Hello，大家好，我哋係由韓國人每日提供最新韓國旅行資訊嘅Creatrip。
成日睇韓劇見到以前啲皇帝食嘅嘢食都好好奇係咩味，小編最近搵到一間用現代方式傳承韓國傳統宮廷美食嘅餐廳「同花古屋」，跟住小編一齊去睇吓啦！
「同花古屋（宣陵店）」資訊
- 地址：서울 강남구 테헤란로 337 화남빌딩 14F
- 營業時間：11:30 - 22:00（Break Time 15:00 - 17:00、Last Order 21:00）
- 可預約時間：11:30 / 12:00 / 12:30 / 13:00 / 17:00 / 17:30 / 18:00 / 18:30 / 19:00 / 19:30 / 20:00
- 語言：韓文、簡單英文
「同花古屋（宣陵店）」推薦原因
- 以現代方式詮釋韓國宮廷飲食，傳承韓國傳統飲食文化！
- 餐廳位於建築高層，推薦大家黃昏時段去，可以睇到超靚夕陽！
- 可以按照個人喜好揀鍾意嘅套餐！
- 宣陵站一出就到，交通夠方便！
「同花古屋（宣陵店）」價錢
選項 | 價錢 | 包括 |
Lunch Course A | ₩26,500/人 | 葫蘆南瓜粥、彦陽式韓牛烤肉、同花骨董麵/同花冷麵（擇一） |
Lunch Course B | ₩56,500/人 | 葫蘆南瓜粥、木石草花（4款一口料理）、宮廷刺身、彦陽式韓牛烤肉、當造湯品、同花骨董麵/同花冷麵（擇一）、飯後茶點 |
Lunch Course C | ₩66,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、彦陽式韓牛烤肉、當造湯品、同花骨董麵/同花冷麵（擇一）、飯後茶點 |
Lunch Course D | ₩96,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、饗宴調味排骨、當造湯品、同花骨董麵/同花冷麵（擇一）、飯後茶點 |
Dinner Course A | ₩96,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、饗宴調味排骨、當造湯品、同花骨董麵/同花冷麵（擇一）、玉雪花、飯後茶點 |
Dinner Course B | ₩126,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、陶甕海鮮嫩豆腐、饗宴調味排骨、當造湯品、辣醃章魚、同花骨董麵/同花冷麵（擇一）、玉雪花、飯後茶點 |
Dinner Course C | ₩136,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、炭火烤雞、陶甕海鮮嫩豆腐、饗宴調味排骨、當造定食、同花骨董麵/同花冷麵（擇一）、玉雪花、飯後茶點 |
※部份餐點會隨季節而有所變動。
※全部Menu最少要叫2人份。
「同花古屋（宣陵店）」退款政策
| 預約後至到訪4日前取消 | 全額退款 |
| 到訪3日前取消 | 不設退款 |
「同花古屋（宣陵店）」注意事項
- 請最少喺3日前完成預約。
- 請務必準時到達。
- 遲到超過10分鐘預約會自動取消。
- 如希望加購其他餐點，請喺現場支付所需金額。
- Last Order時間係用餐時段結束前1小時。
- 預約時請確保已選擇正確日期及時間。
- 如果想更改預約，或者有任何問題，請send email到help@creatrip.com查詢。
「同花古屋（宣陵店）」預約流程
| STEP 1. | |
