Hello，大家好 ，我哋係由韓國人每日提供最新韓國旅行資訊嘅Creatrip。
喺韓國，每一個小區都至少有一間或以上嘅便利店，韓國便利店以低廉嘅價格，就可以買到各種美味零食同方便食品，所以真係好受歡迎！
特別係CU、GS、7-ELEVEN等韓國便利店公司每月都會推出好食、新穎嘅新產品。 小編會由呢個月開始每個月親自試一試便利店嘅新品介紹俾大家，咁而家就事不宜遲即刻為大家介紹4月便利店嘅新商品！
韓國4月便利店人氣新商品
CU便利店
1. Protein 薯片
價格：2000韓幣
最先介紹嘅新品係CU推出嘅蛋白質薯片，睇佢個名就可以知道，係含有11g蛋白質嘅健康薯片，再加上冇油炸，而係用熱力同壓力烤制，所以對於減肥嘅人嚟講，呢款係最佳零食。
其實小編因爲蛋白質薯片呢個名，以為味道會好清淡健康！不過呢一款薯片好唔同，食過嘅人都話好食。
用甜鹹嘅味道調味，好多人仲話可能係用雞胸肉做，所以就感受到韓國好受歡迎嘅醬油味炸雞味，就算唔係減肥嘅人都可以食嘅健康食品，小編真係超級推薦。
2. 故鄉餃子薯片
價格：1500韓幣
喺之前介紹過韓國好流行嘅特色合作食品，而今次介紹嘅故鄉餃子都係特色合作產品之一。
故鄉餃子係20世紀80年代製作嘅冷凍餃子產品，實際上可以話係韓國最早嘅元祖冷凍餃子！
呢款產品就係佢哋嘅餃子同薯片相遇，有泡菜餃子味同肉餃子味，最近人氣超高，好多地方都斷晒貨。
小編覺得呢款薯片真係好適合喺屋企飲酒嘅時候，拎嚟做下酒菜，邊食邊飲酒真係一大享受。
3. 年糕艾草三文治
價格：2800韓幣
艾草同紅豆都係韓國傳統嘅食材，以前主要係用艾草同紅豆做年糕， 不過最近用艾草同紅豆製作嘅特色甜品亦都越嚟越多，而且都好受歡迎，好多韓國人稱佢做「奶奶口味」嘅零食！
呢款產品係喺好鬆軟嘅牛奶麵包入邊加入年糕、艾草同紅豆嘅三文治，咬一啖鬆軟牛奶麵包之間嘅香甜忌廉味，再加上煙煙韌韌嘅艾草，用嚟做下午茶真係一流。
GS25便利店
1. 龜兔薯片（朱古力玉桂棒味）
價格：1200韓幣
最近喺韓國最有人氣嘅零食之一就係烏龜殼薯片，好多人都認為呢款就係模仿本身好有人氣嘅嗰款零食。
兔子同烏龜殼係由四層好薄嘅餅乾組成，稍微鹹啲啲嘅餅乾底上面塗上甜甜嘅朱古力，可以同時感受到甜味同鹹味！
雖然呢款都係好好食，不過有好多人認為都係冇辦法同元組龜殼薯片相比，不過小編都覺得可以試，因為佢嘅味道真係幾特別。
２. 辣椒醬烤牛肉漢堡
價格：3800韓幣
大家知唔知道韓國嘅便利店其實仲會賣漢堡包呢？便利店買嘅漢堡包只要放喺微波爐加熱就可以即刻食，GS25喺4月就推出咗大尺寸辣椒醬烤牛肉漢堡，所以小編都買咗嚟食。
佢入面嘅材料好簡單，漢堡包中間有用牛肉做嘅肉餅、醃菜、甜甜嘅醬汁，再加上韓國傳統嘅辣椒醬，係好啱韓國人口味嘅漢堡包。
尺寸都比其他便利店嘅漢堡包大，所以當正餐食都好夠飽肚。
3. 朱古力軟糖蘋果味
價格：2000韓幣
包裝係唔係好可愛呢？ 包裝上畫嘅奶牛形狀就係韓國人氣糖果「Marlangcow」嘅吉祥物Marlang。
製作軟糖嘅公司呢次推出咗朱古力軟糖，有蘋果味同士多啤梨味，小編就買咗蘋果味。
打開佢牛奶盒形狀嘅包裝袋之後，有好多細嘅朱古力波。食嘅時候有啲似係香港買到嘅明治朱古力。
7-11便利店
1. 米丁堂Rose辣炒年糕
價格：2900韓幣
以擅長做炒年糕而聞名嘅品牌米丁堂推出咗同7-11製作嘅辣味忌廉炒年糕，一聽到佢出呢個新產品，小編個心入面即刻諗一定要食到！最近喺韓國，辣椒醬加忌廉做嘅炒年糕真係好流行。
製作方法好簡單，打開蓋之後，將年糕同醬汁全部放入杯入面，將熱水倒到去線位之後，喺微波爐叮3分鐘就得，之後再放芝士片落去就搞掂。
雖然佢個名入面有辣味呢兩個字，不過食落真係一啲都唔辣，推薦俾啲食唔到辣嘅朋友。
不過亦都因為係咁，所以好多人都對佢有少少失望，因為冇一種辣椒醬加忌廉嘅感覺，只係似普通嘅芝士炒年糕。
2. 炸醬拉麵洋蔥圈
價格：1500韓幣
炸醬拉麵洋蔥圈同之前介紹嘅故鄉餃子片都係特色合作食品！ 韓國嘅老牌零食洋蔥圈同出名嘅炒炸醬拉麵相遇，成爲炸醬薯片！
打開個袋都就會發現比原版洋蔥圈稍微黑一啲， 食落去第一啖同一般洋蔥圈嘅味道相似，不過越食就越可以食到炸醬拉麵嘅味。韓國人食炸醬麵嘅時候都會成日配洋蔥一齊食，所以味道真係好夾，不過小編略嫌覺得佢味道有啲太淡，如果再濃味少少嘅話會更加好食。
3. Whatta Jaman Loopy
價格：500韓幣
呢款產品叫Watda Jumang Loopy嘅香口膠！ Watda係韓國老牌嘅香口膠牌子，佢同人氣角色Loppy（Pororo入面其中一個角色）一齊合作！最近喺韓國，利用佢製作嘅搞笑動圖真係超級流行！
每個香口膠都畫咗可愛Loopy，聽講呢款香口膠上面有超過60款唔同造型嘅Loppy圖案，而香口膠係好味嘅菠蘿口味！ 唔會太甜，食落好清爽，令到小編一直食到停唔到口。
食完香口膠之後，仲可以將佢嘅糖紙搣落嚟，佢就會好似貼紙咁，可以貼去大家想痴嘅地方，呢個發明都幾神奇。
以上就係韓國便利店四月嘅新產品，如果大家都鍾意呢類型嘅介紹，不妨留言話俾小編知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk