Hello，大家好，我哋係由韓國人每日提供最新韓國旅行資訊嘅Creatrip。
小編之前都整理過一次燒肉餐廳嘅清單，唔知大家有冇收藏到呢？ 今日小編再介紹多一間俾大家，GOT7 Mark同有謙拍V LIVE時成日去嘅地方，叫DONJUDA，係I GOT7嘅你之後都要跟住去打卡啊！
清潭「DONJUDA」介紹
DONJUDA(돈주다)
地址：서울 강남구 영동대로138길 9
營業時間：平日16:00 - 23:00、週末14:00 - 23:00
小Tips：清潭站 (청담역)14號出口直行，經過農協銀行 (농협은행)同加油站，見到斑馬線之後轉右，左手邊就會見到間餐廳啦！
嚟韓國一定唔可以錯過燒肉！小編同大家一齊去位於清潭嘅高級燒肉餐廳DONJUDA啦！ GOT7 Mark同有謙都嚟過呢度㗎！
舖頭主要用紅、黑兩隻色設計，好容易就搵得到。
餐廳入面好闊落，又通風，有好多個大窗一直開住，所以唔會有好大陣燒肉嘅味，坐得都好舒服。
menu只有一頁，價錢比其他餐廳貴少少，因為呢間提供嘅係優質肉類。 一人份嘅肉15000won（約HKD105），小章魚一人份14000won（約HKD98）。GOT7 有謙同 Mark喺呢度食五花肉，所以小編就跟住叫咗五花肉啦～
落完單之後，伴菜就好快上枱！
食燒肉嘅時候，必定唔少得嘅伴菜，有生菜、大蔥、涼拌菜（명이나물）、泡菜等。
餐廳嘅泡菜係完全發酵，但唔會太酸，好好食，大豆芽調味調到啱啱好，配肉食真係好好味。
呢度仲提供包飯醬、鹽同麻油3種調味料，呢度嘅麻油好特別，裏面加咗鹽有蒜， 小編都係第一次用呢個醬嚟食燒肉。
呢度嘅職員會幫手燒，所以啲肉燒到啱啱好，唔會燒燶，超好食。
大家係咪睇到個肚打晒鼓呢？ 將啲肉再點調味料真係冇得頂！
為咗唔好令到啲肉燒燶或者燒過龍，可以單獨放喺個小托盤裏面。 之後職員會燒啲泡菜同大豆芽， 燒過嘅泡菜同大豆芽連埋五花肉一齊食會更加好味，大家都可以試吓咁樣燒嚟食！
等小編包返個嚟食先，豬肉，醃過嘅洋蔥，少少泡菜，再點少少醬！ 嘩！真係太好食啦！
除咗包生菜之外，大家仲可以試吓用涼拌菜嚟包！涼拌菜帶有少少甜同鹹味，同燒肉超夾！
食燒肉一定要叫返個冷面！ 今次小編點咗辣拌冷面（비빔냉면）。 麵嘅硬度適中，個醬都好好味，好涼爽，同燒肉一齊食真係prefect match！
大家想唔想知GOT7 Mark 同有謙之前嚟係坐邊呢？
大概係上面圖中嘅位置！因為餐廳有改到少少枱嘅位置，所以唔係百分百確定到佢哋之前坐嘅位啦～
DONJUDA係韓國好出名嘅餐廳，有好多名人嚟食飯之後都留低簽名，大家嚟到可以睇到牆上面貼滿咗簽名。
如果大家有機會嚟韓國，一定要嚟來呢間DONJUDA燒肉店！ 呢度嘅五花肉真係好正，包大家食過返尋味！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
