Hello，大家好，我哋係由韓國人每日提供最新韓國旅行資訊嘅Creatrip。
韓國好流行MBTI，但大家又知唔知道韓國人都好信血型？有啲人甚至會視佢為求偶標準之一添。今日就等小編嚟同大家解釋吓點解佢哋會咁迷血型啦！
韓國人對於血型嘅迷信
第一次見面嘅韓國人，佢哋除咗會打招呼同問一啲基本問題之外，仲好大機會會問血型係咩，因為有部分韓國人深信，只要知道血型就可以大概知道對方嘅性格係點，所以佢哋先會覺得知道對方血型係必須嘅。就好似韓劇《Start Up》入面，當女主角問男主角信唔信血型，就算男主角唔信都要答信，以免得罪女主角，就咁睇大家就可以發現，韓國人仍然好信血型，特別係女性。
韓國人對血型迷信嘅開始
喺1970年初，日本作家能見正比古出版咗一本講述血型同性格之間嘅關係嘅書，當時呢個理論喺日本非常之受歡迎，紅到連食物、衣著同教育方面都有同血型相關嘅產品出現。後來呢個理論更傳入韓國，令唔少韓國人都開始相信血型同性格有關，直到100年後嘅今日，佢哋仍然影響住唔少韓國人，而家嘅日本同韓國都仲係好信血型嘅國家。
雖然目前都仲係未有科學根據支持血型同性格有關聯呢個理論，但韓國人都仲係好信血型。因為血型而家已經融入咗韓國文化嘅一部分，好多人都會攞嚟當傾偈話題。就嚟唔少歌都有用過血型嚟做主題，例如f(x)嘅NU ABO同PSY嘅인생극장 A형, 인생극장 B형 （人生劇場 A型，人生劇場 B型）等等。同時亦有20至30%未婚人士同相睇公司表示，佢哋最想避免嘅係B型嘅人，第二係AB型。
對於好多韓國人嚟講，對血型迷信就等同宗教信仰一樣，唔需要所有人都相信，而都唔洗強逼自己相信，不過對於啲相信血型嘅人，就深信血型會影響性格，仲會因為咁而影響配偶嘅選擇添。
以上就係韓國人對血型迷信嘅原因啦，唔知大家又信唔信血型呢？歡迎留言話我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk