香港人必睇韓國演唱會門票購買攻略（2026年最新版）
由有10年以上搶飛經驗嘅KPOP粉絲教你點買韓國演唱會飛！到底點先可以快啲買到同搶到好位、身處外國點算好？
Hello，大家好 ，我哋係由韓國人每日提供最新韓國旅行資訊嘅Creatrip。
相信好多鍾意韓國嘅朋友們都係對KPOP、韓國偶像同音樂有興趣，小編自己都已經追星追咗超過10年，當然都搶過唔少韓國演唱會飛。但係買韓國演唱會飛真係要好似比賽咁，只要慢人一秒可能就會失敗...
韓國售票系統相對上節奏更快、競爭更大，而且有時候流程都好混亂，今次小編就打算將自己私藏嘅演唱會搶飛秘笈寫出嚟公開俾大家睇，由頭到尾教大家點用韓國售票網買飛、搶演唱會飛有咩要注意、搶唔到飛可以點做等等。只要事前準備好、策略清晰，外國人都一樣可以成功搶到想睇嘅演唱會門票！
韓國演唱會門票購買攻略
韓國有邊幾個演唱會門票售票網？
想買韓國演唱會門票，外國粉絲們通常都會用以下呢5個網站/平台買飛，小編自己5個都有用過，各有各特徵：
語言 | 特徵 | |
NOL | 韓文、中文、英文、日文 | 最主要平台，好多大型演唱會、音樂劇、音樂節門票都會喺度賣 |
YES24 Ticket | 韓文、英文 | 會員預售門票通常都會喺度開售 |
Melon Ticket | 韓文、中文、英文、日文 | 比較多中型演唱會、粉絲見面會同音樂節門票 |
Ticket Link | 韓文、中文、英文、日文 | 比較多演出、活動、體育賽事門票 |
Creatrip | 中文(繁/簡)、英文、日文等15種語言 | 售賣各種拼盤演唱會、頒獎典禮外國遊客專用門票，唔需要同韓國人搶飛 |
1. NOL Ticket/NOL World(NOL 티켓、前Interpark Ticket)
講起韓國最出名嘅售票網站，一定唔少得Interpark Ticket！呢個網站喺2024年年尾改咗名做「NOL Ticket」，外國版就叫做「NOL World」。雖然整體介面設計亦有更新，不過但整體搶飛流程、核心系統同服務上就冇咩分別。
韓國好多大型演唱會、音樂劇、音樂節都會用呢個平台售票，所以如果你有打算搶KPOP演唱會門票，NOL係其中一個你一定要知嘅平台之一。
2. YES24 Ticket(예스24 티켓)
「YES24」原本係一個大型網上書店，後來發展成韓國其中一個主要演唱會售票平台。唔少粉絲會員優先預售都會喺YES24進行。佢嘅英文版網頁基本上夠用，但有時更新速度會比韓文版慢少少。如果你打算經英文網頁買飛，最好都提早熟習一下個網站操作。
3. Melon Ticket(멜론 티켓)
如果你平時已經對韓國音樂圈比較熟，Melon呢個平台你應該唔會陌生。「Melon Ticket」由 Kakao相關體系營運，本身同韓國音樂生態連結好深。唔少中型演唱會、粉絲見面會同音樂節門票都會喺Melon Ticket開賣，當然每年萬眾矚目嘅MMA（Melon Music Awards）頒獎典禮門票都會喺呢度賣啦！
4. Ticket Link(티켓링크)
「Ticket Link」都係韓國其中一個常見售票平台，比起大型KPOP演唱會，比較多演出、活動、體育賽事門票等都會經佢哋發售，偶爾都可以喺呢度搵到比較小型嘅演唱會門票。
5. Creatrip(크리에이트립)
