Hello，大家好，我哋係由韓國人每日提供最新韓國旅行資訊嘅Creatrip。
衆所周知，韓國係全世界唯一分裂嘅國家，由1950年6月25號爆發韓國戰爭以嚟，一直處於冷戰狀態。實際上雖然可以話喺21世紀爆發戰爭嘅可能性好細，但係為咗應對緊急狀況，韓國就實行「完全徵兵制」。正因為係咁，韓國軍隊唔單止係對韓國人民，對全球粉絲嚟講，都係一大話題。
韓國軍隊文化
92年出生嘅BTS JIN、EXO伯賢同燦烈、MONSTA X Shownu等衆多男藝人都即將要服兵役。
咁韓國嘅軍隊到底係個咩地方呢？睇住自己細佬同身邊朋友參軍嘅韓國小編，會慢慢話俾大家知韓國軍隊文化！
軍隊係要幾時去？
就好前面講嘅一樣，韓國嘅徵兵制度係義務。 滿18週歲以上嘅人就可以去參軍，亦即係話，對於韓國男性嚟講，去軍隊係「成人禮」，同時亦都係「必須解決嘅課題」。
正因為咁，好多韓國男性喺20歲出頭嘅時候都會去服兵役，不過因為歌手或者演員2年嘅空白期對佢哋嘅影響好大，所以藝人都會盡最大限度咁推遲入伍時間，大部分男藝人都大概喺28週歲前後先入伍。
點解淨係得男人去呢？
韓國戰爭之後，制定兵役法嗰陣時，女性因身體部分問題唔適合當兵，只有男性成為徵兵對象，不過對男女嚟講都係好大嘅性別歧視。
第一，男性淨係因為以男性身份出世，就要喺惡劣嘅環境入面，以微薄嘅報酬工作1年半。第二，女性淨係因為作為女性出世，就被視為冇對國家安全做出貢獻嘅劣等市民。因為呢啲原因，淨係適用男性嘅兵役義務，喺韓國社會內部都產生咗好大嘅矛盾。
要去幾耐？
軍隊服役時間大概係兩年，但根據入伍時間唔同，服役時間都會有少少唔同。
| 部隊 | 期間 |
|---|---|
| 陸軍 | 18個月 |
| 海軍 | 20個月 |
| 空軍 | 22個月 |
| 海軍陸戰隊 | 18個月 |
| 社會服務人員 | 21個月 |
聽講軍人由入伍嗰一刻開始，每日都淨係等退伍嗰一日快啲到，不過喺部隊嘅時間通常都過得特別慢，而且啱啱開始實行徵兵制嘅時候，陸軍、海軍、空軍都要服疫36個月，大家聽到有冇覺得好驚訝?
軍人人工有幾多？
| 軍銜 | 人工 |
|---|---|
| 二兵 | 510,100 KRW |
| 一兵 | 552,100 KRW |
| 上兵 | 610,300 KRW |
| 兵長 | 676,100 KRW |
軍人每個月都會收到一次糧同2019年相比上漲咗33%，而且同10年前相比上漲咗成6-7倍左右，不過金額其實唔太高。
雖然人工唔算高，不過就聽講好多軍人喺服役期間都會加入軍人專用存款嚟努力儲錢，聽講呢個存款利息比一般存款嘅高好多！韓國小編嘅細佬都用過，退伍之後用嗰筆錢買咗部notebook。
軍隊入面有啲咩規定？
軍隊係好嚴格嘅組織，所以就一定會有好多規矩！
1. 頭髮規定
衆所周知，韓國嘅軍人會將頭髮剪到好短。
일요 신문
應該係為咗訓練同戰鬥嘅時候追求「最高效率」為目的？所以先要剪到咁短，而且韓國人平時一般都唔會剪到啲頭髮咁短，所以喺韓國一剪呢個短髮都會被叫做「軍隊髮型」。
好多軍人入伍前就要剪頭髮，切身感受入伍嘅感覺。
2. 手機規定
事實上喺2020年之前，軍隊係絕對唔可以用手機。
正因為係咁，除咗從外面寄嚟嘅信同暫時允許嘅通話時間之外，就等於完全斷絕同外界嘅聯繫。好多韓國男性因為咁感到不便同孤獨，終於喺2020年7月開始允許喺軍隊用手機。當然為咗安全起見，要安裝特別嘅app，再喺鏡頭上面貼住貼紙，以免喺軍隊入面用相機鏡頭。
국방일보
基本上係平日軍隊工作完之後，夜晚6點到10點可以用手機，休息日或者週末就可以由朝早7點用到夜晚10點。
SK 텔레콤
因為可以用到手機，軍人就可以同屋企人、女朋友、朋友輕鬆聯繫，同時亦可以快啲得到外面嘅消息。
軍隊入面食啲咩呢？
就好似中學生返學咁，軍隊入面會提供食物畀佢哋，早、午、晚三餐！
국방일보, 연합뉴스
雖然會提供韓餐、中餐、日餐、西餐等多種食物，但聽講唔係好好味....
