況下結婚生仔嘅話，根本就俾唔到子女足夠嘅支援。
3. 意識嘅變化
韓國非常重視家庭嘅傳統文化，好多韓國人都會覺得，咁上下年紀搵個合適嘅對象結婚生仔係一件幸福又理所當然嘅事。
不過最近越嚟越多人唔想因為家庭中心主義呢樣嘢而去犧牲自己嘅人生，換句話講好多人都視結婚為一個選擇而唔係必須，就好似前面所講，好多人都選擇「不婚」。
tvN
特別係最近越嚟越多人關注女權意識，教育水平亦有所提高，所以有唔少女性都唔想結婚。佢哋好多都認為好似自己啊媽同啊婆嗰代一樣，女性理所當然地要為家庭放棄哂自己嘅人生係一件唔恰當嘅事。韓國小編實際遇到好多女大學生都話唔會將結婚視為未來嘅一項選擇。
好多人都話如果遇到真係好好嘅對象嘅話或者會考慮結婚，但目前嚟講對結婚唔大興趣，比起諗結婚，佢哋表示對點樣令自己活一個精彩嘅人生更加令自己感興趣。就係因為而家越來越多人覺得結婚會影響自己嘅人生同職業，所以更多人會選擇唔結婚啦。
制度方面嘅原因
就好似上面提到，雖然韓國嘅意識變化得好快，但現實嘅制度同社會整體都未追得上意識嘅變化。
1. 產假同育兒假
韓國嘅產假同育兒制度雖然好完善，但根據2018年嘅一項調查嘅話，實際上就職女性生仔之後，使用產假同育兒假嘅女性就得35.8%。換句話講，就算制度係咁完善，喺好多企業嘅環境入面，都唔係咁自由地可以使用呢項制度。
再者有好多女性會因為生仔嘅問題而令到自己嘅年資減少。雖然喺2000年之後，解僱放產假嘅員工係一個犯法嘅行為，但都仍然有好多公司會暗地向員工受壓令佢自己辭職。有調查顯示，喺產假之後10個有2個都無法番公司做嘢，育兒假之後就有3個會被炒魷魚。
男性嘅育兒假就更加難使用啦。因為韓國整體都仲係覺得育兒係女性嘅事，所以就算男性想請育兒假都好，唔少公司都會覺得不滿。加上對於男性要幫手育兒呢件事，都有人會覺得嗰個男人係冇能力工作先要湊仔。
就好似上面提到，社會風氣根本容納唔到年輕人兼顧家庭同工作兩邊，所以社會風氣亦係導致韓國低生育率嘅原因之一。
2. 長時間工作
根據OECD關於工作時間嘅統計，韓國係全世界工時最長嘅國家之一。2017年嘅資料顯示，OECD 36個國家嘅一年平均工時為1,748小時，而韓國則係2,024小時，即係比OECD平均工時再要工作多1.7個月。
唔結婚嘅人當中，有唔少人都話因為工作連照顧自己嘅時間都唔夠，所以結婚令佢哋覺得好大負擔。雖然結咗婚但冇小朋友嘅夫婦就表示，冇能力投資養小朋友嘅時間，所以唔敢輕易咁生仔。雖然目前有「每週工作52小時」同「彈性工時」等等嘅制度而逐少有啲改變，但整體嘅社會風氣睇怕都好難改善。
文化方面嘅原因
韓國有個term叫做「hell朝鮮」，係地獄嘅「hell」加韓國以前嘅國家名「朝鮮」組合而成嘅詞語，係用嚟自嘲韓國就好似地獄一樣冇希望而創造嘅詞語。
已經變成日常嘅激烈競爭、高昂嘅物價同失業率、財當不平等等都令呢個世代嘅年輕人覺得喺韓國生活好困難，實際上韓國亦係OECD國家當中自殺率一位嘅國家，呢個係OECD國家入面平均自殺率嘅2倍，姐係每日就有平均38位自殺。
所以有好多人都表示，唔想將自己喺「hell朝鮮」面對嘅痛苦傳承俾下一代，或者係唔想自己嘅下一代出生喺呢個咁辛苦嘅世界，就算係組織家庭嘅幸福感都敵唔過未來嘅黑暗咁話喎ㅜㅜ。
以上就係韓國低生育率嘅原因啦，可見係由好複雜嘅社會文化問題造成。有人話低生育率會造成高齡化社會嘅嚴重社會問題，同樣都有意見表示，低生育率可以解決人口過多嘅問題。
雖然兩種意見都有佢嘅道理，但最重要嘅都係打造一個無論生唔生仔都可以生活都幸福愉快嘅環境。為咗達成呢樣嘢，無論係制度、意識、社會意識定係文化都應該要有所變化。大家又有咩意見呢？歡迎留言同我哋分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
