12個韓國人對戀愛嘅迷信
為咗初戀要染紅啲指甲？結完婚個花球要放乾100日後仲要燒咗佢？究竟韓國有啲咩新奇有趣嘅迷信呢？
Hello，大家好，我哋係由韓國人每日提供最新韓國旅行資訊嘅Creatrip。
每個地方都會有自己獨有嘅傳統，對於某啲事亦都會有自己嘅迷信。就例如我哋香港人會睇風水同拜黃大仙等等，都係我哋嘅迷信同文化嘅一部分。雖然唔係所有人都信，但如果某啲事發生之後，總會無意識咁覺得，「啊，好彩嗰時有拜一拜。」/「果然XX係真㗎。」之類，會有種「寧可信其有，不可信其無。」嘅諗法。
不過你又知唔知喺韓國同樣有好多迷信？今日就等小編介紹韓國人對戀愛嘅迷信啦！
韓國嘅迷信
1.첫 눈 올 때 손톱에 봉숭아 물이 남아 있으면 첫사랑이 이루어진다
（只要喺初雪來臨之前，冇剪走用鳳仙花染色嘅指甲嘅話，就會同初戀對象有好結果。）
喺韓國用鳳仙花嘅水嚟染指甲係一樣細個成日玩嘅遊戲（？）。
顧名思義就係將鳳仙花當成染料再搽喺指甲上面，喺你剪指甲之前，佢會一直都唔甩色，再加上佢係用花所製成嘅天然安全染料，橙紅色又夠哂可愛，所以呢個係好受小朋友歡迎嘅活動。
就好似啱啱所講，直到剪指甲之前顏色都會留喺指甲上面，所以真係有人為咗同初戀有好結果，喺初雪之前點都會留番少少染咗色嘅指甲唔剪哈哈。最近喺韓國DAISO都有得買類似嘅染料，有興趣嘅人之後都可以買嚟玩吓啊。
2. 연인에게 신발을 선물하면 도망간다
（如果買鞋俾戀人嘅話，對方就會逃走）
華麗的誘惑
如果話禁止買俾戀人嘅禮物咩係第一名嘅話，就一定係鞋啦。喺韓國如果送鞋俾戀人嘅話，對方就會着住嗰對鞋逃走呢個講法，所以韓國嘅鞋業最近會宣傳話，「買鞋俾戀人先可以帶佢去好嘅地方。」 ，試圖改變大眾嘅諗法。
但感覺上仲係好多韓國人會因為呢個講法而唔會買鞋俾戀人哈哈。
3. 덕수궁 돌담길을 애인과 걸으면 헤어진다
（同戀人一齊行過德壽宮嘅石牆路就會分手）
首爾嘅五大古宮之一嘅德壽宮，位於市廳、 明洞同光化門附近，相信好多人都有去過。德壽宮旁邊嘅石牆路種咗好多樹，環境優美，天氣好嘅時候係非常好嘅散步地點。只不過戀人之間係唔可以一齊行呢條路㗎！會咁講嘅原因主要有兩個講法，一係因為呢條路附近係專打離婚訴訟嘅家庭裁判所，所以想要離婚嘅男女都會經過呢條路。而第二就係呢條路充滿古時受到冷落嘅宮女嘅怨恨，如果戀人行過呢條路就會受宮女詛咒。
所以大家嚟韓國玩就最好唔好編去德壽宮啦（？）😂
4. 첫사랑은 이루어지지 않는다
（同初戀係唔會有好結果）
呢個小編覺得係幾有說服力嘅講法，因為實際上真係唔多人可以同初戀拍拖拍到長大成人後組織家庭。現實中韓國嘅話有入伍問題，亦都可能係家人反對等等，令一對戀人冇得長久。
不過唔可以否認嘅係，好多人都對當年純真嘅初戀有美好嘅回憶。
5. 헌신하다 헌신짝 된다
（犧牲奉獻到一半就會變成廢物）
之所以話呢個係迷信係因為呢「헌신」同「헌신짝」兩個字係相似嘅。如果你對戀人犧牲得太多，對方會當成係義務而唔識感恩，咁你就會慢慢被當成廢物咁拋棄。
