韓國SeS自動通關攻略 | 香港旅客登記地點、申請方法、FAQ總整理（2026最新版）
原來香港旅客都可以用韓國SeS自動通關！一次過睇申請資格、登記地點、使用方法同常見問題
- 韓國SeS自動通關係咩嚟？
- 韓國SeS自動通關有冇指定申請資格？
- 香港旅客可以喺邊度登記韓國SeS？
- SeS自動通關點申請？
- 申請完SeS之後點行自助通道出入境？
- SeS、e-Arrival Card、Smart Pass有咩分別？
- 韓國SeS自動通關常見問題FAQ
Hello，大家好，我哋係由韓國人每日提供最新韓國旅行資訊嘅Creatrip。
最近越嚟越多人嚟韓國玩，過關嘅時候成日都要排長龍，要等勁耐先可以入到境..... 呢個時候相信大家都會好羡慕可以行自動過關通道嘅韓國人，但其實外國遊客都可以申請自助通關！
如果你本身成日去韓國，或者純粹唔想再填入境資料、排人工櫃檯，可以考慮事先登記SeS（Smart Entry Service）自動通關服務，之後入境韓國就可以用自動通關閘口，流程會方便好多。今日小編會幫大家整理SeS申請資格、流程、地點同注意事項，
※本文參考 Hi Korea同韓國出入境相關官方資訊整理，並按 2026年5月可確認資料更新。不過現場安排、登記中心開放時間同使用條件仍有機會調整，出發前建議再到官方網站確認。
韓國SeS自動通關係咩嚟？
경향포토
SeS（Smart Entry Service）係韓國法務部管理嘅自動出入境審查服務，同香港e道一樣，只要合乎資格，旅客預先登記護照資料同指紋資料之後，日後入境韓國嘅時候就可以行自動通關通道，唔洗每次都排人工入境櫃檯。
韓國SeS自動通關3大優點
① 快速過關、唔洗排長龍更省時
你可以避開繁忙嘅人工櫃位，直接經自助通關閘口順利入境。繁忙時段人工通道隨時要排30分鐘以上，但如果已經登記咗SeS，通常都可以大幅縮短等候時間，而且出境同入境都可以用。
※ 實際所需時間會因應當日抵達航班數量及機場運作情況而有所不同。
② 唔洗再填入境申報表/電子入境卡
只要登記一次，以後就唔使再準備飛機上派發嘅紙本入境申報表，亦唔需要事先填e-Arrival Card做網上登記。
③ 即日登記即日用，最快3分鐘搞掂
登記過程只需要大約3分鐘，而且完成登記後即時生效。如果你喺仁川機場入境前辦理，登記完之後就可以即刻直行去自助閘口過關，大大節省排隊時間。而且SeS資格有效時間同你本護照有效時間一樣，申請一次之後就可以不斷用。
✏️香港小編小貼士：雖然一般唔洗填入境申報表，但如果因為護照讀取失敗等原因，被要求轉去人工櫃位辦理入境，就可能需要即場填寫。以防萬一，建議你事先將住宿資料儲存在手機入面，到時就可以即刻打開嚟睇！
可使用SeS自動通關機場/港口
地區 | 可使用地點 |
機場 | 仁川機場T1/T2、金浦機場、釜山金海機場、濟州機場、清州機場、大邱機場、務安機場、襄陽機場 |
港口 | 仁川客運碼頭、釜山客運碼頭、平澤客運碼頭、群山客運碼頭 |
官方網站列出嘅中心同可用口岸有機會因營運安排而調整，尤其係部分中心網站未必完整顯示開放時間。最穩陣做法係出發前上Hi Korea再睇一次，或者直接致電相關中心確認。
韓國SeS自動通關有冇指定申請資格？
適用韓國SeS自動通關國家/地區
截至 2026年5月，SeS目前已經開放緊俾42個國家/地區嘅旅客申請。
當中包括德國、台灣、香港及澳門等原本已經同韓國有互惠關係嘅國家/地區；其後又分別喺2025年12月同2026年3月擴大適用範圍，而家持有日本、美國、新加坡、英國、法國等多個熱門國家、其餘歐盟成員國、瑞士、冰島等部分申根公約成員國護照都可以辦理自動出入境服務。
✏️香港小編小貼士：如果你持有香港特區護照就當然可以順利申請到SeS，不過BNO護照就建議以Hi Korea或現場出入境職員說明為準。
韓國SeS自動通關申請資格
