女仔人生中都總會苦惱過呢個問題，就係剪唔剪齊陰好？有時候見到啲韓妹剪空氣劉海咁靚，自己都心郁郁想試吓，但係又驚會唔襯自己，而且香港嘅天氣留空氣劉海真係好易塌！
小編今日就會介紹9款韓式瀏海，等大家想剪個「偽韓妹」頭嘅時候可以有多啲選擇～
9款韓式瀏海
1. 시스루뱅 (See-through Bangs)
第一款就當然係最為人所知嘅空氣劉海！相信唔使小編多講，大家都知道空氣瀏海係咩樣，基本上所有面型嘅人都適合剪空氣瀏海 ，輕易就可以營造到「偽韓妹」嘅效果。
2. 퍼피뱅 (Puppy Bangs)
如果睇厭咗自己空氣瀏海想轉吓新髮型，只要用捲髮棒將原本嘅空氣瀏海夾攣，咁就可以變成「小狗瀏海」。不過就要注意捲髮棒嘅直徑唔可以太大，如果唔係就捲唔到額頭前面嘅陰㗎啦，亦都可以試下將全部頭髮夾攣，營造狗仔嘅無辜感覺，造型就更加「偽韓」！
小狗瀏海嘅靈魂就在於要好似狗仔嘅毛咁蓬鬆！
3. 어니언뱅 (Onion Bangs)
洋蔥瀏海唔知大家有冇聽過？呢一款瀏海就係有少少凌亂感，好似洋蔥底部啲鬚咁，要剪到大約額頭中間嘅位置，適合一啲額頭比較大同闊，想遮住個額頭但係又唔想剪齊陰嘅人。
呢一種瀏海望落好清爽自然又唔厚重，大家夏天嘅時候都可以試吓。
4. 사이드뱅 (Side Bangs)
呢一款瀏海就係將啲陰由中間開始分去兩邊，因為可以凸顯女性嘅側面，亦都係俗稱嘅「女神頭」。大家聽到女神頭千祈唔好覺得好大負擔，事實上呢一種瀏海可以營造到女人味。
唔會有一般齊陰嗰種幼稚細佬女嘅感覺，特別適合一啲成熟唔鍾意齊陰嘅小女人。只係需要將原本就中分嘅頭髮每邊都拎起一束，再用捲髮棒向外卷一個自然嘅弧度，望落去同原本嘅髮型自然融合，完全唔需要擔心會太誇張！
5. 풀뱅 (Full Bangs)
相信呢一款瀏海大家都唔陌生，甚至可以話係香港嘅女仔喺學生生涯中一定有剪過嘅髮型之一。
同空氣瀏海相比，呢一種厚瀏海好強調整齊嘅一字同埋長度要完全遮住眉毛，剪完呢個髮型塊面都即刻變細，微微夾彎之後望落就更加可愛同減齡！
呢一種厚瀏海配黑髮都係最近韓妹相當流行嘅髮型，想營造偽韓妹嘅感覺不妨一試～
6. 처피뱅 (Choppy Bangs)
眉上瀏海相信大家都有聽過，重點就係長度要過額頭嘅一半啱啱好喺眉毛上面，都係一款顯面細嘅髮型之一。
唔鍾意一字咁整齊嘅話，都可以好似李聖經果種咁不規則咁剪，唔少人都覺得眉上瀏海好難駕馭，但係剪得好睇嘅話就真係會好有特色！
7. 쉼표 앞머리 （Comma Bangs）
逗號髮型係將瀏海捲成逗號形狀，令額頭露出一半頭髮。呢個逗號髮型大家有留意開韓國潮流的話都應該知道喺韓仔之間好流行。女仔整呢種逗號髮型的話就顯得好成熟，好有事業型女性嘅感覺，想要改變形象嘅時候就最啱。
8. 더듬이 앞머리 （Antennae Bangs）
本身係喺1990年代流行嘅觸角瀏海，因為最近流行復古風而再度興起，佢係將長瀏海好似昆蟲觸角咁用髮蠟固定造型。因為最近太流行呢款髮型，所以有好多韓星都有整過， 一般做呢個髮型嘅時候，通常會將淨底嘅頭髮紮起，咁就可以更加強調瀏海嘅造型！
9. 앞머리 염색 （Dyed Bangs）
挑染瀏海亦都係隨住復古風潮而再次興起，呢款瀏海係無論咩造型都好適合，亦都可以演繹出好奧妙又獨特嘅感覺。
以上就介紹咗9種韓妹流行嘅瀏海，唔知大家轉季有冇想挑戰嘅新髮型呢？希望大家都可以搵到自己心儀嘅瀏海造型～
如果有更多想知嘅內容，都可以隨時留言或者dm話俾我哋知：）
Instagram：creatrip.hk
