Hello，大家好，我哋係由韓國人每日話你知最新韓國旅行資訊嘅Creatrip。
唔知大家最近有冇睇緊韓國熱播緊嘅《機智醫生生活》第二季呢？呢套劇主要係以醫院急症室為背景，講述醫生、護士同患者之間，為生命進行拼死奮鬥嘅溫馨故事。每一集都有開心同落淚位，不過大家又知唔知喺韓國探病，原來係有規定？今日就等小編為大家講解吓啦！
提提大家：目前因為疫情影響，韓國醫院係禁止探病，所以以下內文指嘅係一般情況下。
韓國醫院探病文化
韓國人點探病？
來源：tvN
大家有冇諗過其實「探病」有可能造成其他人嘅困擾呢？喺韓國，如果成班人一齊去探病，係被認為韓國醫院文化中最嚴重嘅問題。其中原因係可能會增加感染風險、擾亂環境同其他患者，甚至因為患者、家屬、訪客都係喺同一間病房，可能會發生爭執，嚴重嘅可能仲會發生盜竊案。
來源：tvN
由2017年起，韓國大型醫院喺每一間病房都安裝咗感應門，同時只向患者同一位監護人發放門禁卡，以減少入病房嘅人數。即使去探病，亦會限制訪問時間，另外12歲以下、呼吸系統疾病、免疫功能較弱嘅人，以及團體訪客都有所限制；鮮花、花盆同外賣等禁止送。
小編記得之前喺韓國探病嘅時候，因為出入口管理得好嚴格，小編喺醫院都蕩失路，喺就到醫院之前，仲需要先打電話預約（甚至唔可以入病房），要喺病房以外嘅地方探病。
咁樣嘅改變確實降低咗院內感染風險，同時亦提升住院品質，仔細諗一諗，如果有啲醫院出入口冇做好控制，咁就真係好危險。
唔適合送嘅禮物
1. 鮮花
聽講唔好送鮮花原因係紅色嘅鮮花好似血、菊花有死亡嘅意思，而且數字四、九、十三都唔好，所以喺送鮮花嘅時候，一定要避免以上數字；不過事實上，鮮花對於花粉症、過敏或者呼吸道患者係唔好，再加上難處理，所以韓國甚至有啲醫院係「禁止」送鮮花。
2. 外賣
來源：tvN
如果瞓喺病床，相信大家都會好掛住出面嘅食物，但喺韓國醫院，好多時都唔太俾帶入去，唔知係咪因為醫院怕出面煮嘅食物唔乾淨，再加上油膩嘅味道喺病房一直聞到都唔好，怕感染到患者之如，仲會影響到其他患者，所以基本上除咗粥或者自己煮嘅食物之外，其他食物都唔太建議。
適合送咩禮物呢？
1. 水果
韓國人一般會送蘋果、梨、橙等，或者喺網上訂水果籃，款式多啲收到嘅人都開心啲！
2. 果汁或維他命營養飲品
呢種一箱一箱維他命，大家應該都會見過，健康天然嘅果汁、或者增強體力嘅維他命、營養飲品、保健食品，都係韓國探病適合帶去嘅禮物之一。一來夠方便二來又對身體好。
3. 現金
喺韓國，如果關係比較好（屋企人、好朋友）嘅多數會直接俾現金，當係補貼。
4. 其他
為咗可以喺住院期間過得舒服啲，有啲患者會叫屋企人或朋友帶加濕器、保暖物品、護膚品等，因為醫院多數嘅冷氣比較凍同乾，又或者想打發吓時間都會請朋友帶書、漫畫等。
唔知大家睇完以上介紹，對於韓國探病文化又有冇了解多咗呢？歡迎大家留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
