有冇人同小編一樣都鍾意食韓牛？前幾日小編去咗「Tokyo Sirloin」位於狎鷗亭嘅分店，食盡各種韓式美食同韓牛，跟小編一齊去睇吓啦！
「Tokyo Sirloin（狎鷗亭店）」資訊
- 地址：서울 강남구 도산대로49길 9 스타크빌딩 3F
- 營業時間：11:30 - 22:00（Break Time 15:00 - 17:00、Last Order 21:00）
- 可預約時間：11:30 / 12:00 / 12:30 / 13:00 / 17:00 / 17:30 / 18:00 / 18:30 / 19:00 / 19:30 / 20:00
- 語言：韓文、簡單英文
「Tokyo Sirloin（狎鷗亭店）」推薦原因
- 可以用更實惠嘅價錢食到燒韓牛、韓牛SUKIYAKI、SHABU-SHABU等等嘅高級韓牛料理！
- 有多款Set Menu任君選擇，由前菜到甜品都非常多樣化！
- 有窗邊位、獨立房等多種選擇，無論係想睇景定想享受私人空間都冇問題！
- 位於狎鷗亭島山大路附近，食完飯可以去行街！
「Tokyo Sirloin（狎鷗亭店）」價錢
選項 | 價錢 | 包括 |
Lunch Set A | ₩26,500/人 | 薄切生韓牛、忌廉炸蝦、關東風韓牛SHABU-SHABU、無抗生素雞蛋、白飯&烏冬、甜品、茶 |
Lunch Set B | ₩36,500/人 | 一口海鮮前菜、薄切生韓牛、忌廉炸蝦、韓牛SUKIYAKI、無抗生素雞蛋、白飯&韓牛海帶湯、甜品、茶 |
Lunch Set C | ₩46,500/人 | 一口海鮮前菜、薄切生韓牛、忌廉炸蝦、燒熟成韓牛、任實芝士、白飯&韓牛海帶湯、甜品、茶 |
Lunch Set D | ₩56,500/人 | 一口海鮮前菜、薄切生韓牛、忌廉炸蝦、章魚&番茄、燒熟成韓牛、任實芝士、韓牛SUKIYAKI、無抗生素雞蛋、白飯&韓牛海帶湯、甜品、茶 |
Lunch Set Signature | ₩66,500/人 | 一口海鮮前菜、薄切生韓牛、忌廉炸蝦、生韓牛、章魚&番茄、濟州凸頂柑五島烏冬、燒熟成韓牛、任實芝士、韓牛SUKIYAKI&無抗生素雞蛋、白飯&韓牛海帶湯、甜品、茶 |
Dinner Set A | ₩76,500/人 | 一口海鮮前菜、薄切生韓牛、忌廉炸蝦、椰子帶子、韓牛SUKIYAKI、無抗生素雞蛋、白飯&韓牛海帶湯、甜品、茶 |
Dinner Set B | ₩86,500/人 | 一口海鮮前菜、薄切生韓牛、忌廉炸蝦、椰子帶子、燒熟成韓牛、任實芝士、白飯&韓牛海帶湯、甜品、茶 |
Dinner Set C | ₩106,500/人 | 一口海鮮前菜、薄切生韓牛、忌廉炸蝦、生吞拿魚tartare、章魚&番茄、燒熟成韓牛、任實芝士、韓牛SUKIYAKI&雞蛋、白飯&韓牛海帶湯、甜品、茶 |
Dinner Set Signature | ₩126,500/人 | 一口海鮮前菜、薄切生韓牛、忌廉炸蝦、生吞拿魚tartare、生牛肉、章魚&番茄、韓式牛肉餅、燒熟成韓牛、任實芝士、韓牛SUKIYAKI&雞蛋、白飯&韓牛海帶湯、甜品、茶 |
※全部Menu最少要叫2人份。
※加₩10,000可以將白飯轉做鯛魚釜飯。
「Tokyo Sirloin（狎鷗亭店）」退款政策
| 預約後至到訪4日前取消 | 全額退款 |
| 到訪3日前取消 | 不設退款 |
「Tokyo Sirloin（狎鷗亭店）」注意事項
- 請最少喺3日前完成預約。
- 請務必準時到達。
- 如希望加購其他餐點，請喺現場支付所需金額。
- 可以帶除咗燒酒同啤酒之外嘅酒精飲品，一開始會免費提供酒杯。
- Last Order時間係用餐時段結束前1小時。
- 預約時請確保已選擇正確日期及時間。
- 遲到超過10分鐘預約會自動取消。
