Hello，大家好，我哋係由韓國人每日提供最新旅遊資訊嘅Creatrip。
以前想去旅行只要一有假期好多時話飛就飛，不過因為疫情影響，相信大家已經有一年幾冇飛過。其實韓國人同香港人一樣，好鍾意周圍走去解壓。今日小編就想同大家一齊回顧下喺有疫情之前，韓國人最鍾意去嘅旅遊景點。
韓國人最常去嘅旅遊景點
第10位 - 札幌市（日本）
札幌市係北海道最大都市，唔單止係韓國人，就連好多香港人都好鍾意去嘅景點之一。喺疫情之前，韓國飛去日本好多廉航機票都好平，任何季節都吸引咗唔少人，最多人去嘅係夏天嘅啤酒節（果然喺韓國人）、冬天嘅札幌雪祭。好多韓國人去開札幌市仲會去埋附近嘅富良野美瑛、函館市等豐富成個旅程。
第9位 - 河內（越南）
除咗峴港之外，海內市都有唔少韓國人會去，因為喺嗰度停留少於15日可以免簽證。由韓國飛去大約5個鐘時間左右，疫情前每日有10幾班機可以去到，可以話係超方便。加上河內係越南嘅首都，名勝古跡遍布，好多地方都值得去了解同觀光。
第8位 - 宿霧市（菲律賓）
好多韓國人都會話宿霧市係一個超好嘅旅遊勝地，因為當地韓國企業特別多， 好多時都可以用韓文溝通。當然最令韓國人覺得正嘅係當地啲水好清，去玩水一日都覺得好舒服。
第7位 - 香港
香港人鍾意韓流，韓國人對香港嘅愛亦都唔可以睇少，喺80、90年代香港對於佢哋嚟講係一個好輝煌嘅城市。當時嘅香港電影、明星一直都係受到眾人敬仰。直到今時今日韓國人都好鍾意嚟香港旅行，特別係佢哋好鍾意飲茶嘅文化。加上香港仲有「購物天堂」之稱，冇稅對於韓國人嚟講係一件好抵嘅事，所以每次嚟香港都會瘋狂購物。
第6位 - 台北（台灣）
台灣物價相對夠平，係唔少人都鍾意去嘅旅遊景點。特別係好多大學生畢業旅行想去嘅地方首選，加上交通發達，要去邊都好方便。同時而家唔少韓國人都識少少中文，喺溝通上佢哋都覺得冇難度。
第5位 - 峴港（越南）
喺呢幾年多咗唔少人會揀去越南旅行，好多人都覺得當地物價平，唔少韓國家庭都鍾意揀5月飛一轉去休息。
第4位 - 福岡市（日本）
日本咁多城市之中，福岡同韓國係最近，由仁川機場去只需要25分鐘，所以唔少韓國情侶或家庭想短暫出國，都會揀去呢到。 加上福岡鄰近佐賀、長崎、熊本等地方，唔少韓國人都會玩埋先走。
第3位 - 曼谷（泰國）
曼谷喺食、玩、住宿都相對夠平，喺疫情之前每日都有10幾班廉航可以去到。同時想避寒，曼谷絕對係韓國人最佳首選！
第2位 - 東京（日本）
日本同韓國一樣多Cafe、美食店、景點等，每一次去都會令人有新驚喜。同時東京係世界上最多米芝蓮餐廳，想食好嘢一定要喺東京搵。講到購物，大家仲可以去埋銀座、新宿、原宿等地，每日都可以買幾袋返酒店開箱。
第1位 - 大阪（日本）
韓國人會稱大阪做「日本廚房」，因為呢到有好多美食，想食貴少少可以去東京，想食平少少但又好味嘅一定係大阪！只要去得大阪，韓國人仲會揀去埋遠少少嘅京都、奈良、神戶等地方，如果去唔曬下次都一定會再去，每次去都會令人大開眼界！
因為疫情唔少人可能都已經有年幾冇去過旅行，唔知韓國人鍾意去嘅景點同大家又一唔一樣呢？如果疫情完咗，大家又會最想去邊呢？歡迎大家可以留言話俾小編聽：）
如果有更多想知嘅內容，都可以隨時留言或者dm話俾我哋知：）
Instagram：creatrip.hk