只要你符合以下資格，小編建議大家有機會就先申請定SeS，過關會方便好多：
- 持有上述國家/地區免簽證晶片護照（e.g.香港特區護照）
- 年滿17歲
- 護照有效期需至少6個月以上
- 願意提供指紋及面容資料作身份確認
- 過去無任何韓國犯罪紀錄
✏️香港小編小貼士：有唔少朋友都有DM小編話，就算已經申請好，過機嘅時候有啲人會成功，亦都有啲人會過唔到，但係暫時仲未有一個確實原因解釋到呢個現象。建議大家如果唔得嘅話可以換一部機再試一試！
但如果你提供資料嘅唔完整，或者資料有誤、指紋狀況未能清楚辨識身份、有出入境限制、曾因無法證明低風險旅客身份而被拒入境、已更換新護照但未重新登記，或者個別情況下系統判定未能使用自動通關服務，有機會申請唔到SeS自動通關。
另外如果你本身持有韓國長期簽證或外國人登錄相關資格，實際安排可能會同一般短期旅客唔同，建議直接向官方再確認。好似小編咁有外國人登錄證嘅話就唔需要另外申請SeS，直接行自助過關通道就得。
香港旅客可以喺邊度登記韓國SeS？
根據Hi Korea官網資料顯示，香港旅客可以去以下韓國境內SeS登記中心進行申請手續：
仁川機場T1
- 地點：3樓出境大樓H區前
- 服務時間：07:00-18:00
仁川機場T2
- 地點：2樓政府綜合行政中心
- 服務時間：07:00-18:00
金浦國際機場
- 地點：2樓出入境辦事處（출입국민원실）
- 服務時間：星期一至五 09:00-18:00（Lunch Break 12:00-13:00）
釜山金海國際機場
- 地點：2樓出境事務科（출국사무과）
- 服務時間：星期一至五 09:00-18:00（Lunch Break 12:00-13:00）
大邱國際機場
- 地點：2樓大邱出入境機場遺失物室
- 服務時間：星期一至五 09:00-18:00（Lunch Break 12:00-13:00）
濟州國際機場
- 地點：3樓貴賓室前
- 服務時間：星期一至五 09:00-18:00（Lunch Break 12:00-13:00）
首爾站
- 地點：首爾站機場鐵路B2/F辦事處（출장소）
- 服務時間：星期一至五 09:00-18:00（Lunch Break 12:00-13:00）
如果想喺其他城市（例如仁川、水原、清州、大田、光州等）辦理，可以去Hi Korea官網參考更多資訊。
✏️香港小編小貼士：仁川機場由2026年開始喺入境審查區內設有特別登記櫃位，大家可以喺過關前就申請定，直接行自助通道出去，唔需要好似以前咁要入境韓國之後先再去上述辦事處登記！不過未有宣佈呢個做法會安排到幾時，一切都以現場安排為準！
SeS自動通關點申請？
韓國SeS自動通關申請過程好快，根據小編經驗大約3-5分鐘左右就可以搞掂。步驟大概係：
- 將護照交俾職員。
- 掃描雙手食指，登記指紋。
- 對住面容識別相機拍攝。
- 資料會寫入護照IC晶片，完成登記。
但要記住SeS自動通關只可以由本人辦理，唔可以由其他人代辦。申請嘅時候如果需要填寫個人資料同電話，用香港電話號碼都得！
登記資料主要會記錄喺系統同護照晶片內，現場會否附加標記或貼紙，請以當日安排為準。只要喺護照有效期內入境同出境韓國，都可以直接行自助通道！
不過大家要留意自助通關有效期等於護照有效期，如果有換過護照需要重新申請。另外雖然入境唔需要寫入境卡，但如果你有需要申報物品，仍然要填寫海關申報表，按海關規定辦理！
✏️香港小編小貼士：如果大家打算出境當日去申請，記住要預早多少少時間去，避免發生錯過check-in或者登機時間等問題。另外如果有咩疑問，或者搵唔到申請地點，都可以問機場工作人員。
申請完SeS之後點行自助通道出入境？
只要登記一次SeS自動通關，之後再去韓國時，就可以跟住以下流程使用自助閘口，出入境會快好多！
- 掃描護照相片頁
- 自動門打開後入去閘口內
