Hello，大家好，我哋係由韓國人話你知每日最新資訊嘅Creatrip。
＃韓國趣聞＃新冠疫情
＃居家隔離＃消遣活動
受到今年疫情嘅影響，大家出街嘅時候除咗要戴口罩又要常備酒精搓手液，真係非常唔方便，留喺屋企嘅時間都因為要在家工作同埋避免外出聚集而多咗。
韓國喺疫情之下唔止出現咗一啲新造詞（點我），仲衍生咗一種「在家宅」嘅文化。
成日宅喺屋企雖然好廢青，不過為左避免外出增加感染風險，其實都係必須嘅事。
喺屋企日日煲劇我諗大家都開始有煲劇疲勞，想搵啲新嘢做吓，而韓國就因為呢個「在家宅」嘅風潮出現咗唔同可以輕鬆打發時間嘅活動。
除咗之前興過一排嘅400次咖啡，仲有各種DIY嘅小手作。下面就等小編為大家介紹韓國人喺屋企hea嘅時候有咩玩啦～
✨馬上Follow我哋IG
instagram.com/creatrip.hk
韓國人喺屋企「hea」嘅消遣活動
1. 串珠戒指（비즈 반지）
INSTAGRAM：supermagicfactory
呢一類嘅串珠戒指都流行咗一段時間，就係因為孔孝真喺韓劇《山茶花開時》戴咗串珠嘅飾物。
串珠戒指其實好易整，呢種可愛嘅設計同清新活潑嘅配色喺唔同年齡層，上至成人下至小朋友都非常受歡迎。
前排唔少韓國藝人喺佢哋嘅社交媒體上面都上載過戴住呢啲串珠飾物嘅相。
繽紛可愛嘅造型令一眾粉絲都即刻想獲得偶像嘅同款，掀起咗一陣在家做手作串珠嘅風潮。
其實串珠戒指嘅做法好簡單，只要準備唔同嘅珠珠、釣魚線、剪刀同埋黏著劑，就可以設計出自己獨一無二嘅串珠首飾，就算宅喺屋企都有新戒指手鏈戴！
2. 400次咖啡（달고나커피）
前排「400次咖啡」嘅熱潮大家有無追上潮流試整過？
只要準備即溶黑咖啡粉、砂糖、水、牛奶同冰粒，就可以體驗到好多韓國藝人都挑戰過嘅400次咖啡。
有得食又有得玩，材料仲要咁簡單，絕對係喺屋企消磨時間嘅最佳活動。
將咖啡粉、水、砂糖，以1:1:1嘅比例倒埋一齊，然後開始不停攪拌，至少攪拌400下以上（推薦用電動攪拌器無咁辛苦）。
最後就會有綿密、濃稠嘅咖啡色奶蓋，聞落有非常香嘅焦糖咖啡味，加喺牛奶上面一齊飲 真係忍唔住一啖接一啖！
前排順應400次咖啡嘅熱潮，韓國推出咗唔少焦糖口味嘅食品，唔少商家都捉緊大家多咗時間留喺屋企嘅商機，吸引大家入手。
3. 1000次梳乎厘奄列（천 번 저어만드는 오믈렛）
前排韓國防疫政策嘅提高令再次回歸「在家宅」嘅韓國人絞盡腦汁諗出一個新食譜。
除咗400次咖啡之外，呢個1000次梳乎厘奄列又係另一項需要瘋狂混合同攪拌嘅食譜，真係少啲臂力都唔得。
呢條YouTube片就提過，製作完400次咖啡之後開始諗有無啲咩都係攪拌嘅食譜呢，之後就諗起可以用雞蛋。
只要將蛋黃同蛋白分開，將蛋白攪拌至少1000下，倒埋蛋黃入去，喺平底鍋煎熟，就會有梳乎厘口感嘅奄列！
嗰種喺口入面融化嘅綿密口感真係一試難忘。
4. Home Gardening（홈가드닝）
因為要避免出門聚集，韓國嘅DAISO就推出咗呢款掀起咗一陣熱潮嘅「烤肉朋友園林套餐」Home Gardening。
5000won就可以有一個簡單嘅花盆、種子同泥土，只係需要淋水就可以喺屋企種出新鮮嘅生菜同辣椒，非常適合用來喺屋企打發時間。
5. 大腸髮圈（스크런치 / 곱창밴드）
「大腸髮圈」其實就係一種復古風嘅橡筋，因為IU曾經綁過呢一款橡筋而帶起咗呢個熱潮，亦都有唔少藝人綁過呢款橡筋。
Youtube：스퀘어샌드
呢一種大腸髮圈都係可以DIY㗎，只要有條普通嘅橡筋，再加上自己鍾意嘅布料同針線，跟住下面條片嘅步驟就可以做到。
小編都有試過將啲唔要嘅衫整成大腸髮圈，如果想條髮圈更加大同蓬鬆，就要用更多布料。
6. 自我進修
呢一樣都係韓國最近崛起嘅產業，因為大家都長期留喺屋企，所以買啲線上課程，例如手作DIY、K-pop舞蹈、化妝等等或者其它學術性嘅進修，都可以喺網上訂購，所需嘅材料或者書都會直接寄去你屋企，係一種嶄新形式嘅學習。
想培養下興趣，又唔想用太多錢或者要喺出面冒住風險同陌生人聚埋一齊上堂，喺屋企線上學習都係一個唔錯嘅選擇。
以上就係受到疫情影響，韓國人由習慣出門口聚會變到而家將大部分時間都留喺屋企嘅日常。
其實小編覺得留喺屋企都幾舒服啊，而且仲有咁多嘢做可以消磨時間，大家又對邊項活動最感興趣？
可以留言同小編分享下～
✨馬上Follow我哋IG
instagram.com/creatrip.hk
| 其他延伸閱讀 | |
 防疫層級將降級 |  2020韓國粉紅波波 |