小編覺得係同現代社會好貼切嘅講法，除咗適用於戀人關係，亦都適用於成日加班嘅打工仔。
6. 열 번 찍어서 안 넘어가는 나무 없다
（冇樹會斬十下都唔冧）
呢句意思係，只要你嘗試好多次，咁最終都會實現。換句話講，姐係你追一個理想嘅對象，就算佢一開始唔接受，但只要不斷嘗試，最終對方都會接受你嘅心意。喺呢個世代，一個會不斷努力嘗試，唔會輕易放棄嘅人確實值得稱讚，之但係放落戀愛嘅情況，如果對住一個人表白太多次，同樣亦都有機會令對方感到煩厭，所以適當嘅嘗試先係最重要。
7. 부케 받고 6개월 안에 결혼해야한다
（搶到新娘花球後需要６個月之內結婚）
婚禮入面其中一個重要環節可以話係搶花球環節啦，通常搶花球嘅都會係新娘嘅朋友，或者係下一個有結婚計劃嘅人， 呢一點韓國同香港都係一樣嘅。之不過韓國人相信接到花球嘅朋友要喺六個月內結婚，唔係就會未來三年內都結唔到婚。據講呢個係由外國傳入嚟有關結婚嘅迷信，但好多韓國人都好相信呢樣嘢，所以佢哋會索性直接掉花球俾已經定好會結婚嘅人。
8. 부케는 100일간 말려서 태워라
（花球需要放乾100日再燒咗佢）
最近好多夫婦都會為結婚特登訂制花球，所以搶到花球嘅朋友，好大機會會將花球還番俾新人。韓國人相信攞番花球之後，需要放乾一百日之後再燒咗佢，咁樣先有效維持良好嘅夫婦關係。
不過聽講有唔少新婚夫婦都為咗良好嘅婚姻關係，相信呢個迷信將花球放置100日，但大部分都因為唔捨得而燒唔落佢。
9. 아홉수에 결혼하면 안 된다
（逢九數唔可以結婚）
九數意思係以9結尾嘅歲數，姐係19，29，39歲等等，韓文稱之為아홉수。韓國人會覺得9係一個唔好運嘅數字，所以先會出現咁嘅迷信。
結婚係個新開始，而九數則會帶來不利，不過最近新一代已經越來越少人care呢件事啦。
我們結婚了第4季
10. 4살 차이는 궁합도 안 본다
（相差四歲就唔使睇八字）
韓國係特別對年齡敏感嘅民族，例如佢哋會用年齡嚟睇時辰八字推測運勢。所以新婚夫婦同樣會好在意年齡差異嘅問題，而韓國人認為夫婦之間四歲就係最啱啱好嘅年齡差啦。
演藝家中介
佢哋認為夫婦不論年下年上，都係4歲差異最為適合， 據講呢個講法係來自於生肖之間嘅相性問題。
11. 비오는 날에 결혼하면 잘 산다
（落雨嘅時候結婚之後會生活得好）
大部分人都選擇喺天氣好嘅時候結婚，但韓國人就相信落雨嘅時候結婚會令之後夫婦關係更加好。 原因係落雨會令土壤肥沃，從而得到更加豐盛嘅農作物，保障以後嘅婚姻生活。亦都有人話呢句只係攞嚟安慰一啲冇辦法要喺陰天舉行婚禮嘅新人嘅說話。
12. 칼과 도마는 시어머니가 선물한다
（奶奶會送刀同砧板 ）
最後介紹一個好古舊嘅迷信，以前嘅年代女性掌管所有家務係理所當然嘅事，所以廚房用品都係絕對嘅「女性用品」。奶奶送廚房用具俾新抱，代表要佢為咗老公留喺屋企做家務，同切斷自己同本身屋企嘅關係嘅意思。
以上就係12個韓國有關戀愛嘅迷信啦，大家有聽過邊個呢？覺得最有趣嘅又會係邊一個？歡迎留言話俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
