Hello，大家好，我哋係由韓國人每日提供最新韓國旅行資訊嘅Creatrip。
嚟到韓國當然會想試吓當地美食，而小編相信唔少朋友都會好奇到底韓國宮廷美食會係點！今日小編就打算帶大家去一間用現代方式傳承韓國傳統宮廷美食嘅餐廳「同花古屋」，跟住小編一齊去睇吓啦！
「同花古屋（江南N店）」資訊
- 地址：서울 강남구 테헤란로 129 강남N타워 B2F
- 營業時間：11:30 - 22:00（Break Time 15:00 - 17:00、Last Order 21:00）
- 可預約時間：11:30 / 12:00 / 12:30 / 13:00 / 17:00 / 17:30 / 18:00 / 18:30 / 19:00 / 19:30 / 20:00
- 語言：韓文、簡單英文
「同花古屋（江南N店）」推薦原因
- 以現代方式詮釋韓國宮廷飲食，傳承韓國傳統飲食文化！
- 可以按照個人喜好揀鍾意嘅套餐！
- 位於江南站附近，交通方便，食完飯仲可以喺江南附近行街！
- 每組客人一間房，可以體驗韓國美食之餘更加可以享受私人時光！
「同花古屋（江南N店）」價錢
| 選項 | 價錢 | 包括 | |
| Lunch | Course A | ₩66,500/人 | 葫蘆南瓜粥、木石草花（4款一口料理）、宮廷刺身、彦陽式韓牛烤肉、當造湯品、同花骨董麵/古屋冷麵（擇一）、飯後茶點 |
| Course B | ₩76,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、彦陽式韓牛烤肉、當造湯品、同花骨董麵/古屋冷麵（擇一）、飯後茶點 | |
| Course C | ₩106,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、饗宴調味排骨、當造湯品、同花骨董麵/古屋冷麵（擇一）、飯後茶點 | |
| Dinner | Course A | ₩106,500/人 | 葫蘆南瓜粥、木石草花（4款一口料理）、宮廷刺身、蝦煎餅&牛肉煎餅、饗宴調味排骨、當造湯品、同花骨董麵/古屋冷麵（擇一）、玉雪花、飯後茶點 |
| Course B | ₩136,500/人 | 葫蘆南瓜粥、木石草花（4款一口料理）、宮廷刺身、蝦煎餅&牛肉煎餅、陶甕海鮮嫩豆腐、饗宴調味排骨、當造湯品、同花骨董麵/古屋冷麵（擇一）、玉雪花、飯後茶點 | |
| Course C | ₩146,500/人 | 葫蘆南瓜粥、木石草花（4款一口料理）、宮廷刺身、蝦煎餅&牛肉煎餅、酒蒸鮑魚、陶甕海鮮嫩豆腐、饗宴調味排骨、當造湯品、同花骨董麵/古屋冷麵（擇一）、玉雪花、飯後茶點 |
※全部Menu最少要叫2人份。
※食飯時間最少需要2小時。
「同花古屋（江南N店）」退款政策
| 預約後至到訪4日前取消 | 全額退款 |
| 到訪3日前取消 | 不設退款 |
「同花古屋（江南N店）」注意事項
- 請最少喺3日前完成預約。
- 請務必準時到達。
- 遲到超過10分鐘預約會自動取消。
- 如希望加購其他餐點，請喺現場支付所需金額。
- Last Order時間係用餐時段結束前1小時。
- 預約時請確保已選擇正確日期及時間。
- 如果想更改預約，或者有任何問題，請send email到help@creatrip.com查詢。
「同花古屋（江南N店）」預約流程
| STEP 1. | 撳我預約 |
| STEP 2. | 請填寫所有相關資訊，我哋會喺1-2個工作天內確認預約。 |
| STEP 3. | 體驗當日請準時到達，向職員出示預約記錄。 |
| STEP 4. | Enjoy！ |
「同花古屋（江南N店）」介紹
「同花古屋」係一間韓國傳統宮廷料理專門店，今日小編帶大家嚟到位於江南站同驛三站之間嘅江南N店！
江南N店係「同花古屋」總店，全部枱都喺獨立1間房入面，無論係要開會定同家人朋友聚會都非常唔錯！
