Hello，大家好，我哋係由韓國人話你知每日最新資訊嘅Creatrip。
相信大家關注得kpop都知道佢哋一上綜藝節目就一定會表演個人技，有啲真係睇見都覺得好特別又好勁，不過有啲就搞笑得嚟又覺得好冇用嘅個人技，到底有幾冇用？今日小編就同大家介紹5個搞笑得嚟又冇用嘅個人技俾大家啦！
1. EXO - 伯賢
伯賢因為手指嘅柔韌度好高，所以有好多關於手指嘅個人技，而今日小編要介紹嘅呢款個人技就係4隻手指唔郁嘅情況下，淨係得無名指郁。唔知大家又可唔可以做到呢？睇到隔離KAI想學但係做唔到就知道係有啲難度，不過伯賢諗到呢個做個人技嚟講，都幾神奇又搞笑。
2. BTS - Jin
如果話伯賢係手指靈活的話，咁JIN就係腳趾好似姆指一樣咁靈活。佢嘅腳趾靈活度絕對係超過常人，之前喺綜藝節目《認識的哥哥》入面就表演過用腳趾撕包裝袋。一秒都唔洗，就咁用一隻腳固定住，用第二隻腳輕輕一撕就開到。
3. BTS - V
V有次出演綜藝節目《大國民脫口秀-你好》入面，話自己嘅個人技係「我嘅身體有大象」，之後 V就用手夾住手臂兩粒墨，嚟做成大象嘅樣，令成個廣播室笑聲連連。真係搞笑得嚟又冇乜用嘅個人技，真係好佩服V諗到，不過又真係幾可愛。
4. SHINee - 泰民
泰民嘅個人技就係可以將自己嘅雙眼皮變做單眼皮。平時大家應該都係見到其他人係由單眼皮短暫咁變做雙眼皮，好似泰民咁調返轉就真係好少見，而且佢一變單眼皮之後，真係好似變咗另一個人咁，就連佢自己都話如果佢係單眼皮的話，可能就入唔到SM。
5. EXO - D.O.
D.O.嘅個人技就係貼mon貼！小編覺得巳經係最有用嘅一樣個人技嚟，D.O.喺綜藝節目《認識的哥哥》入面就表演過貼mon貼嘅技能，真係貼得好靚好整齊！
唔知大家仲知唔知其他偶像嘅搞笑個人技呢？歡迎留言話俾小編知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk