Hello，大家好，我哋係由韓國人每日提供最新韓國旅行資訊嘅Creatrip。
西巡邏街位於鐘路3街站，坐落於首爾鬧區，附近有益善洞、仁寺洞、北村同三清洞等人氣景點。自從綜藝節目《我獨自生活》去咗呢度拍攝取景之後，西巡邏街成為咗2024年韓國年輕人weekend最鍾意去嘅地方，今日就等小編推薦幾間呢度必去嘅餐廳同Cafe啦！
西巡邏街附近有咩好玩？
西巡邏街(서순라길)介紹
- 位置：首爾地鐵1號線、3號線、5號線鐘路三街站（종로3가역）7號出口
朝鮮時代嘅時候，西巡邏街係維護治安嘅巡邏軍所行嘅路，而因為呢度位於巡察宗廟嘅巡邏廳西邊，所以被稱為「西巡邏街」。
因為附近建築唔可以高過宗廟石牆，所以首爾市政府限制呢度嘅住宅高度唔可以超過兩層樓，亦都令西巡邏街一帶嘅建築同石牆形成非常協調嘅景觀。
另外西巡邏街每逢weekend 10:00至18:00禁止車輛通行，所以非常推薦大家下晝嚟散步，享受難得嘅悠閒時光。
西巡邏街四季風景都各有特色，春天夏天四周圍一片翠綠、秋天就會見到紅葉銀杏盛開，去到冬天仲可以睇到石牆上積雪，而且因為沿途都係韓屋同石牆，整體非常有韓國傳統氛圍！
而西巡邏街嘅餐廳大部分都係酒吧或者餐廳&酒吧，而且好多鋪頭都會設置戶外座位，氣氛勁chill！不過如果大家想食正餐，或者韓式料理嘅話，比起喺呢度食飯，小編會更加推薦大家去鐘路3街站一帶。
另外西巡邏街鄰近宗廟、昌德宮、益善洞等首爾旅行必去景點，距離景福宮、安國都唔遠，大家可以安排大半日喺呢度附近玩！
西巡邏街推薦餐廳&Cafe
Bittle's TACO(비틀스타코)
- 地址：서울 종로구 서순라길 89-7
- 營業時間:
- 星期一至四 16:00-23:40
- 星期五至日 13:00-23:40
「Bittle's TACO」出現喺韓國綜藝《我獨自生活》之後人氣大增，weekend甚至仲可能等成2個鐘以上都未必食到！呢間餐廳以墨西哥捲餅同啤酒為主，調味偏重手，不過小編韓國同事話佢勁鍾意，係呢度嘅熟客！
不過因為餐廳入面大部分都係2~3人位，而且好多人都係嚟一邊飲酒食嘢一邊chill住傾計，所以如果人比較多，或者係同一家人一齊嚟嘅話可能就唔太適合啦！
Salon Sulla(살롱순라)
- 地址：서울 종로구 율곡로10길 75
- 營業時間：
- 星期一至五 11:30-22:00（Break Time 15:00-17:00）
- 星期六及日 11:30-22:00（無Break Time）
「Salon Sulla」雖然裝修以韓屋為主題，不過其實係一間西餐廳，喺呢度食飯就好似返咗去韓國開化期嘅時候，氣氛相當好！
The Queen's Guard(퀸즈가드)
- 地址：서울 종로구 서순라길 115
- 營業時間：星期二至日 14:00-23:00
「The Queen's Guard」亦都係西巡邏街非常出名嘅酒吧之一，整體行英式風格（老闆自己本身就係英國人！）嚟呢度一定要試佢哋嘅手工啤酒同下酒菜！天氣好嘅時候，坐喺戶外悠閒地飲返杯真係勁寫意又chill！
Knows昌德(노우즈창덕)
- 地址：서울 종로구 돈화문로 88-1
- 營業時間：
- 星期一至五 08:30-17:30
- 星期六及日 09:00-18:00
西巡邏街附近唔少餐酒館都係下晝先開鋪，而「Knows昌德」就由朝早開始營業，等大家可以喺度嘆Brunch~ 小編去嘅時候叫咗份肉醬長通粉同三文魚多士，味道都有一定水準。而隔離睇落好似Sake樽嘅其實係Cold Brew咖啡，非常特別！呢度外國客人都幾多，店員英文程度都夠好，大家唔洗擔心溝通唔到。
Cafe SASA(카페사사)
- 地址：서울 종로구 서순라길 147
- 營業時間：
- 星期一、三、四 12:00-20:00
- 星期二 12:00-18:00
- 星期五至日 12:00-21:00
數到西巡邏街最有代表性嘅韓屋Cafe，就不一定唔少得「Cafe SASA」。之前朴炯植同朴信惠嘅《低谷醫生》同唔少韓劇都曾經嚟過呢度取景，有時候仲會租俾新婚夫婦做迷你婚宴場地！另外「Cafe SASA」亦都會不定期推出季節限定飲品同甜品，鍾意去Cafe嘅朋友們記住唔好錯過啦！
FIKEE(파이키)
- 地址：서울 종로구 서순라길 81
- 營業時間：
- 星期一 10:00-19:00
- 星期二至日 10:00-22:00
- 每月第一個禮拜三休息
近呢幾年韓國開咗唔少呢種書店Cafe，除咗好似書鋪咁會賣書，有時仲會舉辦讀書會等等嘅活動。位於西巡邏街嘅「FIKEE」天氣好嘅時候會將打開窗門，擺放戶外座位俾客人。小編之前經過都會見到啲韓國人坐喺窗邊位睇書，間唔中抬頭欣賞石牆風景，就好似韓劇一樣咁悠閒。
Heritage Club(헤리티지클럽)
- 地址：서울 종로구 서순라길 75
- 營業時間：12:00-23:00（Last Order 22:30）
西巡邏街大部分餐酒館同Cafe都有戶外露天位，不過「Heritage Club」就唔同，得室內位。店內氣氛比較安靜，加上裝修風格較為沉穩，好啱唔鍾意環境太嘈嘅朋友！不過要注意夜晚七點之後就只會賣酒精飲品，唔飲酒嘅話就可能要揀去另一間餐廳啦。
Teumari(트마리)
- 地址：서울 종로구 서순라길 107-1
- 營業時間：11:00-23:00
西巡邏街有很多Cafe都會好似而家要介紹嘅「Teumari」咁，將二樓設置成露天座位，天氣好嘅時候去真係好正！上面張相入面有一份用紙包起嘅正方體，其實佢係「Teumari」嘅人氣甜品芝士蛋糕！而且呢度嘅芝士蛋糕仲有幾款口味，推薦鍾意食甜品嘅朋友們叫嚟試！
Bidam巡邏(비담 순라)
- 地址：서울 종로구 율곡로10길 11
- 營業時間：星期二至日 12:00-21:00（Last Order 20:30）
雖然「Bidam巡邏」比較近安國站，但其實西巡邏街走到尾就會見到！呢度最特別嘅係上到樓上露天座位就可以直接眺望到昌德宮同昌慶宮，聽講天氣好嘅時候仲可以見到南山塔！
COFFEEBAY BAKE & BISTRO(커피베이 서순라길점)
- 地址：서울 종로구 율곡로10길 27-13
- 營業時間：星期二至日 11:00-21:00
「COFFEE BAY」係一個韓國連鎖Cafe品牌，而佢哋今年6月就喺西巡邏街開咗呢間「酒吧型複合Cafe」，將西巡邏街嘅傳統風格同益善洞嘅開化期氛圍結合，韓屋建築+歐式風格裝修超特別！
西巡邏街附近仲有咩好玩？
如果有更多想知嘅內容，都可以隨時留言或者dm話俾我哋知：）
Mail：help@creatrip.com