- 如果想更改預約，或者有任何問題，請send email到help@creatrip.com查詢。
「Tokyo Sirloin（狎鷗亭店）」預約流程
| STEP 1. | 撳我預約 |
| STEP 2. | 請填寫所有相關資訊，我哋會喺1-2個工作天內確認預約。 |
| STEP 3. | 當日請準時到達，向職員出示預約記錄。 |
| STEP 4. | Enjoy！ |
「Tokyo Sirloin（狎鷗亭店）」介紹
「Tokyo Sirloin」係一間韓牛專賣店，用肉質鮮嫩嘅熟成韓牛炮製韓牛SUKIYAKI、SHABU-SHABU、燒韓牛等等嘅頂級餐點！今日小編就帶大家嚟到狎鷗亭店，未入去都已經可以見到門口裝修得好Fancy！
餐廳內部闊落同有好多張枱，而且枱同枱之間都唔會太近！老闆話窗邊位好受歡迎，天氣好嘅話仲會有陽光曬入嚟，夠曬光猛。
廚房附近就係用大理石裝飾，仲有個擺滿紅酒白酒嘅架，俾人一種高級嘅感覺。
另外一邊就有好多間獨立房，大家可以同家人、朋友或者另一半享受私人時光，特別日子或者係紀念日嚟應該會好唔錯！
呢個係淨間用嚟燒肉嘅迷你烤盤。
小編當日係晚餐時間去，有4款course可以揀，最後小編同朋友就揀咗Dinner Set C，一齊睇吓有咩食啦！
小編另外仲有叫多咗杯伯爵茶Highball同水蜜桃Highball，兩杯味道都夠濃！
首先第一道菜係「一口海鮮前菜」，一上菜職員就會倒少少水喺中間啲乾冰度，營造煙霧彌漫嘅效果！大家要按住比目魚、三文魚、鮑魚呢個順序去食，咁先可以試真所有味道。
跟住就係小編覺得最好食嘅「薄切生韓牛」，有兩塊薄切生韓牛同生菜，雖然係生牛肉不過完全唔會腥！而生菜上面亦都有凱撒沙律醬，夠新鮮又健康。
下一道菜係「忌廉炸蝦」，不過彈牙蝦肉加香濃芝士同忌廉，配埋酥脆外皮同可以解膩嘅WASABI沙律醬，聽講係「Tokyo Sirloin」其中一款最受歡迎嘅菜式！
「生吞拿魚tartare」其實就係切碎嘅生吞拿魚撈埋各種蔬菜同醬汁，連埋上面塊紫菜脆片一齊食口感同味道都會更加好！
呢款「章魚&番茄」入面其實仲有薯仔粒，酸酸甜甜嘅番茄加上彈牙嘅章魚，無論係視覺定味覺都可以滿足到你！
主菜終於登場，睇落超吸引！上菜嘅時候牛肉會係大約三成熟，職員一開頭會幫大家燒一塊肉同芝士，香濃芝士味同韓牛比想像中match~
之後大家就可以根據自己鍾意嘅生熟程度慢慢燒，雖然100g睇落好似唔多，但係因為成個course有唔少menu，所以普通女仔一定會夠飽！
另外仲有各種小菜同泡菜，烤盤中間仲有薯仔粒，大家可以自由mix&match咁食！
「Tokyo Sirloin」其中一款最出名嘅Menu係韓牛SUKIYAKI，小編叫嘅Dinner Set C都有得食！
本身套餐入面有包每人一碗白飯，不過小編同朋友就每人加咗₩10,000轉做鯛魚釜飯，呢個飯都係「Tokyo Sirloin」招牌Menu之一！職員會幫大家將魚同飯撈勻，咁就可以每一啖都食到魚肉！
而韓牛海帶湯都好濃郁，仲有好多韓牛肉，同釜飯好夾！
最後甜品係綠茶紅豆雪糕三明治，仲有水果同五味子茶，為呢餐畫上一個完美句號！
「Tokyo Sirloin」喺首爾其他地方都有分店，有唔少韓國明星都會專程去食飯。如果大家都想食高級韓牛料理，推薦大家嚟「Tokyo Sirloin」！不過要記住如果想坐房或者窗邊位，一定要事先預約啊！
「Tokyo Sirloin（狎鷗亭店）」前往方法
喺狎鷗亭羅德奧站（압구정로데오역） 5號出口出。
直行。
見到KB國民銀行之後轉右。
轉入SHAKE SHACK同CGV中間條路。
行入上圖呢棟大廈。
搭𨋢上3樓就到「Tokyo Sirloin」狎鷗亭店啦！
以上係狎鷗亭「Tokyo Sirloin」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
