Hello，大家好，我哋係由韓國人每日提供最新韓國旅行資訊嘅Creatrip。
相信大家都有幾對鞋自己特別鍾意，不過比起平時街上可以買到嘅款式，自己親手整嘅嘅波鞋更加獨一無二同特別！韓國最近好興去整客製波鞋，好似NIKE、Converse、VANS呢幾個牌子都有提供呢種服務！今日小編就去咗位於狎鷗亭嘅NIKE客製店「NIKE BY YOU」，同朋友一齊整咗對屬於自己嘅波鞋！跟住小編一齊去睇吓啦！
記住打開廣東話字幕啊！
狎鷗亭「NIKE BY YOU（나이키바이유）」介紹
- 地址：서울 강남구 선릉로 831
- 價錢：NIKE Air Force波鞋 ₩139,000（無其他附加費用）
- 注意事項：需要網上填表申請抽籤
「NIKE BY YOU」係由NIKE提供嘅客製化服務，除咗狎鷗亭，明洞、江南同弘大NIKE都有！大家可以喺度整屬於自己嘅波鞋、T-shirt或者帽，而且仲有好多選擇，不過大部份都需要預約。特別係今日要介紹嘅狎鷗亭NIKE客製波鞋體驗，大家需要喺指定時間內喺網上填表申請，仲要抽中先去到（可以帶一位朋友去），都幾麻煩吓... 建議有KakaoTalk既朋友們可以先add狎鷗亭NIKE官方帳號，每逢禮拜三就可以確認到最新資訊啦！
而普通衫同帽嘅客製化體驗就唔係一定要預約，大家可以去現場walk-in排隊等，不過就有可能會因為冇貨而整唔到。小編亦都有睇韓國人喺網上分享，如果想直接去整，建議一開鋪就去問吓當日有冇邊個時段有位。
小編申請完之後，好好彩咁抽中咗！所以就同朋友喺平日13:00去到NIKE狎鷗亭分店，出示中獎信息同身份證之後，職員就帶小編同朋友去到體驗嘅地方，真係有好多選項可以揀，亦都見到有其他人整嘅客製化波鞋！
整波鞋隔離就係整T-shirt同帽嘅地方，小編都有偷偷望咗幾眼XD 揀好自己想要嘅圖案同想放嘅位之後，職員就會幫你加熱印上去，咁就可以得到一件獨一無二嘅NIKE衫/帽啦！
而波鞋方面，體驗時間都幾長吓，大約需要2個半鐘（不過呢個時間因人而異，小編同朋友整咗3個幾鐘XD）。程序大約會係：
1. 買鞋 + 決定設計（20分鐘）
2. 睇教學影片#1（5分鐘）
3. 貼膠紙（60分鐘）
4. 睇教學影片#2（5分鐘）
5. 噴油（30分鐘）
6. 最後收尾程序（30分鐘）
今次整嘅會係NIKE經典鞋款Air Force，要整之前當然要買返對鞋啦（記住要試啱鞋碼啊）！
正式開始整之前，大家可以參考之前其他人嘅成品，決定好自己想整嘅design。
然後就要開始癡膠紙，根據大家揀嘅設計，用膠紙貼住唔需要上色嘅地方。
呢個步驟睇落好似好簡單，不過非常需要耐性，亦都比想像中用咗更加多時間。好彩用嘅係紙質膠紙，所以相對上貼同搣嘅時候都唔會太難。不過鞋身彎位、曲線位都要慢慢貼，先可以跟住個形狀貼得實。
貼完之後，就要用去膜劑整走波鞋本身嘅塗層，咁就準備好可以噴油上色啦！
為保障安全，噴油程序會由工作人員代為進行，佢哋會根據大家一開始揀嘅設計同顔色噴油，全程大約需要30分鐘，企喺隔離睇都覺得好神奇！而且即使揀咗同一隻色，唔同人整出嚟嘅效果都唔同，所以真係名副其實係獨一無二㗎！
等到油漆全部都乾曬之後，就可以搣走頭先貼嘅膠紙，揭曉最終真面目！
搣膠紙嘅時候手感好正，而且見到白色嘅底色逐漸露出嚟，真係好期待最後結果會係點！
如果有啲位嘅顔色噴咗出界，可以即刻用洗甲水整走。
呢個就係小編同朋友嘅DIY客製Air Force嘅最終成品啦，係唔係好靚呢？小編係第一次整呢種客製波鞋，成個過程好新鮮，而且除咗本身買波鞋嗰₩139,000，完全唔需要另外加錢就可以整到一對屬於自己嘅波鞋，真係好滿意！如果大家下次嚟韓國有機會，不妨可以試吓報名抽籤，整返對獨一無二嘅Air Force啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
