韓國唔同地區人口特徵

Hello，大家好，我哋係由韓國人每日提供最新韓國旅行資訊嘅Creatrip。

大家都知韓國有分好多地區，每個地區都有唔同特色，而家就等小編為大家逐一介紹有咩特別啦！

韓國唔同地區人口特徵

韓國行政區

mappr

以韓國行政區劃圖嚟睇，京畿道環繞住首爾、江原道喺右上，而忠清北道同忠清南道合稱忠清道，忠清道左下方分為全羅北道同全羅南道，合併為全羅道。慶尚道係位於忠清道同全羅道右邊，分為慶尚北道同慶尚南道。最後橙色部分係「濟州道」。

1. 首爾

• 日忙夜晚冇時停

무한도전

好多人對首爾人嘅印象係「成日都好忙而且望落好攰」，做緊嘢嘅時候唔可以少咗杯咖啡，不過只要一收工或者係放假，佢哋又好生猛，會成日去鍛煉身體、去學新嘢或者同朋友見面、飲酒等，冇一種會停嘅感覺。

• 獨立又帶有距離感

무한도전

小編個人認為，同首爾人傾偈嘅時候有時會覺得隔咗一埲牆，因為始終係標準首爾話，聽落會冇咁熱情，講嘢都好似要特別小心，加上首爾人多偏向自己搞掂所有嘢，望落雖然好似好有型，但有時都會希望可以幫到少少手。

2. 京畿道

• 獨特距離感

韓國有一句說話係「如果你係京畿道居民，有20%嘅時間都係喺地鐵度過。」，相當之搞笑。因為有時要上首爾，至少都需要一個鐘或以上，另外比較麻煩嘅係，當大家夜晚玩得最開心嘅時候，因為末班車通常係22:30左右，就要急急腳咁返屋企。

• 都住京畿道但會約喺首爾見

由於京畿道範圍好大，每去一個城市都會有一段距離，為咗方便起見，大家都會約喺中心點「首爾」見面。就好似上圖有一個住平澤、一個住日山同一個住議政府，最後會約咗喺弘大見面。

3. 江原道

• 薯仔同粟米

因為韓國大部分農作物都係嚟自江原道，所以好多人見到江原道嘅朋友，都會講笑問佢哋屋企有冇種薯仔同粟米，但因為事實上好多人屋企的確有薯仔同粟米田，咁樣反而令到佢哋更加嬲。

• 心心薯仔

前排韓國網站有一篇名為「江原道男人如何告白」文章成為熱門話題，故事講述江原道青年如果想對心儀對象表白，會用心形薯仔表白。當然呢個只係一個傳言，並唔係所有江原道嘅人都會咁做。

4. 忠清道

• 慢條斯理

루리웹

忠清道人講嘢好慢，所以以前有一個故事係講《爸爸，石頭滾下去了（아부지 돌 굴러가유）》，當中提到即使石頭碌到父親面前，個仔只係大叫「石頭跌落去啦！」，結果因為講得太慢，爸爸最後被石頭壓死。小編有一個朋友忠清道嘅朋友，第一次見面嘅時候，都忍唔住講咗句「你可唔可以講快少少？  」。

• 至少要問三次

tvN 서울촌놈

喺韓綜《首爾鄉巴佬》，嚟自忠清道嘅李凡秀同韓孝珠講，如果向忠清道嘅人問「你要唔要呢個？」、「 你想唔想食？」佢哋多數都唔會即刻答「要或者想」。因為聽講如果問忠清道人問題，至少要問三次，如果一個問題唔問多幾次，佢哋會認為你唔係真心問，會好嬲或者敷衍咁答。

• 萬用單字「咩話（뭐여）」

來源：인사이트

忠清道人有一個神奇方言叫做「뭐여（咩話）」，代表住嬲緊、驚訝、驚、尷尬、傷心、感動等任何情緒都可以用。

5. 全羅道

• 好識煮飯

한국관광공사

全羅道食物相當地道，甚至有句諺語係話「喺全羅道唔需要點樣特別搵餐廳」，因為隨便去一間已經好好味，曾經仲有綜藝以「點解全羅道啲嘢咁好食？」為題進行討論，結論係全羅道憑著平原、山區等地理優勢，發展獨特食材同飲食文化。

• 方言特色

뉴스엔

全羅方言句尾通常加「야（ya）、당께（dangkee）、야제（yaje）、잉（ing）」等語助詞，就好似中文嘅「呀、唷、啊」，聽落都會比較舒服。例如閔都凞喺《請回答1994》講嘅道係全羅道方言。

6. 慶尚道

• 爭執開始：你係邊個？

영화 바람

聽講慶尚道嘅人問對方「你係邊個？」之後就會開始鬧交，但有時唔係真係鬧，只係一種問候，但因為慶尚道方言口吻，令人聽落就好似係撩交嗌咁。如果有興趣想睇吓慶尚道方言鬧交、爭執場面，小編建議可以睇電影《風願》。

• 得意得嚟又好強勢嘅方言

응답하라 1997

慶尚南道同北道方言都有少少差異，例如慶尚北道講得好可愛，聽落好似有啲撒嬌、而慶尚南道有啲僵硬同木訥；當《請回答1997》人氣飆升時，全國人民都愛上慶尚方言魅力，好多人都會模仿。

6. 濟州島

• 經過一兩座橋就會知道一切

국민일보

韓國因為地小，有「經過一兩座橋就知道一切」嘅講法，就算唔識某人，但只要透唔其他A、B朋友都可以識到對方，喺濟州更加可以深刻感受到呢句說話。雖然透過朋友嘅朋友，自然可以識到，但另一方面，如果留底一個唔好印象，好容易說會傳出去，所以必須要小心。

• 用一個鐘去到嘅地方就係遠

한라일보

由濟州市去西歸浦市距離大約係一個鐘，所以租車嘅遊客可以用三至四日內遊覽濟州市同西歸浦市，但對濟州島居民嚟講，20分鐘車程以上就會覺得有啲唔方便，更加難以想像點解首爾人返工要用半個鐘以上。

• 盛產橘

매경헬스

濟州島被稱為「橘國」，有啲人仲會將橘作為配菜同酒一齊食，佢哋會將橘整成泡菜。去到冬天，濟州島係最盛產，好多人會買嚟送禮。

唔知大家身邊嘅韓國朋友有冇嚟自唔同地區，大家有冇發現呢幾點特徵呢？歡迎留言話俾我哋知。

如果有更多想知嘅內容，都可以隨時留言或者dm話俾我哋知：）

Instagram：creatrip.hk

 Facebook：Creatrip 帶你認識韓國每一面

 韓國代購

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！