韓國人嘅「100日」文化
韓國人點解咁鐘意慶祝100日？100日對佢哋嚟講有冇意思？除咗拍拖紀念100日之外，軍隊都有100日嘅文化？
Hello，大家好，我哋係由韓國人提供最新韓國旅行資訊嘅Creatrip。
大家應該熟悉韓國文化的話，都知道韓國情侶好注重100日，100日一定會去慶祝。咁大家又知唔知，韓國仲有好100日紀念日同活動？今日小編就想同大家講吓韓國嘅100日文化。
韓國人嘅「100日」文化
情侶100日紀念日
공감신문
情侶100日紀念日一定係最為人所知！同香港嘅紀念日文化好唔同，香港雖然都可以一個月一個月咁計，不過情侶慶祝通常都係一週年兩週年咁去慶祝。唔會好似韓國人咁會三個月多少少就會去慶祝一次。無論係100日定係200日，反正每逢「100日」，就會去「放閃」。
小編個人覺得韓國情侶咁鍾意用100日去計紀念日嘅原因係同小朋友搞百日宴好相似，情侶紀念交往100日，就可以慶祝彼此感情歷經前期嘅考驗，逐漸穩定發展。
百日宴
Dispatch
喺以前韓國衛生醫療生活水平唔太好，好多BB出生唔夠100日就過世。為咗慶祝BB出世之後平安度過100日，喺第一百日嘅時候就會舉辦「百日宴」（백일잔치/돌잔치），幫BB著新衫、搵埋親朋戚友一齊過，而且父母通常會準備豐盛嘅食物同2種以上嘅年糕，最傳統嘅話有白雪年糕同紅豆年糕。白雪年糕係用糯米粉做嘅白色年糕，白色代表純潔同聖潔，祝願孩子長命百歲同平安無病，用紅豆粉做成嘅紅豆年糕係有闢邪嘅作用。
喺嗰日仲會祭拜三神，傳統認為三神係掌管BB出生同成長嘅神。雖然而家香港都比較多咗人去舉辦百日宴，不過傳統都仲係滿月酒。
考大學入學試必定會飲百日酒
Wikitree
每個國家都有自己獨特嘅偏方去求考大學入學試有好成績，喺香港可能就係會去文武廟拜神，求有好分數。而喺韓國佢哋會喺距離大學入學試100日嘅時候飲「百日酒」，因為佢哋相信飲百日酒，會為考試帶嚟好運。一口氣飲完的話，意味住可以一下就入到大學，飲百日酒已經成為咗喺考試前舉行嘅慣例。
有啲考生嘅父母甚至會直接為自己嘅仔女準備百日酒，所以喺高考淨返100日嘅時候，好容易會見到喺街上有好多高三嘅學生飲醉。
入軍隊嘅第100日休假
YTN
韓國男仔係一定要入軍隊應該大家都知道，而佢哋入軍隊嘅第100日就會有個新兵慰勞休假。100日休假嘅由來係喺2008年前入伍嘅人，喺當兵滿100日左右就會俾嘅休假，可以喺晉升為一等兵後嘅２個月之後用。而家嘅「新兵慰勞休假」係指，由新訓結業式結束之後起大概3個月之後可以用嘅4日3夜休假。嚴格嘅訓練同陌生嘅生活環境都令新兵身心疲憊，熱切盼望住第100日休假，聽講好多人每一日都倒數住休假嗰日。
新兵都會用各種唔同嘅方式去享受佢哋第一次嘅休假，例如同屋企人過，同朋友飲酒狂歡或者把握同女朋友見面嘅機會，盡情享受出面嘅自由空氣。
以上就係韓國人嘅100日紀念日，唔知道大家又有冇同感呢？相反香港真係好少有一百日紀念日呢樣嘢，大家如果仲知道有其他100紀念日的話，歡迎留言話俾小編知。
如果有更多想知嘅內容，都可以隨時留言或者dm話俾我哋知：）
Mail：help@creatrip.com