국방부
因為要短時間做得大份夠晒咁多人食，所以喺食材方面唔會用好多錢。
국방부 블로그, 롯데리아 홈페이지
代表性嘅食物有被稱為「軍隊利亞」嘅漢堡包，會提供麵包同各種材料，軍人可以自己將佢哋夾埋一齊食，「軍隊利亞」係「軍隊」同韓國快餐店「樂天利亞」合拼而成，而最近「樂天利亞」都推出咗呢個漢堡包meun。
亦因為軍隊嘅食物唔係太好食，而且又唔飽肚，所以好多軍人都會去PX（軍人超市）買其他快餐嚟食，價錢相對亦會比出面平。
亦因為咁，唔少軍人喺放假嘅時候，都會趁機去PX買嘢畀屋企人或者女朋友。
軍隊嘅文化係點嘅呢？
韓國社會通常以年齡嚟分階級，但係軍隊入面就徹底以軍銜為基礎，即使年紀大，如果軍銜低嘅話，喺軍隊就會成為「下級」，正因為係咁嘅原因，如果唔係藝人的話，好多男性都會想盡快去服兵役。
해병대
呢種以軍銜嚟分階級嘅文化，喺需要處理軍事問題嘅軍隊入面係唔可以缺少嘅，但同時亦都有好多缺點，因為幾乎冇得可以自己可以揀。
間唔中軍隊內部都會發生孤立或者暴力問題而要接受精神科治療或者自殺事件，雖然最近已經有慢慢改善，不過仍然係更加需要努力。
軍隊都有唔同種類？
연합뉴스, 엑스포츠 뉴스
軍隊入面有好多種類，有喺地上訓練嘅陸軍，喺天上訓練嘅空軍，喺海上訓練嘅海軍，喺海岸訓練嘅海軍陸戰隊。另外，喺服兵役期間幫助警察嘅「義務警察」、幫助消防員嘅「義務消防」、因身體原因所以喺社會機關嘅社會服務人員等。
서울경찰 페이스북, 더쿠(THEQOO)
種類係唔係比想象中嘅仲要多呢？
喺軍隊入面有咩工作要做呢？
雖然基本上大家都係接受緊同一樣嘅訓練，但就會有各種各樣嘅職務。
就好似EXO D.O.做料理嘅「炊事兵」，又或者好似演員丁海寅一樣開車做「司機兵」。
仲有SHINee Key、BTOB昌燮、VIXX N等衆多男藝人以「軍樂兵」嘅身份工作，軍樂兵喺國家活動或者部隊活動入面做演出角色。
playdb
大家又有冇睇到男藝人入伍之後出演音樂劇？EXO XIUMIN、SHINee 溫流、INFINITE 聖圭、演員姜河那、池昌旭等多種男藝人喺服役期間都出演咗《歸還:那日的約定》同《新興武官學校》等音樂劇。𣎴過呢種情況並唔存在其他任職。
뉴스 1
係因為陸軍內部為咗傳達為國民嘅信息，而製作嘅音樂劇，通過選秀選定演員，作為粉絲嚟講，藝人以軍樂兵入伍或者出演軍隊音樂劇係最好。因為就算係佢哋軍隊服役期間，都可以睇到表演！
寄信要點寄？
韓國軍人入伍之後唔會直接去部隊，而係會喺訓練所接受5個星期到6個星期左右嘅訓練。因為呢個訓練期間係禁用手機，所以除咗寫信之外就冇其他可以溝通嘅方法，寄信嘅方法大致有兩種。
1. Online
入伍一個星期之後，就可以透過互聯網寫信。
육군 훈련소 홈페이지
可以喺陸軍訓練所網站、海軍教育司令部網站、 空軍基本軍事訓練團網站send email，搵到對應嘅軍隊之後send就可以！但係呢啲網站都係韓文，需要韓國人實名認證，所以外國人很難用得到。
陸軍、義務警察、社會服務要員等就可以通過 The Camp App輕鬆send出去，聽講網上寫嘅信會印出嚟俾返軍人！
The Camp嘅最大優點係外國人都可以用海外號碼進行本人認證，好簡單就用得到。 另外，用The Camp app可以收集大家寄嚟嘅信件，非常方便。
2. Offline
同online一樣，入伍後一個星期就可以知道收信地址。
聽講一日行程結束之後就會分發俾軍人，當結束一日辛苦嘅訓練，收到親手寫嘅信的話，真係會好安慰同充滿力量！好多藝人都表示，讀粉絲寄俾佢哋嘅信係唯一嘅樂趣。
軍隊係喺韓國文化入面佔咗好大部分，雖然服兵役係一件好辛苦嘅事，但通過服兵役，都會得到進一步嘅成長。希望以後逐漸改善有關軍隊嘅性別不平等、暴力、人權等問題！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