餐廳整體裝修非常簡約，以木同米白色為主調，俾人一種高級韓國餐廳嘅感覺。另外餐廳都好sweet咁有準備衣架俾客人掛衫，每張枱仲有無線充電器添啊！
葫蘆南瓜粥
小編同朋友叫咗Dinner Course C，因為有事先預約，所以坐低之後唔需要另外叫嘢食就會開始上菜！首先第一道菜係「葫蘆南瓜粥」，食之前要將粥同忌廉、南瓜油撈勻，忌廉會令南瓜粥變得更順滑，味道都會更加柔和！
木石草花（4款一口料理）
之後就係4款一口前菜「木石草花」，一上菜小編都忍唔住感嘆咗一聲，因為擺盤真係好靚！小編首先食咗放喺木桶上面嘅「芝士鱈魚撻」，因為上面仲有檸檬皮，所以唔會覺得漏，反而幾清新！
跟住呢款係「黑松露排骨三文治」，上面有一層韭菜碎同食用鮮花點綴，牛肉夠嫩滑之餘黑松露同韭菜都比想像中夾！
另外兩款小菜係「蕎麥煎餅」同「魟魚（魔鬼魚）三合」，有睇過韓國節目嘅朋友們都知道，韓國嘅魟魚會經過發酵之後生食，通常都會好臭，唔係個個都接受到。不過呢度嘅魟魚完全唔會臭，而且口感好似軟糖咁煙韌，令小編好驚喜！
宮廷刺身、蝦煎餅&牛肉煎餅
「宮廷刺身」係真鯛刺身配醬油同各種配菜，刺身夠新鮮，醬汁甜甜地好開胃！
「牛肉煎餅」都唔會煎到好韌，配埋新鮮泡菜同韭菜一齊食真係一流！
而「蝦煎餅」就可以點頭先食完刺身之後淨低嘅醬油，蝦肉夠新鮮，仲好結實飽滿添！
酒蒸鮑魚
跟住係「酒蒸鮑魚」，相比起平時見到嘅普通鮑魚，呢度用嘅鮑魚真係好大隻！食之前職員會幫大家倒少少湯汁，然後就可以連埋魷魚同炸蘑菇一齊食，口感好豐富！
陶甕海鮮嫩豆腐
呢個「陶甕海鮮嫩豆腐」係其中一個令小編印象幾深刻嘅菜式，一開頭以為只係放落甕入面嘅海鮮嫩豆腐湯，點知原來係好似酥皮湯咁上面有一層用薯仔整嘅脆皮！
食嘅時候好似飲酥皮湯咁用匙羹將脆皮整爛，連埋湯一齊食就得~ 嫩豆腐湯入面有帶子、蝦、青口、豆腐等超多食材，加埋辣椒香味真係好香好正！（如果有白飯就好啦...XD）
饗宴調味排骨
跟住就係今日嘅主菜「饗宴調味排骨」，職員話呢款牛排骨肉用咗12款食材調味，令小編好期待！
燒緊排骨嘅時候會上埋幾款配菜，全部都同排骨好夾，小編個人就最鍾意青瓜同右邊嘅紫蘇葉啦！
職員會親自幫大家燒，一開始會先俾兩塊大家試，咬落去勁juicy，而且牛肉都好腍，不愧係韓牛啊！
之後職員會幫大家燒埋幾款時蔬，然後放喺碟度俾大家慢慢食。睇落好似唔太多咁，不過因為個set本身就有好多款菜式，所以呢個份量兩個人食啱啱好！
當造湯品
呢款湯每次去都未必一樣，因為餐廳會嚴選當日最新鮮嘅食材去煮，而小編去嘅時候就食到白蘿蔔牛肉湯啦！韓牛粒加上白蘿蔔同秘製調味，令成碗湯非常有層次。
除咗湯之外仲會有白飯同辣醃章魚同紫菜，全部都超送飯！
古屋冷麵
跟餐仲包一碗冷麵，有兩款選擇，小編同朋友就各叫咗一碗。首先係小編朋友叫嘅「古屋冷麵」，濟州蕎麥麵配上用牛腩熬製嘅湯底，平時如果鍾意平壤冷麵嘅話一定會好鍾意！不過因為平壤冷麵本身就唔係個個都鍾意食（味道偏淡），所以建議平時鍾意食濃味少少嘅朋友們可以揀下面嗰款！
同花骨董麵
「同花骨董麵」同樣都係用濟州蕎麥麵，加上牛肉、雞蛋、紫蘇、芝麻同麻油撈勻食，好香好清新！大家仲可以配埋青瓜同梨絲增加口感！
玉雪花、飯後茶點
最後到甜品環節！「玉雪花」其實係雪葩 + 橙，可以幫大家清一清個口；而飯後茶點就有糖漬合桃同五味子茶，非常有韓國傳統特色，為今餐畫上一個完美句號！
如果想食返餐傳統韓國菜，或者想食高質韓牛，推薦大家嚟「同花古屋」！
「同花古屋（江南N店）」前往方法
喺江南站（강남역）12號出口出。
直行。
行大約200米，過埋十字路口之後就會見到江南N Tower。
行入去搭扶手電梯落B2/F。
行到最入。
咁就去到「同花古屋」江南N店啦！
以上係江南「同花古屋（江南N店）」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
