Hello，大家好，我哋係由韓國人每日提供最新韓國旅行資訊嘅Creatrip。
以前大家計韓幣匯率都會話1000等於港幣7蚊，但係而家已經跌到6蚊（甚至有時候得5蚊），梗係要趁而家嚟旅行+掃貨啦！唔少朋友們都會book東大門附近嘅酒店，需要換錢嘅時候又唔想走到明洞咁遠，到底東大門邊度有找換店，匯率又係點？
而家港幣可以兌到幾多韓幣？
東大門有咩好玩？
建唔建議喺東大門唱錢？
應該唔少朋友都會覺得，首爾找換店匯率應該都差唔多，就近搵間唱錢應該都得。但係小編可以拍心口同大家保證，其實喺首爾入面，明洞找換店匯率珍惜最好，所以如果大家係要大筆大筆咁唱錢，建議都係去明洞！不過如果只係急住需要現金，或者只會換少少嘅話，喺東大門唱錢都ok。
東大門邊度有找換店？
東大門附近其實有好多間找換店，不過大部分營業時間都唔定時，而且可能上網search嘅時候話開緊門，點知去到現場會發現冇開。所以除咗下面有列明營業時間嘅鋪頭，如果大家想去其他找換店，可能真係要睇大家好唔好彩啦..！
Money Box東大門店（머니박스 동대문점）
- 地址：서울 중구 장충단로 281
- 營業時間：
- 星期一至六 10:00-22:40
- 星期日 10:00-21:00
- 優惠：下載優惠券，享有港幣、台幣、美金、歐元、日幣、泰銖、越南盾換匯優惠
Money Box係一間韓國連鎖找換店，比起一般私家找換店更加有保證同安全！而且因為地理位置夠方便，相信唔少朋友都有喺度唱過錢！記住去之前要download定下面張優惠券，小編自己都有用過，真係會抵過就咁換！
東大門MANGO換錢所（APM망고환전소）
- 地址：서울 중구 장충단로 253 1동 164호
- 營業時間：
- 星期一至五 11:00-24:00
- 星期六及日 11:00-23:10
- 優惠：下載優惠券，享有港幣、台幣、人民幣、美金、歐元、日幣、泰銖、越南盾、菲律賓披索換匯優惠
位於東大門歷史文化公園站同東大門站附近，掃貨前換錢夠曬方便！而且開到夜晚11點幾，就算夜晚去到都可以換錢！記住下載埋Creatrip優惠券，換領手續費優惠，慳返一筆！
東大門OK換錢所（OK환전소）
- 地址：서울 중구 장충단로13길 5
- 營業時間：10:30-02:30
OK換錢所位於APM購物中心隔離條巷仔入面，雖然門口得台幣、新加坡幣、歐元同澳幣匯率，但係如果想唱其他貨幣都可以去現場問匯率（不過比起明洞都真係差咁啲...）
88換錢（88환전）
- 地址：서울 중구 을지로44길 15-1
88換錢所外觀唔太起眼，不過大家可以認住隔離個豬仔Logo！88換錢所優點係可以換嘅貨幣種類多，大家如果會喺東大門換錢，想貨比三家嘅時候都可以用呢度嘅匯率做個參考。
STAR換錢（스타 환전）
- 地址：서울 중구 을지로 252
STAR換錢所係一間相對上比較近期開嘅找換店，不過出面個匯率表得美金、日幣、人民幣同港幣匯率可以睇，而且比起上面介紹嗰幾間匯率更加差，同明洞比就更加唔值得嚟...XD
國際換錢（국제환전）
- 地址：서울 중구 을지로44길 13 2F
- 備註：平日下晝去冇開
Point換錢（포인트환전）
- 地址：서울 중구 을지로42길 11
City Exchange（씨티머니익스체인지）
- 地址：서울 중구 을지로 250
- 備註：平日下晝去冇開
Good Morning City換錢所
- 地址：서울 중구 장충단로 247
- 備註：平日下晝去冇開
東大門換錢注意事項
網上東大門找換店嘅資訊冇明洞找換店咁多，如果大家唔係急住用現金嘅話，建議都係去明洞唱錢比較有保證。
另外提提大家，換錢最緊要記住帶護照或者外國人登錄證（係因為韓國政府避免出現洗錢問題，所以明文規定需要記錄換錢人個人資料）。如果職員同你講話唔需要出示護照，咁呢度九成九係非法嘅找換店，大家記住要小心！
以上係小編幫大家整理嘅韓國東大門找換店詳細資訊，同明洞相比呢度匯率的確比較差。而有關東大門找換店安全問題、當日匯率好唔好等等，小編個人認為都係要大家自行評估同衡量！
東大門站附近有咩必食/必玩？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
