Hello，大家好，我哋係由韓國人提供每日最新旅行資訊嘅Creatrip。
以前唔少人想學好韓文都會選擇嚟韓國上語學堂，不過而家因為疫情嘅關係嚟唔到，或者都唔會想俾成萬蚊上網課！
如果喺呢段期間大家都想學到正宗嘅韓文，不妨可以參考下以下幾個平台！唔單止係免費，仲可以你鍾意幾時學就幾時學都得，夠曬彈性！等小編同大家介紹下呢五個免費嘅學韓文平台啦！
五個免費自學韓文嘅平台
1. Talk to me in Korean 
呢個網站算係一個好專業嘅網站，係由兩個韓國人一齊創立嘅！
裡面有超級多自學資源，唔單止係讀寫聽說，就連文法或者文化都會一一教你！
呢個網站非常之適合初學者，大家都可以由發音開始學起。
如果你唔係初學者，呢個網站都有好多適合中級同埋高級嘅教材，總共分為九級，每一份教材裡面都會有曬mp3教學同解釋，所以唔需要擔心聽唔明！另外如果你唔知道自己程度去到邊嘅話都可以上去做level test，咁就可以清楚知道自己嘅程度！
2. 韓文101 （한글101)
韓文101呢個app對初學者嚟講真係好唔錯，最適合由零開始學韓文嘅朋友！
呢個app主打係教你發音，無論子音、母音定係收尾音都會有曬真人發音示範，對未學過韓文嘅大家簡直係一流！
只要有部電話就down到，無論搭車定係臨訓前打開望兩望都得，仲要係免費添！想學韓文嘅新手要down啦！
3. 韓文單字卡
韓文單字卡呢個app主要係俾一啲已經有最基本底子嘅人，學每一個新嘅語言最需要嘅就係認識多啲生字，而呢個app正正就可以幫到你啦！
呢個app可以畀你揀唔同類別嘅生字去學，每個生字都會有曬解釋同埋例句。有時一個詞語可以當名詞、動詞同埋形容詞嘅時候，呢個app都會一次過show曬出嚟。對學緊韓文嘅人嚟講就可以學多啲唔同嘅詞彙啦！
4. 每日一句學韓文（正體中文版）
呢個app好適合一啲想學多啲句子嘅朋友，呢個app同其他唔同嘅地方就係佢係有埋影片教學，每條片嘅長度大約係兩三分鐘。唔單止有中韓對照，老師仲會解釋埋當中嘅文句結構！小編當時學韓文嘅時候都有down呢個app，個人覺得每日學三四句真係好有幫助！
5. Study Abroad in Korea（中文影片教學）
平時大家睇YouTube睇就睇得多，但大家又有冇諗過睇YouTube都可以學韓文呢？一邊睇真係覺得好似返咗學校上堂咗，因為片裡面嘅老師係會用粉筆黑白教學文。而呢度嘅堂主要係深入淺出咁樣教文法為主，如果本身文法底子比較差或者想從溫一下基本文法嘅朋友都可以睇吓！
以上呢啲就係免費學韓文嘅平台，如果大家冇乜太多budget但又想學正宗韓文，都可以上去以上呢五個網頁睇睇啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
