韓國邪教重大事件盤點
韓國邪教居然係由日殖時代起就有...集體自殺？屠殺信徒？韓國邪教事件盤點！
Hello，大家好，我哋係由韓國人話你知每日最新資訊嘅Creatrip。
宗教原本應該係要傳遞信仰，同俾人一種正面嘅形象，但韓國仲係有好多隱藏，甚至傷害信徒嘅宗教團體存在，可以話係害群之馬。今日小編就整理咗四件當年震驚全韓國，利用宗教去做壞事嘅「邪教」事件俾大家認識。
達米宣教會
令十萬人碾驚嘅升天活動...
當年喺仁川，有位孕婦向醫生表明自己想做流產手術，醫生就問點解？孕婦就話「10月28號嗰日唔可以生BB」，而落胎嘅理由就係因為達米宣教會（다미선교회）。
會長李長林（이장림）因為翻譯《世界末日論》呢本書而深受影響，更加喺1987年出版《準備迎接將近的未來》預言書之後，開始主張「世界末日論」。雖然而家聽落就覺得好荒唐，但喺當時（1990年代)《準備迎接將近的未來》係列喺暢銷排行榜入面，亦因為咁令好多人對達米宣教會深信不疑。成立4年入面，韓國嘅達米宣教會就有92個分支，喺海外多國都達到40個分部，信徒多達10萬名。
到底係點樣令一班平凡人成為信徙呢？ 《準備迎接將近的未來》嘅末日論係咁講：「喺1999年地球將會迎接末日，末日前7年嘅1992年10月28號凌晨12點嘅時候，耶穌就會降臨，而且會揀『攜舉（휴거）』嘅人。『攜舉』係指耶穌再降臨，選中嘅信徒將會升天，而冇被揀到嘅人就總共有10億人會即刻蒸發，世界將會迎嚟大劫難」。
書入面仲提到，由耶穌降臨開始到1999年嘅末日為止，無辦法升天嘅人會受到極大痛苦、只可以迎接死亡。
大家一定好好奇，點解啲咁不可思議嘅預言都有咁多人信？喺教會集會嘅時候，李長林係好仔細咁敘述耶誕降臨同升天過程，講得超有說服力，令人不自覺咁信曬佢講嘅嘢。最誇張嘅係，呢啲內容居然全部都係李長林隨口講，並唔係真實嘅內容。
SBS
當時達米宣教會更加令信徒變賣家產、放棄工作、離開家庭、將所有資產貢獻俾教會。如果信徒入面有家長唔俾學生去教會嘅話，佢哋就會說服學生偷偷咁離家出走，同其他信徒聚集喺臨時搭建嘅塑膠屋入面，不分晝夜咁唱聖歌。當時仲因為父母唔俾仔女去教會，有位中學生仲吞藥自殺，而好多仔女離家出走嘅父母，更加聯合組成咗受害父母團體，向達米宣教會抗爭。
令佢哋又驚又期待嘅1992年10月28號，當日到底發生咗啲咩事呢？韓國警方當日就喺聚集咗3,000幾人嘅達米宣教會教堂外加強戒備，防止信眾集體自殺。
12點一到當時咩事都冇發生過，喺出面等待嘅屋企人因為「攜舉」結束，開始瘋狂咁搵佢哋嘅仔女。
來源：SBS
達米宣教會嘅大型騷動就咁結束咗，會長李長林都被地方檢察院以詐騙、違反外匯兌換管理法等罪名起訴。
五大洋
32名信徒集體自殺...
呢件震驚全韓國嘅事件發生喺1987年8月29號，一共有32人喺京畿道龍仁市嘅五大洋工廠入面集體自殺。當中包括咗五大洋創辦人朴順子同佢嘅屋企人、員工，屍體都係喺工廠餐廳嘅天花板入面發現。
SBS
五大洋創辦人朴順子曾經喺一場大病中莫名痊癒之後，佢相信自己係因為信教而得到「救贖」，所以就一邊加新嘅教徒一邊創立新宗教「五大洋」。「請一定要令嗰啲不幸嘅人繼續生活落去……」一邊喊一邊接受採訪嘅朴順子，係當時被譽為成功嘅韓國女性企業家。同時，佢都靠著大家對自己嘅信任，開始向身邊嘅人總共借咗80億去搞好公司。
其中一名債主為咗討回5億而去工廠，點知就俾五大洋嘅13位職員集體施暴，再被迫簽放棄借款聲明書先可以釋放。事後債主向警方報案，而警方拘留咗施暴職員同朴順子進行調查之後就釋放咗佢哋。經過警方調查之後發現，借錢俾朴順子之後攞唔返錢嘅債主居然有成幾百人，警方決定通緝突然消失嘅朴順子。
不過當時朴順子巳經同80幾名信徒消失得無影無蹤，而警方喺工廠入面發現淨係得返一名喺餐廳工作嘅姓張婦人，所以佢哋就向佢詢問，但得到嘅答覆只係「完全冇見到，發生咗咩事啊？」。過咗幾日之後，正當想要放棄嘅時候，警方收到姓張婦人嘅電話。
「其實你哋要搵嘅人一直都喺工廠入面，但佢哋嘅樣有啲奇怪……」警察去到工廠之後，喺天花板入面發現咗32條屍體。
喺搜查入面，警方仲喺天花板夾層入面發現幾張紙條。上面寫住「只要你收聲就好」、「只要你好好保密就夠」、「4個小時前開始已經走咗5個人」等令人毛骨悚然嘅文字。咁字條入面「你」係指邊個呢？就係喺餐廳入面幫手「睇水」嘅姓張婦人。喺警方嘅追問之下，姓張婦人將事實全部講出：「朴順子其實係教主，而自己（姓張婦人）就係最後一位睇水同保密嘅教徒。」
五大洋公司係為咗五大洋教而建立嘅公司，因為後生嘅時候大病痊癒，用呢件事説服信徒，透過洗腦希望得到信徒嘅信任同錢， 當中佢仲私吞過孤兒院同療養院。呢件事件並冇搵到集體自殺嘅真相，網上都充斥住好多猜測同爭議。大家有興趣都可以睇韓劇《救救我》，劇情同五大洋集體自殺事件非常類似。
白白教
殺害咗464名信徒嘅宗教...
