Hello，大家好，我哋係由韓國人每日提供最新韓國旅行資訊嘅Creatrip。
唔知大家嚟韓國旅行嗰陣有冇發現過，韓國街上面有好多白鴿，喺香港通常就係見到麻雀多，不過韓國就好似95%都係白鴿咁。好多韓妹見到佢哋都會跑走，甚至係尖叫。點解韓國會有咁多白鴿呢？今日就同小編一齊睇下韓國白鴿嘅秘密啦！
매일뉴스
喺韓國，佢哋會叫白鴿做「雞鴿 닭둘기 」，係結合咗「雞 닭」同「白鴿 비둘기 」，因為佢哋覺得啲白鴿嘅身型同行為都好似雞咁，所以就幫佢起咗呢個稱呼。據專家推測，單單淨係首爾市內嘅白鴿就多達10萬隻，加上京畿道範圍更加係超過100萬隻。
연합뉴스
原來喺1988年漢城（首爾）奧運會入面，韓國就喺海外大量引進咗2400隻家鴿，再喺奧運會現場放飛佢哋，代表和平嘅象徵，點知就係因為呢2400隻白鴿，令到佢哋就喺韓國落地生根。
加上白鴿喺公寓陽台欄杆或者喺冷氣機上面築巢嘅情況都好多，由於普通人係好難去清理，所以韓國最近專門清除白鴿巢嘅公司都越嚟越受歡迎。 驅除白鴿公司會拆除佢哋嘅巢穴、清掃排泄物之後，爲咗唔令白鴿重新築巢，仲會設置鐵網或者係鳥盾（喺塑膠板上面插鐵針，防止鳥類坐落嘅裝置），收取20萬至40萬韓元不等嘅報酬。
自2017年開始提供驅除白鴿服務以嚟，諮詢次數都持續增加。 相關人士表示：「服務申請件數比之前增加咗接近240%」。
조선일보
喺2009年，白鴿仲被韓國政府指定為有害野生動物，理由係佢會引發惡臭、不快感，排泄物仲會對建築物造成腐蝕等損害，經地方自治團體允許就可以進行撲殺。韓國目前提倡唔好餵食白鴿、儘快清理廚餘，去斷絕佢嘅食物來源，令佢哋自然減少繁殖數量。
大家睇完有冇都嚇咗一跳？由當年嘅2400隻變到而家超過100萬隻...希望韓國政府可以盡快正視呢個問題。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
