世越號事件回顧
世越號事件係韓國人民嘅共同傷痛...到底世越號嘅真相又係點？
Hello，大家好，我哋係由韓國人每日提供最新韓國旅行資訊嘅Creatrip。
今日（4月16號）係所有韓國人一生都無法遺忘嘅日子。十年前嘅今天發生咗韓國歷史上最嚴重嘅船難事故，令全世界都非常震驚。到底呢件事嘅來龍去脈係點，過咗十年之後又到底有冇真相大白？
世越號事件回顧
2014年4月16號，載滿檀園高中學生嘅世越號由仁川港出發去濟州島舉辦畢業旅行，途中不幸發生事故，船隻沉沒，造成304名人員死亡。
當時因為船隻工作人員叫完學生著救生衣同原地不動等救援之後私自逃跑，海警喺接獲報案後亦並未做出積極救援行動，甚至以危險為理由，阻止民間救援接近。最後世越號喺眾人同媒體眼前慢慢沉沒，船艙入面嘅300幾個人亦隨住世越號沉入大海而不幸身亡。
路透社
而生還嘅100幾個學生當中，有一般以上都係喺最後先離開到船艙、跳海求救甚至係被水流衝出船外後被救起。事後佢哋亦都抨擊政府同船員根本冇積極協助乘客逃生，更加有人覺得「學生係被政府殺死嘅」。
當日8點49分，世越號因為急轉彎造成船體偏移，側倒入海，開始下沉。
8點52分，有個學生打電話報案（呢位學生最後不幸罹難...）；去到8點55分，船員發現事情嚴重性先再報案，而等待救援過程中船長仍然要求學生唔好郁，要留喺船艙入面。呢個船長甚至喺9點46分棄船逃生，自己逃生前亦也都冇同學生講自己會離開船艙。所以當事發海域附近嘅船隻靠近世越號試圖救援嘅時候，幾乎冇人喺甲板，全部都仲留喺船艙，等待冇可能會聽到嘅船長逃生指令。
KBS
最後海水衝破船隻，世越號平倒於海面，逐漸下沉。雖然有部份學生喺先前早已逃出，不過多數人喺意識到船隻已經完全被海水灌入嘅時候先試圖逃生，不過已經嚟唔切。
好多媒體報導入面也都傳達咗罹難者離世前留俾親友嘅最後一段文字同影片，每次睇到都會令人深感遺憾。
新華社
除咗政府救援不力，前任韓國總統朴槿惠甚至喺意外發生8個鐘頭之後先露面。另外當時韓國政府亦不停釋放虛假資訊，表示盡力進行緊救援，但係最後都被現場家屬同部份媒體揭露為假消息。實際上，當時喺世越號啱啱沉入水入面（理應船艙入面仍然有部份空間未入水）嘅時候係最後嘅黃金救援時間，不過現場海警阻止咗民間搜救企業接近。
EBS
最後喺事發三天後，救援先正式開始，遺憾嘅係海底下嘅世越號並冇發現任何一名生還者。喺長達200幾日嘅搜索後，喺海底發現咗299名罹難者，當中有235具遺體都係著住救生衣，但冇辦法即時逃出。
被打撈上岸嘅世越號
呢件事引發全韓國人民嘅傷痛同憤怒，亦都成為時任朴槿惠政府下台原因之一。不過最後世越號船長被判無期徒刑，其他船員就被判刑1年半至12年嘅有期徒刑，海警等瀆職造成嘅過失致死全部被判無罪... 罹難者家屬就認為除咗船公司之外，政府需要負起最大責任，同時釐清意外發生嘅前因後果。
呢十年以嚟，韓國人民同罹難者家屬仍然要求政府對世越號沉船真相進行調查。只不過非常遺憾地，即使經過9次調查，最後仍然無法為呢件事件畫上一個句號。有唔少人都表示係因為調查小組同機關並非政治中立，而且調查官亦唔係專業人士，就算換過人都無補於事。
每年今日，罹難者就讀嘅安山高中所在嘅安山市、事發地珍島一帶、世越號目的地濟州，以及韓國各地都會紛紛掛上代表著悼念意義嘅黃絲帶，證明即使事件已經過去一段長時間，大家也仍記得呢份傷痛，亦永遠唔會遺忘。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
