Hello，大家好，我哋係由韓國人每日提供最新韓國旅行資訊嘅Creatrip。

踏入4月，唔止香港熱咗好多，就連韓國都回暖咗唔少。睇見夏天就快到，或者有好多留長頭髮嘅朋友都會開始擔心啦，嚟緊夏天將會每日出好多汗，而自己唔捨得剪咗把頭髮佢，但又懶得每日洗頭...（唔好心虛就係講緊你哈哈）

冇洗頭嘅時候，大家或者都會知道韓妹最普遍嘅做法就係拍啲定妝控油散粉上頭頂，或者係用乾洗噴霧等等。假設你係連咁都懶得搞嘅話，都唔洗擔心！今日小編就嚟介紹4個韓妹喺唔洗頭嘅時候最常整嘅髮型，快啲嚟學吓嘢啦！

4種適合夏天同夏天嘅髮型

1. 丸子頭

丸子頭雖然簡單，但佢可以有效遮蓋髮量少嘅問題，將個髻紮喺頭頂仲可以拉長成個頭型比例，係圓面、方面、頭頂低等等問題嘅救星！不過要注意嘅係，丸子頭一定要夠鬆散，望落先會自然同隨性，再加上一啲橡筋髮飾就更靚啦！

如果你鐘意比較溫柔成熟嘅style，亦可以試吓紮低丸子頭，再用個大髮夾固定，呢個髮型同樣好受韓妹歡迎㗎。

又或者如果鐘意特別啲嘅style，亦都可以紮兩個髻喺頭頂，係個好得意又活潑嘅髮型！

2. 鬢辮

鬢辮係好經典嘅髮型，佢就好似係髮型界嘅牛仔褲一樣，唔會因為潮流而人氣減退，無論咩時候都唔會覺得佢老士。着條碎花裙，再加鬆鬆地自然嘅鬢辮，一個適合夏天嘅look咁就完成！

如果想要特別啲嘅style，亦都可以鬢低孖辮再加頂貝雷帽，咁樣睇落好識打扮之餘，更可以掩蓋髮量唔多或者髮質薄嘅問題添！

3. 大頭箍

最近因為復古style再度興起，好多韓國藝人同年輕人都鐘意大頭箍嘅造型，復古得嚟又時尚！

唔同種類嘅頭箍，只要夠搶眼都會適合呢個look。除咗頭箍之外，頭巾亦係個唔錯嘅選擇。

4.馬尾

呢個係任何人都可以輕鬆整到亦都駕馭到嘅髮型，只要將所有頭髮都紮起嚟就可以啦。好似冇咩特別咁，但佢可以話係最經典嘅髮型，而且紮起佢嘅話夏天唔洗頭都唔會太覺眼。

同樣，想個造型再特別啲，可以加番條不織布橡筋。喺韓國，佢哋會叫呢款髮飾為「大腸橡筋」，好搞笑。

以上就係4個韓國人喺唔洗頭嘅時候會整嘅髮型啦，懶得洗頭嘅了朋友記得mark低佢，夏天試吓work唔work啦！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購