Hello，大家好，我哋係由韓國人每日提供最新韓國旅行資訊嘅Creatrip。
每年韓國農心公司都會公佈「公仔麵人氣地圖」，咁多年辛拉麵一直都係名列前茅，不過其他名次就有少少變化，唔知當中有冇邊一款係你鍾意食嘅呢？
2022韓國公仔麵人氣地圖
「辛拉麵」喺1986年上市，同一般香港公仔麵唔同，佢嘅麵條比較粗同有咬口，加上特有嘅香辣味，由1991年開始連續30年佔據市場佔有率第一位，亦都係大家講起韓國即食麵第一個諗到嘅口味。
而喺地區分布入面，辛拉麵喺忠清北道地區嘅佔有率更加高達12.3%，創下全國最高數值。
除咗辛拉麵，「農心炸醬麵」咁多年嚟都係排喺頭幾名。之前因為電影《寄生上流》入面出現過「浣熊炸醬麵」，即係浣熊拉麵加農心炸醬麵呢個食法，引起一段潮流，令呢款炸醬麵勇奪全國佔有率第二名。而第三名就係安城湯麵（4.8%）、第四名就係辣味真拉麵同辣牛肉湯杯麵，同樣有4.4%。
雖然辛拉麵喺韓國整體嘅佔有率最高，不過喺釜山同慶尚道地區，「安城湯麵」佔嘅比例都偏高，佢湯底夠濃郁，加上唔會好辣，就算係小朋友都可以食到。
同其他公仔麵唔同，唯一上榜嘅杯麵就係「辣牛肉湯杯麵」，唔少韓國人飲完酒第二日都會買佢嚟解酒，湯辣辣地，飲完成個人即刻醒曬！
唔知大家又最鍾意邊一款韓國公仔麵？歡迎喺下面留言分享話俾我哋知～
如果有更多想知嘅內容，都可以隨時留言或者dm話俾我哋知：）
Instagram：creatrip.hk
