Hello，大家好，我哋係由韓國人每日提供最新韓國旅行資訊嘅Creatrip。
每年都有唔少新嘅韓劇播出，除咗由編劇自己構思嘅劇本之外，而家都好流行透過原有嘅作品改編。今年就有好多由小說、漫畫改編而成嘅韓劇，踏入2021年好多消息指一啲大熱漫畫將會改編拍成韓劇。下面就想同大家介紹一下有邊幾套漫畫可能會拍成韓劇，唔知大家又有冇追睇緊呢？
2021漫畫改編韓劇
1. 再婚皇后（재혼 황후）
《再婚皇后》原本已經係極高人氣、下載量超過一億次嘅網絡小說，而家喺NAVER漫畫入面連載緊，更加傳出咗會翻拍成電視劇嘅消息。
以幻想性質嘅題材，顛覆一般人想像嘅角色同情節：皇后唔單止冇因為皇帝婚外情受到打擊，反而同其他男人再婚，展開復仇嘅橋段，得到好多女性熱烈嘅迴響。
2. 前輩，不要塗那支口紅（선배, 그 립스틱 바르지 마요）
即將喺1月18號播出嘅《前輩，不要塗那支口紅》就搵嚟元真兒同路雲主演，故事係講述擔任化妝品銷售員嘅年下男同上司嘅浪漫故事，原本喺漫畫作品入面已經充滿浪漫嘅對白，預計呢啲對白會喺電視劇入面透過一班有魅力嘅角色同故事展現出更加強嘅表現力，可以預計一定會引起極高話題性。
3. 娜羅的名單（나노리스트）
主角嘅家姐有一日自殺，主角參加喪禮嘅時候，收到家姐嘅遺物，包括存摺、屋企同其他人嘅卡片，最重要嘅係家姐留低咗一封信，上面寫着「喺成為高中生嘅生日嗰日，我會送畀你一份禮物」。
終於喺主角成為高中生嘅嗰一日，有個人撳佢門鐘，「佢」就係家姐嗰陣時講嘅禮物……
4. 柔美的細胞小將（유미의 세포들）
人體入面每一個細胞都有自己嘅個性，而呢啲細胞喺腦入面嘅活動同對話，就會影響人嘅行動。
《柔美的細胞小將》簡單啲嚟講，就係將細胞擬人化，透過主角柔美呢一個人帶出好多職場同埋愛情方面嘅觀點，令主題唔單只係局限喺可愛嘅形象入面，而係好多元化同貼近生活嘅。
5. 雖然我知道（알고 있지만）
故事講述經歷咗初戀嘅甜蜜同苦澀，成為大學生嘅女主角柳娜菲同性格奇怪嘅男主角朴載言，兩個人喺各自唔同嘅成長背景、傷痛當中成長、相遇，展開嘅浪漫故事。同其他作品明亮色彩唔同，《雖然我知道》以原色為主呈現偏向陰暗嘅風格。
6. 心靈的作業（마음의 숙제）
13年前曾經向浩善表白嘅李景，一直都冇得到答案，對浩善依然存有迷戀嘅美景搬咗去「梨園洞」，令人驚訝嘅係，13年前失蹤嘅浩善竟然喺呢度，而且仲維持緊當年嘅樣貌。
喺同浩善對話嘅過程當中，李景先知道原來呢度係吸血鬼聚集嘅地方，日頭會隱藏自己、夜晚先開始做嘢，而作為呢個地方唯一嘅人類，李景同一班吸血鬼鄰居開始咗特殊嘅新生活。
7. 心驚膽跳的同居（간 떨어지는 동거）
以九尾狐作為主題，由張基龍、惠利主演嘅漫畫改編韓劇《心驚膽跳的同居》已經確定會喺今年tvN同愛奇藝同步播出，呢套都係愛奇藝第一次合作嘅韓國原創作品。
故事內容講述女大學生有一日唔小心食咗狐狸珠，為咗安全攞返粒珠出嚟，佢同999歲嘅狐仙定下咗契約……
8. 勇敢的市民（용감한 시민）
女主角學生時代已經非常正義，見到唔公義嘅事就好想出面，後尾喺爸爸嘅希望之下，成為咗合約教師，目標係成為正式教師。
不過佢體內嗰一種勇敢、熱愛正義嘅熱血基因仲流動緊，見到轉校生一系列惡劣嘅行為，女主角決定戴上面具進行報復。
9. 我的偶像總裁（우리 오빠는 아이돌）
曾經係偶像團體「DNA」成員嘅李燦，擔任咗一間休閒品牌嘅CEO，同公司嘅總經理「姜河基」、新入職女員工「南多凜」發生咗一連串嘅故事。搞
笑嘅係，除咗男女主角嘅故事線之外，韓國有好多網民都好想發展李燦同姜河基嘅故事線，係一套輕鬆嘅愛情喜劇漫畫。
10. 金湯匙（금수저）
《金湯匙》主角屋企經濟條件好差，係所謂嘅「土湯匙」，有一日佢就得到一支金湯匙，只要用呢支匙羹喺同年嘅朋友屋企食飯食夠三次就可以成為嗰個屋企嘅一員。
佢試咗一次之後，果然真係換咗去一個有錢人屋企到，但過咗一排佢已經頂唔順，要換返去原本嘅生活，後尾又發生咗急需要用錢嘅事故，所以佢再次動用呢一支「金湯匙」同開始墮落……
11. 鄭年伊（정년이）
漫畫《鄭年伊》係以50年代得女性嘅國劇團為背景，講述由木浦鄉下地方去首爾，夢想成為國劇演員嘅少女同國劇團團員嘅故事。
同大多數淨係講述男主角心境、成功道路嘅漫畫唔同，《鄭年伊》反映咗女性嘅野心同奮鬥、愛情同矛盾，仲獲得咗舊年頒發嘅「兩性平等文化獎」。
12. 現在我們的學校（지금 우리 학교는）
《現在我們的學校》聽落好似好浪漫，但其實係講述一間比喪屍病毒入侵嘅高中，一班學生想合力逃走嘅故事。
不過，喺冇路可逃嘅學校入面，呢啲學生之間嘅關係會點樣決定彼此嘅生死呢？
呢套劇都係小編好期待嘅Netflix原創劇之一，大家又期唔期待呢？
以上就係即將係2021年會改編成韓劇嘅漫畫，小編最期待嘅就係《心驚膽跳的同居》同《前輩，不要塗那支口紅》，大家又最鍾意邊一套呢？
可以喺下面留言同小編分享㗎～
如果有更多想知嘅內容，都可以隨時留言或者dm話俾我哋知：）
Instagram：creatrip.hk
