Hello，大家好，我哋係由韓國人每日提供最新韓國旅行資訊嘅Creatrip。
唔知大家有無發現，韓國好鍾意將食物煮成一鍋，除咗有大家所知嘅一隻雞、部隊鍋、泡菜鍋等，有無咩鍋嚟到韓國一定要食嘅呢？無錯！就係馬鈴薯排骨湯啦！呢間二代祖馬鈴薯排骨湯24小時營業，啱哂行程排到滿嘅大家，或者到凌晨好肚餓想食飽肚啲，都可以去試吓！如果有興趣嘅話就繼續睇落去啦！
弘大美食店: 二代祖馬鈴薯排骨湯
- 新地址：서울 마포구 동교로 196
- 營業時間：24小時
二代祖馬鈴薯排骨湯正門（舊地址）
新地址（喺原本地址隔離）
因為店入面只可以坐地下，所以一入到去就要先喺門口除鞋，然後老闆就會為大家安排坐位。
小編去嘅時候係大約差唔到晏晝12點，大家可以睇到其實都幾滿，可以話佢人氣真係極高！
坐到入去，就算未落單都已經會有小菜喺到等大家。小編兩個人去，所以叫咗佢哋最出名嘅馬鈴薯排骨湯(細)，唔使好耐就已經送到嚟。
提提大家，因為馬鈴薯排骨湯本身會有芝麻葉，如果唔鍾意食嘅話，可以落單嘅時候同職員講唔好放。
因為排骨本身已經係熟，只要再煮一陣就食得，佢哋每舊排骨都好大件，而且超嫩超滑！而且湯好入味，少少辣令人忍唔住食完一啖再一啖。
如果想再辣少少，男小編推薦話可以點芥末酱一齊食會更加好食！小編就覺得，因為肉本身已經好入味，就算唔點醬都好好食！
2020.06月已加價
因為呢間太出名，所以可以選擇嘅Menu只係得3款，其實每款都好有人氣，但小編就比較推馬鈴薯排骨湯！真係只要一試就會愛上嘅味道！(一啲都唔誇張)
小編2個人叫咗細份大約有5舊大排骨，唔夠亦可以再加 (₩ 16,000) ，而白菜亦只需再加 ₩2,000。
大家食完排骨，最後亦可以加炒飯、拉麵、粉絲或麵疙瘩等，但因為小編想食湯飯，考慮咗好耐最後只食白飯XD大家下次去嘅話，可以考慮吓叫炒飯同拉麵，小編見到都好多人叫呢兩款。
最後小編真係幾推薦大家去呢間二代祖馬鈴薯排骨湯！除咗因為係24小時，而且排骨真係好嫩，湯亦好好飲，啱哂行程排到滿嘅大家，希望大家會鍾意呢次嘅分享啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