韓國宗教最早同最險惡嘅事件就發生喺1920至1930年之間嘅「白白教（백백교）」，呢個宗教名稱由來就係因為教主全身同頭部都以白色布料包住。
1930年代因為白道教毀滅而新生嘅宗教「白白教」，當時嘅時代背景係日本殖民，相當容易陷入異端同宗教情感投射嘅時期。
電影《白白教》
白白教教主會將黃金預先放喺礦山，向信徒表示係靠宗教嘅力量而搵到黃金，所以有好多人認為信白白教就可以擁有富有人生。喺當時普遍不安嘅社會氛圍入面，人為咗入教咩事都願意做：例如男人需要貢獻所有財產，女人就要同教主發生性關係……當時信徒之間發生衝突，為咗唔觸動警方介入，白白教決定殺害信徒，透過「殺人」希望可以管理好佢哋。
韓劇《救救我》
而令白白教毀滅嘅原因，係因為有位男子跑入警察局表示要告發父親罪行。父親係白白教信徒，甚至要將自己個女奉獻俾教主，先令成件事曝光。
透過警方埋伏之後，發現白白教嘅祕密總部有上百名女子嘅屍體，而教主嘅屍身都喺山入面被發現。同白白教相關嘅遺體多達三百多人，其他失蹤人員都多達兩百幾人。
雅歌樂園
裸體同神一齊跳舞嘅地方...
70年代時期，曾經係「株賢教會」嘅金基順就係後嚟創立雅歌樂園嘅教主。不過株賢教會當時都發生咗唔少爭議事件，例如暴力毆打、信眾除衫擁抱同裸體跳舞，成為社會議論嘅對象。
一切因為金基順毆打一位牧師，被判刑2年6個月之後暫時畫上咗句號，1981年株賢教會就因為咁而解散。不過呢個都係一個新開始，金基順之後喺京畿道買入咗四千坪嘅土地，建立咗雅歌農場（小孩農場），同時喺入面改名為「雅歌樂園」嘅宗教。喺株賢教會解散嘅同時，「雅歌樂園」收留咗無地方可以去嘅信徒，更加擴大咗規模。
備註：아가翻譯為雅歌或孩子
喺雅歌樂園（孩子樂園）入面，金基順將聖經中嘅耶穌改為「孩子」，將自己塑造成只係得三歲嘅孩子神，仲建立咗專屬法律，講住自己因為只係一個小朋友，所以做咩都冇錯，同強逼信徒要信自己。
MBC相關報導
影片係1996年MBC前往「雅歌樂園」拍攝信徒嘅怪異行為。影片入面金基順享受住男性信徒嘅追捧，成條影片真係非常詭異，不過撇除光鮮亮麗嘅影片，實際上嘅雅歌樂園係一個壓榨信徒勞動嘅農場，過勞死、暴力毆打等問題都層出不窮。
最後，因為三名遭到殺害嘅信徒而令到雅歌樂園嘅真相曝光，同時拒捕咗四名高層人員：1987年7歲姓崔小朋友因為唔相信金基順而受到毆打同挨餓一星期，再被活活生咁打死；21歲嘅姓江信徒就因為同金基順個仔拍拖而受到殺害；果園嘅負責人就因為唔聽從金基順而慘遭殺害。
1996年12月，大約30名自稱係雅歌樂園受害者嘅信徒，向檢方提出申訴，同時揭露雅歌樂園嘅犯罪事蹟。
不過最後，金基順只被以賄賂公款、逃稅被補，判決4年有期徒刑同5罰款56億，同（教唆）殺害信徒嘅罪根本不成正比。更令人震驚嘅係金基順其實就係大家都知嘅Synnara record （신나라레코드）會長，真係令人不可置信。
以上呢啲不為人知嘅韓國邪教事蹟盤點，有啲真係睇到都覺得驚。宗教應該係要勸人為善、提供俾人正向又積極嘅心靈寄託，卻淪為獨裁、賄賂公款又害人嘅工具……大家如果想知其他題材，都歡迎留言同我哋講㗎。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
