Hello，大家好，我哋係由韓國人每日提供最新韓國旅行資訊嘅Creatrip。
每個國家過節嘅時候，都有食一啲特別嘅食物，今日就等小編同大家介紹吓韓國有邊幾日會食一啲特別嘅食物啦！
韓國唔同節日食嘅食物
農曆一月初一：年糕湯
韓國同香港一樣，會慶祝農曆新年，韓文叫「설날」。咁點解佢哋係喺新年食年糕湯呢？有好幾種講法嘅！其中一個係，農曆一月一號係新一年嘅開始，希望身體同心靈都乾乾淨淨，所以食白雪雪嘅年糕。
第二個講法係本身年糕係好長嘅，食長長嘅年糕，寓意長壽。
第三個講法係長長嘅年糕切開一塊塊嘅時候，好似銅錢，所以有增加財富嘅意思。
三月三號：五花肉
三嘅韓文係「삼」（讀音：sam)，三月三號有兩個「三」，發音同五花肉「삼겹살」（讀音：samgyeobsal）好相似，所以三月三號叫做「五花肉日」，韓國人會喺呢日燒五花肉食㗎！連超市都會做特價。
四月十四號：炸醬麵
大家都知2月14係情人節，3月14係白色情人節，而韓國每個月嘅14號都係特別嘅日子（對情侶嚟講），例如5月14號係玫瑰日，6月14號係親吻日等等，而其中4月14號就係專俾單身朋友慶祝嘅「黑色情人節」，因為係黑色，所以佢哋會食炸醬麵。
三伏：蔘雞湯
한국민족문화대백과
經過古代嘅人長時期觀察自然氣候，佢哋認為一年裏面最熱嘅係「三伏」，三伏包括初伏、中伏同末伏。初伏係夏至後第三個庚日（古代記載時間嘅用語），去到第四個庚日前一日（即中伏前一日），中伏係夏至後第四個庚日起到立秋後第一個庚日前，而末伏係立秋第一個庚日起到第二個庚日前一日。韓國有「以熱治熱」嘅概念，所以初、中、末伏嘅第一日都會食蔘雞湯。隨住社會嘅現代化，仍然有食蔘雞湯嘅習慣，同時亦有人會食炸雞嚟代替（同樣係雞！）
農曆八月十五：松餅
한국민족문화대백과
香港農曆八月十五就係中秋節，對韓國人嚟講都係一個大節，佢哋叫呢日做「秋夕」（추석 )。以前韓國係農業嘅國家，農曆八月十五係係感謝呢一年耕作豐收嘅日子，同時作為結束一年耕作，紀念第二年豐農嘅日子，就同外國thanksgiving day嘅概念一樣。呢一日佢哋一定會食松餅（송편），松餅係用米搓成月亮形狀嘅糕點。仲有話搓到靚嘅松餅，就會生個靚靚嘅BB女添！
以上就係韓國視為大節，或者特別嘅日子，同埋佢哋嗰日會食嘅嘢，大家覺得有唔有趣呢？就嚟中秋啦！小編都好掛住香港嘅月餅，歡迎大家用月餅相塞飽小編個肚！Come on！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
