Hello，大家好，我哋係由韓國人每日提供最新韓國旅行資訊嘅Creatrip。
私生飯（사생팬）一直以嚟都唔被視為係fans，因為佢哋會做出啲令人意想不到嘅行為去侵入藝人私生活，喺尋日（21號），Apink成員恩地就忍唔住出post警告私生飯。
Apink成員恩地被私生飯跟蹤
恩地表示：「最近經常會有啲人嚟度我屋企門口，我真係好唔鍾意同時唔想俾到身邊嘅人有麻煩...如果只係將自己感受放喺首位嘅人，我諗我都冇辦法尊重，我哋健健康康相愛落去啦 」
另外亦講到：「콩이（恩地養嘅狗狗）嘅相除咗我up或者Live時影到之外，我見到強行挖出嚟再隨意咁放出嚟嘅話，我真係有啲嬲，希望睇到呢段文字嘅人可以心自肚明同識點處理好 」
已經肯定嚟緊恩地會出演《술꾼 도시 여자들》，預計今年下半年上映，大家都可以期待吓。
翻外：NCT 私生飯
喺早幾日前，亦有報導寫到關於「NCT私生飯」嘅事，有人影到相寫住날이 좋아서 그런지 집앞에 팬들이 많이 나왔네 （唔知係咪因為天氣好，門口前面有好多fans。）圖上可以見到大約有10多位女性喺NCT宿舍門口等緊。
唔少網民睇完相都表示：「啲人係咪有病，全部應該要拉去刑事處罰。」、「朋友都喺住喺嗰邊，原來呢啲人係私生飯。」、「到底點解佢哋要咁做？」、「真係好好奇平時私生飯係點生活？冇自己嘅生活㗎咩？唔使返學同返工咩？」等留言。
對於呢一件事，SM都好快發表咗立場。
喺16號SM娛樂公司表示：「我哋想對於嚴重侵犯隱私同誹謗我哋藝人嘅行為表達我哋立場。我哋而家透過fans嘅配合同埋內部監控，對喺網站、SNS同論壇等寫上關於藝人嘅惡意謠言、誹謗或侮辱藝人嘅行為進行刑事起訴，同時會強烈應對。」
同時講到：「由於私生飯嘅魯莽同跟踪行為，唔單只係對藝人，就連佢哋屋企人、朋友、鄰居等都會帶嚟嚴重精神同物質傷害。呢種侵犯他人隱私明顯嘅犯罪行為。」根據最近制定嘅《跟蹤犯罪處罰相關法律》，將可以受到刑事處罰。
鍾意自己偶像想去追並唔係一件壞事，但如果係超越同侵犯咗藝人嘅私生活就真係太過火，藝人都會想有自己個人空間，唔應該每一分每一秒都追到咁貼，唔知大家對於私生飯一事又點睇呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