- 將雙手食指放上指紋掃描器，同時望向前方鏡頭
- 完成所有認證後，前方閘門會打開，完成入境手續就完成
不過如果護照晶片讀取失敗，可能會被安排去人工櫃檯。另外就算已經成功登記，現場都可能因系統或抽查安排改行人工櫃檯。大家亦都要記住如果換咗新護照，一定要重新登記！
SeS、e-Arrival Card、Smart Pass有咩分別？
講起韓國入境相關服務，一定唔少得SeS、e-Arrival Card同Smart Pass，不過好多人都會搞亂佢哋，但其實三者嘅用途同使用場景都唔一樣！
項目 | SeS | e-Arrival Card | Smart Pass |
主要用途 | 出入境審查自助化 | 取代紙版入境申報表 | 省略離境時人手掃機票同護照嘅流程 |
使用地點 | 韓國主要機場及港口 | 入境韓國時 | 仁川機場 |
事先登記 | 需要 | 需要 | 需要 |
注意事項 | 護照過期前都可以無限次使用 | 申請SeS之後就唔需要填寫 | 每次飛都要重新登記(機票資訊會唔同) |
簡單嚟講，SeS用嚟加快出入境審查速度、e-Arrival Card係取代入境卡嘅網上版入境申報表、Smart Pass目的係省略離境流程，事先登錄好臉部同機票資訊就可以入行李過機區。大家可以參考以下文章，準備齊上述三樣嘢，喺韓國出入境都會更加方便！
韓國SeS自動通關常見問題FAQ
| Q1. 香港人可唔可以申請韓國SeS自動通關？
可以。持有香港特區電子護照、並符合相關條件的旅客，可按韓港 SeS / e-Channel 互用安排申請。
| Q2. 申請SeS自動通關要幾耐？
A：一般現場約3至5分鐘可以完成，但實際都要視乎排隊情況而定。
| Q3. 護照類型有冇限制？
A：護照需要有內建晶片先可以成功辦理自助通關。
| Q4. 我已經申請咗，但係點解用唔到？
A：因為每個人保管護照嘅方式唔同，護照晶片狀態都可能會唔同，亦都可能有時候呢部機用唔到，換一部機就可以正常過關，如果試極都唔得嘅話建議向現場工作人員查詢。
| Q5. 韓國SeS自動通關資格有效期會去到幾時？
A：同你本護照嘅有效日期一樣，所以如果護照過期，自動通關資格亦都會隨即失效，換新護照之後記住要重新申請過！而如果你係持有韓國長期簽證嘅外國人，自動通關資格有效期就會同簽證有效期一樣（長期簽證仍然有效，但係護照過期嘅話，換新護照之後唔需要另外申請SeS；但係如果簽證過期或者之後會用其他簽證入境就需要另外申請）。
| Q6. 換新護照之後之前申請嘅SeS自動通關仲用唔用得？
A：好似頭先所講，無論係護照到期定整唔見咗本護照需要補發，只要一換護照就一定要重新申請。
| Q7. 我申請咗自動通關，但點解護照上面冇貼貼紙？
A：以前部分情況下會有貼紙或標記，但現時主要以系統及護照晶片資料為準，所以就算冇貼貼紙都唔需要擔心。
| Q8. 小朋友可唔可以申請SeS自動通關？
A：唔可以，需要年滿17歲先符合資格申請。
| Q9. 帶小朋友去韓國，應該點安排入境？
A：如果同行小朋友未滿17歲，一般唔可以申請SeS自動通關，所以唔建議家長自己先行自動通關，再等小朋友行人工櫃檯。最穩陣做法係一家人一齊按現場指示行人工櫃檯；如果有7歲以下幼童同行，部分機場亦可能設有優先通道/家庭旅客通道，可以即場向職員查詢。
| Q10. 冇申請自動通關都可以自助出境？
A：可以，只要入境有資料，出境嘅時候就算冇申請自動通關都可以直接行自助過關通道。
你可能會有興趣
本文由Creatrip香港編輯部參考2026年5月Hi Korea網站、韓國出入境相關官方資料、機場公開資訊及旅客常見問題整理撰寫，並按最新可確認內容持續更新，希望為香港旅客提供更準確、實用同清晰易明嘅韓國旅遊指南。
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
