Hello，大家好，我哋係由韓國人每日提供最新韓國旅行資訊嘅Creatrip。
韓國真係有好多用雞去整嘅料理，例如：炸雞、人蔘雞、一隻雞等，可能大家都會食過，但韓式烤雞你又試過未呢？梨泰院附近有一間叫「漢南洞漢方烤雞」嘅餐廳，每日都超多韓國人去捧場，就連唔少韓星都係佢哋常客，令人相當期望佢味道係點！
漢南洞「漢南洞漢方烤雞」介紹
漢南洞漢方烤雞（한남동한방통닭）
- 地址：서울 용산구 대사관로34길 38
- 營業時間：星期一至四 16:00 - 00:30、星期五、六 16:00 - 01:30（逢星期日休息）
由漢南站1號出口行大約7分鐘就會去到「漢南洞漢方烤雞」，離遠已經可以聞到炭烤焦香味！平時晏晝4點就會開門，只係開咗15分鐘就已經冇哂位，門口甚至仲有好多人等拎外賣。
門口會見到個烤爐，入面啲雞排到好整齊，望住佢哋表皮烤到金黃色，真係令人流哂口水！
喺上檯之前，老闆會將烤雞剪開，方便客人食。
入到去鋪頭，大家可以見到牆上貼滿超多藝人嘅簽名，就連韓星都咁捧場，令人更加期待佢幾咁好味！
漢方烤雞（한방통닭）₩20,000
呢度嘅烤雞同平時食到嘅好唔一樣，雞入面放滿糯米、大米、蒜頭、紅棗、白果等食材，之後再用黃芪、甘草、月桂葉、白芍同肉桂等藥材去熬煮，之後再用木炭去烤，真係相當考功夫！
雞皮烤到好脆，紅棗味滲入雞肉，令雞肉有種甜味，不過可惜會有少少乾。配埋佢哋獨家嘅泡菜、醃蘿蔔一齊食就會好爽口，或者點鹽、芥末、辣醬食，可以令味道更加豐富！如果大家怕食唔哂仲可以打包拎返屋企繼續食。
食完雞肉之後就可以食到中間嘅糯米飯，因為加咗藥材，食落有種甘甜味，好養生，會冇咁有罪惡感XD。
大家嚟韓國食炸雞已經食到厭咗？不如之後就去「漢南洞漢方烤雞」試吓啦！話不定你都會愛上呢個傳統味道，甚至有機會遇到明星藝人添！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