| STEP 2. | 請填寫所有相關資訊，我哋會喺1-2個工作天內確認預約。 |
| STEP 3. | 體驗當日請準時到達，向職員出示預約記錄。 |
| STEP 4. | Enjoy！ |
「同花古屋（宣陵店）」介紹
「同花古屋」係一間韓國傳統宮廷料理專門店，今日小編帶大家嚟到嘅宣陵店喺宣陵站6號出口一出就到，交通夠方便！
餐廳樓底好高，而且因為係落地玻璃，俾人一種環境勁闊落嘅感覺！
如果大家會嚟「同花古屋」宣陵店，小編極力推薦大家一定要坐窗口位，傍晚時間嚟仲可以睇到日落同夜景！
小編同朋友叫咗Dinner course C，另外再叫咗2杯五味子梳打，酸酸甜甜好解膩！
第一個前菜係凍嘅松子粥，用松子、黑芝麻、花生煮成，好香果仁味，入面仲有青瓜，令口感更豐富！
之後就係4款一口前菜「木石草花」，一上菜小編都忍唔住感嘆咗一聲，因為擺盤真係好靚！職員推薦大家跟住蕎麥煎餅、魟魚（魔鬼魚）三合、黑松露排骨三文治同鱈魚撻呢個順序食。
小編個人覺得最驚艷嘅係呢個「魟魚（魔鬼魚）三合」，，有睇過韓國節目嘅朋友們都知道，韓國嘅魟魚會經過發酵之後生食，通常都會好臭，唔係個個都接受到。不過呢度嘅魟魚完全唔會臭，而且口感好似軟糖咁煙韌，令小編好驚喜！
下一道菜係係「宮廷刺身」同「牛𦟌煎餅」。「宮廷刺身」係真鯛刺身配醬油同各種配菜，刺身夠新鮮，醬汁甜甜地好開胃！而「牛𦟌煎餅」亦都完全唔韌，配埋新鮮泡菜食真係一流！職員亦都會推薦大家可以將煎餅點洛頭先食完刺身之後淨低嘅醬油，會更加惹味！
呢款係得Dinner Course C先有嘅炭火烤雞，雞肉用辣辣地嘅醬汁調味，加埋蕃薯、生菜等等嘅材料，同韓式炒辣雞有異曲同工之妙。
呢個「陶甕海鮮嫩豆腐」係其中一個令小編印象幾深刻嘅菜式，一開頭以為只係放落甕入面嘅海鮮嫩豆腐湯，點知原來係好似酥皮湯咁上面有一層用薯仔整嘅脆皮！食嘅時候好似飲酥皮湯咁用匙羹將脆皮整爛，連埋湯一齊食就得~
主菜出場之前職員會先上幾樣小菜，全部都同燒肉好夾，可以增加口感之餘仲可以解膩。
呢個係當造定食，小編去嘅時候嘅是日當造湯品係明太魚海帶湯，成個定食仲會有一碗飯、紫菜、辣醃章魚、豉油同Wasabi。
呢個就係今日嘅重頭戲 —— 饗宴調味排骨同主食Menu啦！
另外呢個Course仲有兩款麵可以揀，首先呢款「同花骨董麵」嘅麵係蕎麥麵，加上紫蘇、芝麻同麻油撈勻食，好香好清新，大家仲可以配埋梨絲增加口感！
「同花冷麵」同樣都係蕎麥麵，醬汁就同平時食開嘅辣拌冷麵相似，不過唔會太濃味或者太鹹，小編都推薦！
職員話「饗宴調味排骨」用咗12款食材調味，食落去真係好惹味！大家仲可以配埋隔離嘅沙律同烤蒜、辣椒同蘑菇一齊食~ 而小編個人就鍾意加少少Wasabi食，冇咁漏之餘仲可以食到牛肉嘅原汁原味。
大家唔好唔記得呢個定食啊！呢度嘅辣醃章魚比平時食開嘅更加新鮮同大嚿，而海帶湯入面都有好多明太魚！有湯有辣醃章魚仲有紫菜，真係幾啖就食完一碗飯~
小編個人覺得調味排骨同「同花骨董麵」最夾，推薦大家咁食！
最後到甜品環節，「玉雪花」其實係雪葩 + 橙，可以幫大家清一清個口；而飯後茶點就有糖漬合桃同五味子茶，非常有韓國傳統特色，為今餐畫上一個完美句號！
如果想喺景色超靚嘅餐廳食返餐傳統韓國宮廷料理，或者想食高質韓牛，推薦大家嚟「同花古屋」！
「同花古屋（宣陵店）」前往方法
喺宣陵站（선릉역）6號出口出。
行入右邊棟大廈。
上14樓。
咁就到「同花古屋（宣陵店）」啦！
以上係江南「同花古屋（宣陵店）」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
