韓國人變靚嘅法則
韓國人點解皮膚可以咁無暇？究竟佢哋點護膚？睇睇韓國人變靚嘅法則啦！
Hello，大家好，我哋係由韓國人每日提供最新韓國旅行資訊嘅Creatrip。
係人都知韓國人就係最貪靚！唔少韓國人為咗靚都會用好多心機。唔知大家知唔知道韓國人係用咩方法先可以keep到啲皮膚咁靚呢？等小編話俾大家聽佢哋係有咩秘訣啦！
韓國人護膚秘訣
1. 針清痘痘管理
平時出去成日都要化妝，好多時有可能俾化妝品塞住曬啲毛孔，唔少人都會因為咁樣生咗好多喔痘痘粉刺。好多韓國人其實都有呢個問題，不過佢哋就會定期一兩個月去做一次針清，即使痛都會忍住務求可以清走曬啲污垢物！咁忍得痛真係抵佢哋皮膚咁好啊！
2. 睇天氣去管理
韓國人好特別，佢哋唔會用死同一set化妝品或者護膚品，佢哋會因應天氣而轉換。例如夏天比較熱嘅時候會主打控油；而冬天比較乾就會用多啲滋潤同埋保濕嘅！正正係因為佢哋咁有研究，所以皮膚就可以咁好啦！
3. 去死皮
其實想去死皮等皮膚光滑啲真係好簡單，洗面嘅時候可以用一啲有磨砂成分嘅洗面膏，就可以更加有效去走面部嘅死皮污垢啦！鼻好多時候都係最多污垢嘅地方，當每次磨砂完之後記得要局部濕敷返等毛孔收縮返啊！
4. 掌握化妝巧妙
唔少人搽唇膏嘅時候都可能會揀一啲霧面嘅，不過唔少韓國人就覺得霧面嘅唇膏好容易顯唇紋。佢哋都建議大家用返啲滋潤度比較高嘅唇膏！如果大家真係鍾意霧面嘅唇膏，用之前都不妨先搽潤唇膏打一打個底，咁就唔怕嘴唇會乾啦！
5. 選擇適合自己膚質嘅面膜
面膜唔可以亂敷㗎！最好揀返啲比較天然成分嘅就確保一定唔會敏感。韓國人最推薦大家用蘆薈或者綠茶，鎮靜得嚟又保濕，簡直係護膚必備！不過要注意面膜都唔可以日日敷㗎，一星期最少都要有一兩日俾皮膚完全休息㗎！
6. 整理眉毛
韓國人對眉毛都好有學問！佢哋覺得唔化妝唔緊要，但一定要修眉，正所謂觀人於眉啊嘛！韓國人認為畫眉都好講技術，唔使畫得太過刻意，簡簡單單輕輕順返自己眉形掃就可以啦！
如果大家都想擁有潔白無瑕嘅肌膚，不妨都可以跟住以上呢六個方法試吓啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk