logo

Personal Colour介紹

點解人人都適合嘅髮色,去到我身上會變得咁老土?一齊嚟睇吓近幾年喺韓國好紅嘅Personal Colour到底係咩概念啦!

네사
3 years ago

Hello,大家好,我哋係由韓國人每日提供最新韓國旅行資訊嘅Creatrip


英國臨床心理學家Linda Blair曾經提出「七秒理論」,意思係話第一印象只係喺雙方見面嘅頭七秒就會形成。雖然大部分人都會相處過先會評論一個人嘅好壞,呢個理論或者會聽落太誇張,但實際上亦的確有場合唔會容許我哋有足夠時間去表現自己嘅內在美,例如面試同相睇等等,都好難免俾人只係用外表就去定義咗我哋個人係點。

呢個時候我哋嘅衫、妝容、髮色同飾物等等嘅顏色就會變成評價嘅重要指標啦,而搵同我哋嘅膚色最夾嘅顏色嘅一個色彩學理論就係「Personal Colour」啦。

著重個人形象嘅韓國,喺呢幾年都掀起一陣熱潮,有好多藝人同 youtuber都會去測試自己嘅personal colour係乜嘢。Personal colour雖然每個人都有啲唔同,但佢都係一個相當有趣嘅理論,今日就等小編同大家介紹佢究竟係乜嘢啦!



Personal Colour嘅介紹

惠利YouTube


透過放上唔同顏色嘅布,留意面上嘅顏色變化、例如膚色有冇均勻咗,黑眼圈或者暗瘡印之類嘅色素有冇睇落深色咗等等,去判斷一個人嘅personal colour係咩。



幾個色彩嘅基本概念

喺介紹Personal Colour之前,我哋首先要知道幾個關於色彩的基本概念。

冷暖色 (Warm/ Cool Tone)


冷暖色應該好多人都有聽過,簡單嚟講就係黃色/紅色的比例越高就接近暖色調,藍色嘅比例愈高就接近冷色調 ,所以一般嚟講,俾人溫暖熱情感覺嘅黃色、橙色同紅色等等就會係暖色調,俾人冷酷寧靜感覺嘅藍色、紫色同綠色等等就會係冷色調。



只不過冷暖色調重點係睇顏色嘅比例,所以視乎每種顏色入面暖色同冷色嘅比例,所以每一種顏色都可以有佢相對嘅暖色同冷色。


明度 (Brightness)同彩度/包和度 (Saturation)


至於明度同彩度/飽和度,簡單嚟講就係分別代表顏色嘅光暗程度同埋鮮艷程度啦。 根據以上呢幅圖,縱軸嘅明度越高,代表白色嘅比例越高;明度越低代表黑色嘅比例越高。而橫軸嘅彩度, 彩度越高就代表越接近鮮艷嘅純色(不含黑白色); 相反彩度越低就代表越混濁嘅顏色啦(混合咗黑,白色)。



咩係Personal Colour?

上面亦有提到,personal colour係代表最適合我哋膚色嘅顏色 。呢個理論係由美國學者提出,後來傳入日本之後,日本學者將再佢改良為適合東洋人嘅顏色系統「pccs」, 所以有部分韓國可以測試personal colour嘅地方都會用日本嘅pccs系統,事實上亦都係日本嘅pccs系統會比較適合我哋嘅膚色。


pccs系統


不過亦都正正因為有兩大系統, 而且有啲韓國嘅personal colour專家更加會自己設計一套系統,加上每間personal colour測驗機構用邊個系統都係視乎佢吁哋自己嘅選擇,所以真係要研究嘅話會發現,有好多唔同嘅分類方法(8分類/12分類/16分類等等),就算係同一種類都會有好多唔同嘅名稱,真係非常之混亂。

不過無論係咩分類法,其實都係根據上面提到嘅三個概念再做延伸,今日就同大家介紹比較簡單同多人用嘅八大分類啦。



Personal Colour 八大分類

Personal Colour最簡單可以以冷暖色分為Spring Warm(봄 웜톤), Summer Cool(여름 쿨톤), Autumn Warm(가을 웜톤)同Winter Cool(겨울 쿨톤)。

 

 

1boon

四季分類嘅特徵(左至右,上至下為春夏秋冬) 


sbs news

四季嘅代表顏色 (左至右:春夏秋冬)




Spring Warm (봄 웜톤)

Spring warm意思係彩度高,明度高嘅暖色,佢亦可以細分為Spring Light(봄 라이트)同Spring Bright(봄 브라이트)。呢一type嘅共同之處係適合啲有光澤同唔濃嘅妝感,黑髮同彩度太低嘅mlbb玫瑰色或者nude色都唔太適合佢哋,佢哋俾人嘅感覺係「果汁相」、「可愛」同「清純」!



Spring Light (봄 라이트)


Spring light嘅代表人物有少女時代嘅潤娥,呢type嘅朋友適合高明度嘅pastel tone等等可愛嘅顏色,但會好唔適合啡色系嘅濃妝。有光澤嘅底妝,冇咩妝感就最適合佢哋啦,代表人物仲有Sulli同宋慧喬等等!(同小編哈哈,但鐘意冷色系同深色系,而都唔適合有光澤妝感嘅小編一直唔肯面對現實中..😭)



Spring Bright/Clear  (봄 브라이트, 클리어)

1boon

(IU 最佳造型)

(IU 最差造型)



Spring bright,亦都會稱為Spring Clear,佢嘅代表人物有IU、Suzy同Red Velvet嘅Joy!呢個type嘅人最適合啲sharp嘅橙紅色唇色同深啡髮色啦!Spring bright比起spring light更適合鮮艷同接近原色嘅顏色,所以會再俾人一種清純又時尚嘅感覺!


(Suzy 最差 vs 最佳造型)



Summer Cool (여름 쿨톤)

呢type適合彩度低,明度高嘅冷色,可以再分為Summer Light(여름 라이트)同Summer Mute (여름 뮤트),呢type俾人嘅感覺係「清純」、「高貴」同「優雅」。佢哋唔適合嘅顏色有啡色同橙色等等,化啲啡色系或者太濃嘅妝會令佢哋望落老土,適合嘅顏色有粉紅色同明度高嘅pastel tone,例如好似土多莓梨奶一樣嘅淺粉紅色佢哋都carry到!



Summer Light(여름 라이트)




Summer light嘅代表人物有孫藝真、少女時代太妍同TWICE多賢。呢種高明度,乾淨,透明嘅顏色就最適合呢type嘅人啦!對於呢type人嚟講,最啱就係自然嘅黑髮/啡黑髮色啦,太暖嘅啡髮反而會顯到個人好老!着衫嘅話,比起啡色或者紅色同橙色,會更適合灰灰藍藍嘅pastal tone冷色同白色。花花裙或者公主袖恤衫都會好襯佢哋。


(孫藝真最差 vs 最佳造型)


(太妍最佳 vs 最差造型)


淡妝同啡黑髮會係佢哋最好睇嘅造型,太暖嘅顏色或者太濃妝嘅話,Summer light嘅人會睇落暗黃啲。ㅠㅠ



Summer Mute(여름 뮤트/ 소프트)


(全智賢最佳 vs 最差造型)


Summer Mute亦稱為Summer Soft,代表藝人有金泰梨、湯唯同全智賢等等,Mute同一般Summer Cool嘅分別係,佢哋會更加適合啲低彩度嘅顏色!灰色比例高,或者冷色調嘅mlbb玫瑰色都會特別適合佢哋!


(金泰利最佳造型)


Autumn Warm (가을 웜톤)

Autumn Warm係彩度低,明度低嘅暖色,可以細分為Autumn Mute(가을 뮤트)同Autumn Deep(가을 딥)。呢type人適合黃色,啡色,卡其或酒紅等等嘅顏色,而且會適合濃妝,仲有霧感嘅底妝同唇妝,濃少少嘅妝喺佢哋身上都唔會顯到好誇張!所以可以俾人一種「成熟」同「Sexy」嘅感覺。


Autumn Mute/ Soft(가을 뮤트/ 소프트)

(李聖經最差 vs 最佳造型 )


Autumn Mute亦稱為Autumn Soft,代表藝人有BLACKPINK Jennie、ROSÉ,韓孝珠,朴信惠同李聖經等等。一樣作為mute tone,呢個type都好適合啲灰灰哋嘅低彩度顏色,不過佢同Summer Mute唔同嘅係,比起冷色,呢type會更啱暖啲嘅色。不過太暖、太冷、太深、太鮮艷、太濃妝都會令佢哋望落有老土,中間明度嘅顏色就最能夠表現到佢哋本身嘅魅力出嚟啦。


(韓孝珠最佳造型)



Autumn Deep/ Dark (가을 딥/ 다크)

(李孝利最佳 vs 最差造型)

Autumn Deep亦都稱為Autumn Dark,代表人物有李孝利同申敏兒等等。Deep tone意思係低明度嘅色系,佢哋好適合啲深色系嘅色,奇其、朱古力色深紅酒紅色同墨綠色等等都會好襯佢哋,冷衫大褸亦會着得好好睇,連一啲復古嘅style都可以消化!不過就要小心啲明度太高嘅白色同pastal tone啦,太冷調嘅髮色同鮮艷嘅顏色都唔太襯呢type人。


(申敏兒最佳造型)



Winter Cool (겨울 쿨톤)

Winter Cool係指彩度高,明度低嘅冷色,可以細分做Winter Bright(겨울 브라이트)同Winter Deep(겨을 딥)。唔適合太暖太溫柔感覺嘅佢哋,會非常適合彩度高嘅鮮艷顏色,佢哋同Spring Bright一樣好適合接近原色嘅顏色,所以亦都會好容易就carry到人稱「死亡Barbie粉」嘅桃紅色添!呢type人嘅關鍵字有「冷酷」同「Sexy」等等。不過呢type最重要係有對比,例如着黑色嘅話,最好同白色一齊着,顏色對比越大最越表現到呢個style嘅魅力啦!



Winter Bright/ Clear (겨울 브라이트/ 클리어)


Winter Bright亦都稱為Winter Clear,代表藝人有宣美同請夏,可以睇到無論係色彩繽紛加大紅唇,定係接近原色咁sharp嘅顏色喺佢哋身上都唔會覺得好怪,反而係好適合佢哋添!呢type嘅人好適合着得好華麗同好Sharp嘅高彩度顏色,特別藍色同黑白色都係會顯得佢哋最靚嘅顏色。



黑色雖然係Winter bright最適合嘅髮色,但相信大家都睇得出太暖調嘅妝容同暖啡色真係唔太適合佢,呢個造型連顏色對比都唔夠添。ㅠㅠ



Winter Deep/ Dark (겨울 딥/ 다크)

(文瑾瑩最佳 vs 最差造型)

(金憓秀最佳 vs 最差造型)


最後係Winter Deep,亦可以稱為Winter Dark,代表藝人有泫雅、文瑾瑩同金憓秀等等。呢type最適合低明度低彩度嘅顏色,酒紅同布冧色都會係顯到佢哋最好睇嘅顏色,適合強烈對比顏色嘅Winter deep,着起黑白色嘅西裝look會比任何人都更加適合。比起太花嘅裝扮,除咗西裝,只要對比做得好,就連最簡單嘅casual look佢哋都會着得好好睇!

 


對呢type嚟講,太暖或者混合得太多白色嘅高明度顏色都會有啲顯老,可以見到右邊只係膚色同黑色做對比,都令到咁簡單嘅背心好睇過左邊MV嘅造型。


以上就係一啲關於personal colour嘅介紹啦!唔知會唔會太複雜呢?不過小編已經盡量解釋得好簡潔,希望可以幫到大家認識personal colour呢個概念啦!

不過都想提醒一句,以上呢啲藝人嘅personal colour都有機會有啲偏差,因為就算係專家判斷都好,佢哋好多時都只係透過網上大量嘅相去判斷,冇得肉眼睇,所以點都有機會錯,而且好多人分析都用造型多變嘅女藝人,所以亦好可惜咁用唔到男藝人做例子..

同埋personal colour就好似mbti咁,全世界咁多人都冇可能只係得8個10個種類,好多時候其實測出嚟係幾個type都適合,但最後揀最相似嘅一個做結果。仲有雖然有啲人的確會好受色調(冷暖)影響,但其實更多人都係比較受明度或者彩度影響,所以好多人都有機會係幾種type加埋!就好似小編咁計,雖然check過係spring light嘅type,但小編唔算係特別受冷暖影響嘅人,反而比較受明度或彩度影響,變咗只要係明度高嘅顏色甚至去到summer light都ok!

所以重要唔係自己或者藝人個type係咩,而係搵出可以令自己更加突出,而唔會暴露自己缺點嘅顏色,小編覺得咁先係最重要!遲啲有機會非常推薦大家去check一次personal colour啊!大家睇完呢篇介紹又覺得自己係邊一type?歡迎同我哋分享!




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代購

熱門文章

LoadingIcon
熱門文章