12首音源逆行嘅歌曲
近乎奇蹟一樣嘅音源逆行！除咗而家嘅Brave Girls之外仲有邊個?
Hello，大家好，我哋係由韓國人每日提供最新韓國旅行資訊嘅Creatrip。
Rollin' Rollin' Rollin' Rollin'~ 清爽又強而有力嘅歌喉加上就好似置身喺熱帶海灘一樣嘅旋律，相信有留意開KPOP嘅朋友都一定唔會對而家人氣好高嘅Brave Girls嘅Rollin'感到陌生。Brave Girls作為韓國知名製作人「勇敢兄弟」親自培育嘅第一個女團，出道嘅時候就受到唔少嘅關注，只可惜呢種關注持續嘅時間好短，佢哋一直打拼到出道十年嘅今日先成為到「逆行(역주행)」 嘅幸運兒，令呢首喺好多韓國軍人同KPOP老粉絲心目中嘅神曲成功得到大眾pick，亦都令Brave Girls得到前所未有嘅關注。
呢種推出一段時間，本身位於音源榜低名次嘅歌，因為一啲原因再次受到大眾嘅關注而慢慢爬上音源榜上位圈嘅情況，喺韓國有個term稱之為「逆行(역주행)」 ，但呢種情況罕見嘅程度算得上係奇蹟，得好少歌手先會有幸遇到。
今日小編就嚟介紹12個可以稱得上係韓國「音源逆行」嘅代表，一齊嚟睇下你有聽過邊一首啦。
Kpop歌曲音源逆行
1. EXID〈Up & Down〉
講起音源逆行，相信好多人都會記得EXID嘅 《Up & Down》啦。呢首歌發表當年，本身就已經結束咗宣傳活動，但就係因為成員Hani嘅個人直拍引起咗大量嘅關注，令呢首歌除咗逆行返去各大音源榜嘅頭幾位，更加被「強制召回（강제소환）」返去音樂節目表演，而佢哋亦都靠呢首歌攞到第一個一位，成為大勢嘅二代女團之一。
2. 臉紅的思春期〈給你宇宙/Galaxy〉
每次發表新歌都會橫掃各大音源榜一位嘅臉紅的思春期，原來佢哋由一出道就以《給你宇宙》一曲成功逆行！由百名不入到慢慢擊敗其他擁有大量粉絲嘅人氣偶像，打入各大音源榜一位，對於新人嚟講算得上係一張完美嘅成績表，令臉紅的思春期日後無論推出咩歌都得到信聽（믿듣）嘅好評價。
3. TWICE〈Like OOH-AHH〉
由出道開始就逆行嘅仲有TWICE嘅《Like OOH-AHH》。以選秀節目出道嘅佢哋一開始好可惜地冇得到太多關注，但隨著不斷嘅宣傳，令呢首歌嘅音源一直上升。雖然未能夠得到一位，但都成功擠身大勢女團嘅一員，喺之後每次嘅Come Back都得到好好嘅成績。
4. BLOO〈Downtown Baby〉
BLOO嘅《Downtown Baby》 就係多得李孝利喺節目上面唱過繼而令呢首歌順利得到各大音源榜嘅頭幾位，成功令更多人認識到〈Downtown Baby〉 。
5. Brave Girls〈Rollin'〉
而家逆行當中嘅《Rollin'》! 2011年出道嘅Brave Girls，雖然咁多年都好可惜咁未能夠獲得好好嘅成績，但佢哋咁多年都係韓國軍中大型活動之一嘅 「慰問列車」嘅常客，而2017年推出嘅《Rollin' 》喺韓國軍隊入面受歡迎嘅程度更係壓倒性嘅一位，聽聞佢哋仲會一屆一屆咁樣以口傳方式向新人後輩推廣呢首歌添! 只可惜一直未能受到太多嘅關注，直到出道10年嘅今日，多得YouTube上一個專門集合搞笑留言嘅channel upload咗一條佢哋喺「慰問列車」表演嘅片，入面成員同軍人幸福嘅表情，開心嘅氣氛，加上本身首歌就好高質，成功令佢哋逆行成功，登上各大音源榜一位，被強制召回之後，更加喺人氣歌謠拎咗出道以嚟第一個一位，正式成為大勢女團！
6. NU'EST〈Hello〉
以《Face》出道嘅NU'EST，只係得到短暫嘅關注後，成績一直都普普通通。喺2017年以前輩身份參加練習生選秀節目第二季嘅NU'EST，雖然參加節目嘅成員入面得旼炫一個成功出道，但NU'EST整體都成功得到大眾嘅喜愛，亦成功令《Hello》同之前其他歌逆行，令佢哋晉身大勢男團一員。
7. N.Flying〈Rooftop〉
N.Flying嘅《Rooftop》憑著輕快好聽嘅旋律，得到唔錯嘅口碑，繼而慢慢逆行起嚟， 最後更打敗好多音源勁敵，成功橫掃多個音源榜一位之餘，被強制召回後更攞到佢哋喺音樂節目嘅第一個一位， 令更多人認識到身為樂團嘅N.Flying。
8. VIXX〈桃源境〉
VIXX嘅〈桃源境〉就係喺MBC歌謠大祭典上面嘅精彩表演而再次受到關注。佢哋充滿東方風情嘅舞台喺當日就引起咗大量嘅討論，再連帶呢首歌都逆行返去音源榜， 更加被強制召回去表演添。
9. PENTAGON〈Shine〉
Pentagon嘅《Shine》係靠中毒性強嘅旋律，獲得唔少粉絲同藝人嘅支持，由一推出成績平平，到後期成功逆行到Melon前一百位。
10. GFRIEND 〈Me Gustas Tu〉
GFRIEND喺戶外舞台表演《Me Gustas Tu》嘅時候，多次因為落雨而跌倒，但仍然堅持繼續起身表演，得到好多網民嘅支持同讚賞，同時令《Me Gustas Tu》 一曲嘅音源逆行起嚟。
11. Rain〈Gang〉
2017年Rain推出《GANG》 當年，一直被好多網民笑佢好老士，話佢啲舞步好搞笑，歌詞太自戀等等，成績唔理想之餘，仲有網民話要<一日一GANG>，姐係每日睇一次佢嘅MV，就係為咗去留言區笑佢。 只不過隨著越嚟越多人<一日一GANG>，反而有好多人俾首歌洗腦返轉頭，MV點擊數爆升之餘，更成功令音源逆行。
12. MOMOLAND〈BBoom BBoom〉
MOMOLAND嘅《BBoom BBoom》 推出初期，成績未如理想，但洗腦嘅旋律同歌詞令越嚟越多人注意到佢哋，音源逆行嘅同時更令佢哋拎到第一個一位。
以上就係一啲成功音源逆行嘅代表例子，唔知大家又鐘意邊一首歌呢？如果大家有想推薦嘅其他歌都可以留言話俾我哋聽！
如果有更多想知嘅內容，都可以隨時留言或者dm話俾我哋知：）
Instagram：creatrip.hk