韓星揀牛仔褲嘅小Tips
揀啱牛仔褲係有秘訣！想修飾身材隱藏缺陷？跟住韓星去揀啦！
Hello，大家好 ，我哋係由韓國人每日提供最新韓國旅行資訊嘅Creatrip。
好多人嚟到韓國旅行，除咗一定會買面膜、零食、 襪等之外，唔可以唔買嘅仲有牛仔褲！好多人嚟韓國買過牛仔褲之後都返唔到轉頭，因為真係超好著，而且好顯瘦，今日就想同大家介紹韓星著牛仔褲時嘅小Tips，如果一直唔知邊種適合自己嘅話，睇完呢篇文話唔定會幫到大家！
先了解自己體型
喺揀牛仔褲之前，大家要先了解自己體型，基本上可以分為5大類，當中包括：梨型、直筒型、倒三角型、沙漏型，同埋蘋果型。
1. 男友風牛仔褲
男友風牛仔褲越嚟越多年輕人鍾意呢種風格，因為著上身好舒服，而且夠隨性。 男友風牛仔褲特點就係女裝褲，但係按照男性體型去縫製，所以睇落都會比較闊身，而且多數都會有穿窿嘅小細節。
呢種褲型優勢在於佢可以隱藏大家臀部同腿部弱點，但有一樣唔好就係睇落腳短。 所以呢種款式嘅褲，相對會比較適合沙漏型、倒三角形、直筒型。喺韓國，韓星經常會將男友風牛仔褲襯T-Shirt或露臍上身衫，之後再加件西裝外套，相當之有型！
2. 闊腳牛仔褲
闊腳牛仔褲喺韓國最近好流行，因為佢可以遮住大腿同小腿所有缺陷，不過同男友風牛仔褲一樣，都會望落腳有啲短。
如果係低腰闊腳褲，咁就唔太適合直筒型或者倒三角形身型嘅朋友。 揀高腰闊腳褲相對會最安全，因為高腰可以遮住肚腩，又可以顯腳長。上身簡簡單單襯件恤衫、露臍上身衫、T-Shirt已經好好睇。
3. 喇叭牛仔褲
由於韓國再次興起復古風，所以一定唔可以少咗一條喇叭褲。著上身可以有助於營造曲線效果，臀部望落去都挺啲。
但有樣嘢要注意嘅係，呢條褲如果身型比較矮少，著上身可能會睇落更矮，唔太建議著。 如果真係要著可以揀長度適中，而且要配高踭鞋！ 呢類褲適合倒三角形型、蘋果型、沙漏形體型嘅朋友。
4. 直腳牛仔褲
基本上每人屋企都會有一條，大多數體型嘅朋友都適合，除咗直筒型嘅朋友。直筒牛仔褲有助於睇落身型平均，隱藏小腿缺點。
因為係基本款，所以上身襯咩衫都冇問題，襯T-Shirt加件恤衫就已經好可愛同睇落有活力。
5. 貼身牛仔褲
貼身牛仔褲可以顯腳長，同時臀部睇落都挺啲，著起嚟都幾舒服，不過呢種款只適合直筒型、沙漏型同梨型嘅朋友，而倒三角型、 蘋果型嘅朋友就唔太建議。
牛仔褲非常之百搭，基本上揀啱牛仔褲再簡簡單單上身襯件T-Shirt已經好好睇，希望大家之後苦惱買牛仔褲時，呢篇文可以幫到大家啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