除咗以上幾個主流售票平台之外，香港朋友們其實亦可以留意埋我哋Creatrip網站！可能大家以為我哋只會提供韓國最新旅行資訊，但其實我哋都有賣各種拼盤演唱會、頒獎典禮、特別KPOP活動同演出嘅外國遊客專用門票。就算係本身預計好難買飛嘅活動，因為大家唔需要同韓國人爭飛，競爭相對比較細、成功機會更大！
我哋平台亦都有提供各大演唱會場地接駁車、追星神器手機租借同應援棒租借等等嘅服務，如果你已經買咗演唱會飛，都可以透過我哋預約各種追星族必備服務！
韓國演唱會門票大約幾多錢？
體育場級演唱會 （例如 BTS、BLACKPINK演唱會） | ₩132,000-275,000+ (132000-275000+) |
大型場館演出 | ₩154,000-198,000+ (154000-198000) |
Fan Meeting | ₩110,000-121,000 (110000-121000) |
音樂節/拼盤演唱會 | ₩99,000-165,000 (99000-165000) |
※2025-2026年平均門票價錢
實際韓國演唱會票價會因藝人級別、場館規模、座位區域而差好遠，所以以上數字僅供參考。如果會再加埋參加Sound Check等額外選項，價錢就會再高一截。
另外除咗門票價錢，買韓國演唱會飛嘅時候可能仲需要俾埋訂票手續費（大約₩1,000-4,000），如果係用海外信用卡，根據平台同銀行政策可能需要俾多筆手續費。再計埋交通、買周邊同應援用品嘅價錢，大家預算記住預鬆少少！
💡小編小貼士：如果你喺韓國住，或者想先將門票寄去朋友屋企，通常需要另外支付郵寄費用（大約2,500-3,500）；如果會揀直接去現場取票，記住要預早到場排隊同核對身份。
搶演唱會飛之前有咩需要準備？
根據小編個人經驗，如果想提高成功機率，記住要準備好以下三樣嘢！
1. 韓國電話號碼
而家大部分韓國售票網嘅國際版都可以用海外電話號碼註冊，不過如果你想直接用韓國版網站，某啲驗證流程有機會會要求你用韓國手機短訊進行認證。所以雖然唔係一個must，但如果有韓國電話號碼會比較方便！
如果冇嘅話，推薦大家可以去到韓國之後買一張包電話號碼嘅韓國SIM卡，或者用朋友嘅韓國電話號碼（不過視乎平台規定，可能唔可以咁做），又或者優先選擇唔需要韓國手機認證嘅公開售票場次。
2. 已經開通海外付款嘅信用卡/韓國銀行戶口
對外國人嚟講，俾錢係最容易出事嘅一關，好容易因為付款問題最後買唔成，特別係海外扣賬卡好容易被拒絕。呢個時候最常見同可行嘅方式係用Visa或者Mastercard信用卡，不過海外信用卡有時處理速度會慢少少，或者有機會中途失敗。
另一個小編個人推薦嘅方式係透過銀行轉賬(무통장입금)付款，呢個方法最快，不過前提係你要有韓國銀行戶口，或者有人可以幫你做韓國本地入數。而且因為揀銀行轉帳嘅話，很多時可以先成功保留座位，再喺限時內付款就可以。即係話開賣嗰一刻你唔需要即時完成付款流程，會快好多。不過如果你人唔喺韓國，通常自己完成唔到韓國銀行轉賬呢一步，所以通常都會請韓國朋友幫手，或者經代購服務處理付款部分。
如果你打算靠自己，建議最好唔好等到正式搶飛嗰日先第一次用你張信用卡俾錢！你可以預早揀一場冇咁熱門嘅活動，用自己張信用卡試一次流程。部分平台提供短時間內免費取消，咁你就可以順便測試付款有冇問題。
3. 明星官方會員會籍
呢層需要睇下你想買嘅演唱會會唔會開放會員優先購買，不過大部分人氣團體都會有！有官方會員會籍就可以搶先喺正式公開發售之前買飛，相對上競爭會比較細、成功機會更高。
