Hello，大家好，我哋係由韓國人每日提供最新韓國旅行資訊嘅Creatrip。
今日要同大家傾下只有喺韓國先有嘅一啲特點，究竟有啲咩係其他地方都冇，只有韓國有嘅呢？而家就嚟介紹呢六個，令外國人大吃一驚嘅韓國特點俾大家啦。
韓國文化差異
1. 代理駕駛
大家知唔知道全世界第一個代理駕駛服務，係由韓國開始呢？所謂嘅代理駕駛，就係代替車主人去開車。通常車主人會喺自己無辦法開車嘅狀態之下，申請代理駕駛，尤其係「飲酒之後」。
想要叫代理駕駛嘅時候，只要打電話俾代理駕駛公司，佢哋就會確認客人嘅所在位置同目的地之後，派司機過去開客人嘅車，安全咁將客人帶返屋企、停好車，再自行離開。首爾叫代理駕駛嘅價錢大概係₩30,000左右，雖然唔比的士平，但係個安心嘅做法。
代駕出現嘅原因同特徵
通常會叫代理駕駛都係為咗防止因為酒駕，而被吊銷駕照，或者係造成交通事故。韓國之所以會產生代理駕駛文化，係因為韓國人太鐘意飲酒，亦因為係咁首爾地區有深夜巴士，一般巴士甚至12點幾仲有班次。
另外，雖然代理駕駛係24個鐘都可以叫，但主要都係夜晚叫嘅人比較多，所以好多代理駕駛司機都係有一份正職，收工之後做parttime代駕。
2. 火病
有一種病只有韓國人會有嘅就係「火病」- 係指因為心情鬱悶而導致痛症、抑鬱或者不眠等症狀。同時亦係「其他長期性情緒障礙」中嘅一種，大家可以將佢當係憂鬱症、躁鬱症嘅一種就可以。
火病出現原因
點解全世界入面只有韓國會有火病呢？因為對上司，長輩一定要服從、唔可以頂撞，大概就係導致火病嘅最大原因。
大部分韓國社會，會為咗維持一個共同體，即使件事係啱，只要有可能導致紛爭，都會被要求唔可以講，所以好多韓國人無辦法隨意表達自己喺社會生活中所遭到嘅憤怒同鬱悶，只可以強壓喺心入面。
隨住火氣一直累積、無辦法釋放，就會產生內在嘅疾患、心理方面嘅患疾，呢啲患疾就通稱做火病，不過如果放任唔理，嚴重嘅話仲會轉變成心臟病或者係憂鬱症！（都難怪韓國人咁鐘意飲酒舒壓）
3. 外賣文化
喺韓國只要一個電話，無論喺邊都可以叫到外賣，早餐、水果、零食、各種禮物、花、運動器材同高爾夫球桿等都可以送！外賣文化係結合咗韓國人做咩事都要「快啲」嘅個性，最近呢種外賣文化仲傳播到去國外，變成一種「韓國式服務」。
喺韓國，通常都係揸電單車去送外賣，畢竟韓國嘅交通算係幾複雜，只有電單車物可以來回穿梭喺車之間，快啲將外賣送到達目的地。
外賣文化優點同趨勢
韓國外賣文化嘅優點就係「邊度都可以送」，屋企、宿舍、漢江公園、海邊等，只要係客人想要去嘅目的地，基本上都叫得！其實唔只炸雞、pizza、漢堡、炸醬麵、韓式料理等可以外賣，就連高級家庭餐廳、Starbucks、雪冰都可以。
就連嬰兒食嘅斷奶食品都可以每日三餐外賣，仲有一個月只要₩10,000就可以享受一個星期2至3次嘅水果外賣服務，甚至有啲業者仲會聯合外賣，送啱啱燙好嘅西裝或者係花束。
4. 地熱（地暖）
韓國人即使喺寒冷嘅冬天都仲係可以著短袖、短褲喺屋企入面走嚟走去，呢啲都係多得韓國嘅地熱，相信好多外國人一定會覺得好神奇？
韓國地熱係一種令間屋地板變得暖嘅韓國傳統暖房技術。以前喺韓屋嘅爐灶入面燒火，而燒火所產生嘅熱氣，就會流到地板下面，令每間房變熱，煙就會隨著排煙孔排出。
最近地熱變化
原本地暖係利用爐灶直接加熱方式，令地板變熱，但而家就係埋水管，用注入熱水間接加熱方式，令地板變暖。亦即係話，而家已經進化成溫水地暖加熱系統。
加熱地板嘅韓國地熱，比起加熱空氣嘅暖房系統，最多可以節省39%嘅能源，而且因為加熱系統唔似電暖器一樣，係裝設喺室內，喺裝潢或者係空間使用上都可以非常有效率，聽講韓國地熱系統已經正式進軍歐洲。
5. 搓澡
有一個文化只有喺韓國嘅汗蒸幕人面先可以見到嘅就係搓澡-係指喺公共沐浴湯入面，用搓澡巾幫客人搓走全身嘅癬，不過因為呢個係屬於一種服務業，所以為咗滿足客人嘅需求，可能同時亦會幫客人按摩或者係洗頭髮。
搓澡特徵同注意事項
搓澡一次大概要₩12,000至₩20,000，唔算平，但係只要試過一次，一定會覺得呢筆錢洗得有價值。因為韓國大部分嘅搓澡師，都係經由專業嘅搓澡學院（中央沐浴管理學院）所訓練出嚟嘅專業搓澡人才，為咗可以幫客人搓澡，搓澡學院入面會教150種方法，所以推薦大家嚟韓國旅行嘅時候，一定要試下搓澡。
搓澡可以幫助去除老廢角質，兩個星期做一次就係最好，不過如果搓得太多次，反而會影響肌膚健康。
6. 韓國香瓜
呢種黃色又帶籽嘅香瓜，竟然係只有喺韓國先可以見到嘅水果。香瓜同西瓜都係夏天最具代表性嘅水果，唔單止係甜度高、熱量低，仲可以幫助身體排熱㗎！ 韓國香瓜有黃色嘅外皮同白色條紋，入面係有白色嘅果肉同籽，外國稱韓國香瓜做「Korean melon」或者係「 Chamwae」。
雖然同韓國鄰近嘅中國、日本同東南亞國家都有香瓜，但一般嘅香瓜係由哈密瓜改良而成，同韓國香瓜完全唔一樣。
日本嘅香瓜就冇好似韓國香瓜一樣嘅白色條紋，而且韓國香瓜食落係甜甜地，但日本香瓜食落就冇甜味。
今日就介紹咗韓國特有嘅6樣事，雖然隨住地球村演進，有啲嘢唔係只有韓國先至有，但呢啲曾經都是只有韓國專屬、真正嘅韓國特色，所以就介紹俾大家知道。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
