Hello，大家好，我哋係由韓國人每日提供最新韓國旅行資訊嘅Creatrip。
疫情下生意難做，好多舖頭都捱唔住要關門大吉，但同時亦有唔少舖頭逆境下反而賺到盤滿缽滿，到底係邊啲舖頭咁犀利？原因又係咩呢？
疫情下生意反而變好嘅品牌
Opensurvey根據2020年2月-2021年1月積累嘅信用卡付款記錄，列出同期支付次數增幅最大嘅10個品牌。
第10位 COMPOSE COFFEE
COMPOSE COFFEE係中低價嘅coffee shop，號稱身體流住嘅唔係血，而係咖啡嘅韓國人，疫情之下就好難叫佢哋放棄飲咖啡。之不過比起中高價嘅Starxxxxx，喺冇得堂食，只可外賣嘅情況下，中低價嘅咖啡就更加吸引。
第9位 Natural Dream （자연드림 iCoop 생협）
Natural Dream係一間以會員價買到健康、綠色食品嘅公司，疫情下大家比以前更注重健康，留喺屋企多咗自然買食材頻密咗，所以Natural Dream嘅銷售量就有所增加。
第8位 Netflix
疫情嚴重時，連街都冇得出，日日留喺屋企最大嘅娛樂就係煲劇、睇電影。加上Netflix有自家製作嘅劇同電影，好似《屍戰朝鮮》、《Sweet Home》等，相信唔只韓國，香港都好多人因為疫情而多咗人訂閱Netflix。
第7位 Market Kurly
Market Kurly係近幾年新興嘅網上購物平台，全智賢、朴敘俊都做過代言，走中價路線，送貨速度亦好快，適合一啲講求食物質素、生活格調嘅顧客。
第6位 三星數碼廣場
同Netflix一樣，因為留多咗係屋企，睇片、打機等等嘅數碼、家電產品需求上升，而三星係韓國第一大品牌，信譽同品質都有保證，銷售額自然有所增加。
第5位 MEGA COFFEE
同第10位嘅COMPOSE COFFEE 一樣係中低價嘅coffee shop，最大嘅賣點係價錢平，又大杯。疫情下限制堂食，呢類型嘅cafe自然多人幫襯。
第4位 Naver Shopping
Naver shopping賣嘅嘢多樣化，符合唔同年齡層嘅需求，而且好方便，可以直接用Naver Pay（電子付款）俾錢，又可以儲積分，男女老少都鍾意用。
第3位 AUCTION/Gmarket
Gmarket就大家都識，AUCTION都係同Gmarket差唔多嘅online shopping嘅平台。疫情下大家都偏向上網買嘢，多過行出街去實體店度買，所以成功喺逆市中反生存。
第2位 coupang
coupang係韓國最大型嘅網購品牌之一，貨品包羅萬有，新鮮蔬果、化妝品、生活用品，諗到咩基本上都喺coupang搵得到。而且送貨速度快，通常一至兩日就收到。另外仲有得揀特快送貨服務，夜晚落單，凌晨7點前件貨就去到屋企門口，啱晒疫情時期唔方便出門買餸或日用品。
第1位 배달의 민족
배달의 민족就好似Food Panda，Deliveroo等等嘅送外賣上門嘅app。疫情下又有限聚令，又唔方便出街食飯，叫外賣嘅人當然多咗好多。而且배달의 민족唔只送餐咁簡單，仲可以買生活用品、餸菜等，然後好似送餐咁一個小時內就送到上門，比一般嘅網上shopping需要一至兩日更快速，自然啱晒性格急嘅韓國人需求。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