好似HYBE旗下藝人通常會用 Weverse membership、JYP 藝人部分就會要求用FANS membership，其他大型公司旗下明星歌手亦都會另外有自己一套會員制度。如果你係長期追某一隊，而且唔止睇一次演唱會，咁小編就覺得官方會員會籍係值得投資嘅；如果你只係偶爾想睇一次，或者未必會長期追，咁就未必一定要為咗一次演出而買會員。
韓國演唱會買飛秘訣
喺韓國有想睇嘅演唱會或表演，但係成日都爭唔贏其他人？大家只要跟住以下呢幾個小貼士做，成功機率會高好多！
1. 提前註冊會員同Log in
為咗可以比人更快買到飛，記住一定要提前登入，咁就唔洗等到俾錢嗰刻先入資料！如果未做會員，咁就要快啲註冊返個啦！
2. 將電腦時間Set做韓國時間
雖然小編之前冇試過因為時差問題而搶唔到飛，不過網上有好多人都分享過話因為自己所在地區同韓國因為有時差，所以就失敗咗。通常演唱會飛開賣當日，頁面上面會有倒數計時嘅鐘仔，大家可以確認多次呢個時間同自己電腦個時間一唔一樣。
3. 用navyism網站校正時間 + 倒數
因為每個網站嘅時間可能會有少少誤差，所以建議大家搶飛之前可以先入「navyism」呢個網站，輸入你買飛嘅時候要用嘅網站，畫面就會顯示嗰個網站嘅準確時間！大家買飛之前可以亦都可以開住呢個網倒數，咁就萬無一失啦！
4. 事前練習
因為每個網站嘅system唔同，所以建議大家喺正式開始買飛之前要先熟習買飛流程，至少要試到俾錢前最後一個步驟，因為好有可能你部電腦ban咗顯示「彈跳視窗」，咁嘅話俾錢嗰頁就會彈唔到出嚟，最後可能會前功盡廢。
5. 開賣後唔好撳F5重新整理頁面
以小編搶飛嘅習慣，小編會大約喺59秒嘅時候先撳一次重新整理，然後即刻撳買飛，之後排隊嗰頁就會彈出嚟。呢個時候大家千祈千祈唔可以重新整理頁面，要耐心等候，如果唔係就要重新排過㗎啦！
6. 開幾個頁面
根據小編個人經驗，最多開2-3個頁面就差唔多啦（怕開太多會Lag機XD）同時亦都建議大家先Download定售票網站嘅app，亦都要登入埋先，因為有時候太多人用網站買，用app有可能仲會順啲！
韓國演唱會搶飛Q&A
1. 一個帳號可唔可以同時登入幾部機？
INTERPARK、YES24同MELON呢三個網站目前都冇限話一個帳號只可以用一個裝置登入，所以用多幾部機請朋友幫手搶都未嘗唔係一個好方法！
2. 韓國版網站會快過國際版？
好似頭先所講，因為要登入韓國版網站，首先需要用韓國電話號碼驗證，所以如果大家冇韓國電話號碼，就逼不得已需要喺國際版網頁註冊啦！不過其實兩邊搶飛都冇咩大分別，最主要都係要睇大家嘅網速XD 所以如果屋企個WIFI或者部電腦比較慢，建議大家落網吧搶！
3. 用電腦定係APP搶會比較順？
呢個其實真係話唔埋，因為小編之前試過去網吧搶但失敗咗，最後居然係用手機求其撳一撳嘅朋友幫小編搶到XD 所以建議大家可以電腦同手機並用，搶到嘅機會會大啲！
4. 洗唔洗買Fan Club會員？
最近韓國好多歌手明星都有自己嘅官方Fan Club，無論係開演唱會、粉絲見面會都係會員優先買飛！所以如果大家真係好想好想去嘅話，建議先加入Fan Club，咁就可以優先買到比較好嘅座位！
另外有個好消息！而家透過我哋都可以輕鬆買到大型演唱會飛，有興趣嘅朋友撳我睇啦！
以上介紹咗買韓國演唱會門票嘅方法，唔知大家又覺得有冇幫助呢？希望大家之後都可以成功買到飛啦！
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
