Hello，大家好，我哋係由韓國人每日提供最新韓國旅行資訊嘅Creatrip。
比起喺電視上播，集集都要個幾鐘先睇完嘅韓劇，韓國人好鍾意一啲「一個週末」就可以睇晒嘅網劇。小編今次整理咗一啲網劇，都係喺韓國NAVER網站搜尋排名前十，好受歡迎。一齊睇下有邊啲啱你口味啦！
韓國熱門網劇
1. In Seoul Season（인서울）
《In Seoul》係一套相當得意嘅網劇。講述一個好鍾意追星嘅高三生，想考上首爾大學，自己一個住。唔知呢個劇情對咁多位嚟講，係咪好有共鳴呢？對於已經成為大人嘅我哋，睇到呢啲情節，都會會心一笑，就好似睇住當初急住長大嘅我哋。
劇情除咗講述母女之間嘅衝突，仲提到青春期友情、戀愛嘅小煩惱。呢套劇已經播到第2季，有興趣嘅朋友可以睇下。
2. 少女的世界（소녀의 세계）
《少女的世界》主要講17歲高中生嘅日常生活、朋友之間嘅故事。呢套戲嘅一大亮點，就係OH MY GIRL嘅Arin同JBJ嘅權玄彬都有出演，獲得唔錯嘅迴響。
3. 漫撕男女（만찢남녀）
呢套網劇《漫撕男女》改編自網路漫畫。「韓仙女」（WekiMeki金度延飾）同漫畫《仙女和南昱君》女主角嘅名同外表都一樣，遇上由漫畫跑到現實嘅男主角「千南昱」（金旻奎），發展出一段好似漫畫一樣嘅愛情。呢套戲每逢星期四、日播出，對呢套戲有興趣嘅朋友，可以搵嚟睇睇。
4. 魚膾店周邊（가두리횟집）
《魚膾店周邊（加鬥裡生魚片店）》以輕鬆詼諧嘅喜劇手法，帶出男女主角嘅愛情故事。小編覺得幾好笑（唔使用腦、相當輕鬆），係套幾值得睇嘅網絡喜劇，推薦大家搵嚟睇下。
《魚膾店周邊》由VIXX嘅成員爀主演，鍾意佢嘅朋友一定唔可以錯過。
5. A-TEEN 2（에이틴 2）
《A-TEEN》相信大家都唔陌生，係韓國近年嚟最紅嘅網劇。第二季講述主角踏入18至19歲，面對考大學等人生選擇，充滿對校園同青春嘅描述。出演過《A-TEEN》嘅人，喺戲劇界都有唔錯嘅成績，金東熙嘅Fans一定要睇呢套劇啦！
6. 語言的溫度：我們的19歲（언어의 온도）
《語言的溫度》講述一班因為壓力同未來，而感到苦惱嘅高中生嘅故事。比起一般青春浪漫嘅校園劇，呢套戲更能引起高中生嘅共鳴。女主角開咗一個SNS帳號，希望用文字安慰同齡嘅朋友。
7. XX（엑스엑스）
HANI主演嘅網劇《XX》，又點可以錯過呢！呢套戲講述喺XX酒吧入面工作嘅酒保（HANI飾演），以開設自己嘅酒吧做目標。主角同XX酒吧嘅新老闆見面，先發現對方係自己五年前鬧交後再冇見過面嘅朋友。
8. 戀愛播放列表（연애플레이리스틑 시즌4）
《戀愛播放列表》係韓國相當出名嘅網劇，目前已經到第四季。建議大家可以由第一季開始睇，感受下主角群喺戲入面，因為唔同社會身分、環境嘅變化，點樣影響彼此之間嘅關係，是一套相當輕鬆，但劇情飽滿嘅戲。
另外，小編亦想推薦同一間公司製作嘅《最好的結局》。呢套比較短，好快就可以睇完。
9. 在你視線停留的地方（너의 시선이 머무는 곳에）
韓國第一套BL網劇《在你視線停留的地方》，講述兩個男高中生嘅愛情，冇太多激情場面。集數唔算好多，有興趣嘅朋友可以搵嚟睇下。
10. Shining Nara Magic Diary（빛나는 나라）
《Shining Nara Magic Diary》係幾年前嘅網劇，題材相當新鮮。小學生Nara想快啲長大，突然某日，因為一個神祕嘅化妝包令佢變成16歲嘅妙齡少女，並成功靠近想識嘅人。究竟一個化身成少女嘅小學生，會發生咩有趣嘅事呢？一齊睇下呢部啦！
呢啲NAVER上搜尋量前10名嘅網劇，小編最個人最想睇《漫撕男女》，等佢播完就會開始睇。大家又鍾意邊一套呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
