首爾站美食總整理
首爾車站唔係只得樂天超市！附近多間隱藏美食等住你去試！
Hello，大家好，我哋係由韓國人每日提供最新韓國旅行資訊嘅Creatrip。
首爾站係韓國大眾運輸中樞，除咗有機場鐵路直達仁川、金浦機場之外，地鐵1號線、4號線兩條線都通，甚至仲可以搭KTX或巴士去韓國各大城市，可以話係牽動韓國經濟、交通命脈嘅心臟。
不過去到首爾站唔單止係搭車、去樂天超市Shopping，其實附近都有好附美食等住大家試。
首爾車站美食總整理
1. 湖水家（호수집）
湖水家喺1986年開張，係一間專賣辣炒雞湯同烤雞肉串等嘅餐廳，喺首爾車站一帶，非常之出名，門口可以見到老闆以古早方式烤雞肉串，一串只係₩2,000，好平！
燉雞湯（닭도리탕）（大）₩31,000
燉雞湯肉夠鮮嫩、湯味濃郁，最後建議大家再加多個炒飯（₩2,000），食完會超滿足！
湖水家（호수집）
- 地址：서울 중구 청파로 443
- 營業時間：11:30 - 22:20（Break Time 14:00 - 17:00）
2. 厚肉（두툼）
「厚肉」同樣都係喺首爾車站附近，店名顧名思義就係提供又厚又多汁嘅五花肉，只係諗吓都令人流口水。
厚肉五花肉（두툼삼겹살）170g ₩16,000
落完單之後都要等一陣，雖然價錢唔算好平，但真係超好味！小編特別推薦大家要嚟食佢哋嘅五花肉同豬頸肉！
厚肉（두툼）
- 地址：서울 중구 중림로 10
- 營業時間：15:30 - 22:00
3. 國民會館（국민회관）
同啱啱介紹嘅厚肉唔同嘅係，呢度主要賣比較薄切嘅五花肉，特點係肉質鮮嫩，餐廳氣氛令人好似返番去以前年代咁，有啲似係《請回答》嘅feel，之前韓綜《Running Man》都有嚟過取景添！
冷凍五花肉（냉동삼겹살）180g ₩14,000
冷凍薄切五花肉燒嘅時候唔會太油，食落唔會好膩，再同烤春菜（봄나물）、撒少少胡椒粉一齊食，好味程度真係好難形容！
國民會館（국민회관）
- 地址：서울 만리동1가 34
- 營業時間：平日16:00 - 22:30、週末12:00 - 22:00
4. 柚子拉麵 本店（유즈라멘 본점）
如果嚟韓國食唔懶韓國嘢，可以試吓呢間日式拉麵店，因為佢太出名，好多時去到都要排隊先可以入到去。
柚子鹽拉麵（유즈시오소금라멘）₩11,000
佢哋嘅招牌菜就係「柚子鹽味拉麵」，湯底比小編喺日本食到淡少少，而叉燒味又再濃啲啲，雖然味道有啲唔太似，但大家可以試到韓式日本拉麵，一樣都係好好味。
柚子拉麵 本店（유즈라멘 본점）
- 地址：서울 중구 만리재로 217
- 營業時間：11:00 - 21:00（平日 Break Time 15:00 -17:00、Last Order 20:30）
5. 首爾鐵路辣炒年糕（서울역 철도 떡볶이）
「首爾鐵路辣炒年糕」外觀係鮮紅色，好顯眼，一入到去會見到好多復古海報同裝飾，鋪頭唔大，只係得三張檯，所以小編建議大家避開顛峰時間嚟，如果唔係就要排隊。
辣炒年糕₩8,500、迷你紫菜包飯₩800、汽水₩1,500
價錢相當合理，而且辣炒年糕辣度適中，偏甜、好味，怕辣嘅朋友都可以試吓，再叫多個迷你紫菜包飯一齊食，更加有飽肚感！
首爾鐵路辣炒年糕（서울역 철도 떡볶이）
- 地址：서울 용산구 서계동 223-42
- 營業時間：平日 11:30 - 22:00、週末 12:00 - 21:30
6. ojeje（오제제）
ojeje係近期超高人氣炸豬排店，由濟州兩兄弟所開，特點係用濟州島豬肉製成，鋪頭外觀、內部裝修都以黑色調為主，俾人一種神秘嘅感覺。
炸豬排里肌肉（안심 돈가츠 ）₩14,000
冷烏冬（냉우동）₩9,000
炸豬好酥脆，而加咗抹茶粉嘅冷烏冬雖然好有咬口，但食落就偏淡咗啲啲，有少少可惜，不過大家有興趣都可以試吓。
ojeje（오제제）
- 地址：서울 용산구 한강대로 363-2
- 營業時間：11:00 - 21:00（Break Time 15:00 - 17:30）、星期日休息
7. 屢時（누시）
屢時係一間出名食Brunch，有一樓同地下室，以木質風格為主，俾人一種好溫馨嘅感覺。小編推薦大家可以坐一樓，有陽光曬入嚟，望住出面嘅景好舒服。
牛角包鬆餅烤布丁（크로플브륄레）₩8,500、
泡菜牛油果（김치보카도）₩16,000
呢度最出名嘅係牛角包鬆餅烤布丁，上面放咗香蕉、灑上肉桂粉，配上焦糖超好味；而泡菜牛油果喺其他地方好少見到，不過兩者以外地夾。
屢時（누시）
- 地址：서울 용산구 후암동 445
- 營業時間：平日11:00 - 20:00、星期六10:00 - 19:00、星期日休息
8. 兔子停 KTX首爾歷史店（토끼정 KTX서울역사점）
首爾站去樂天超市方向就會見到呢間兔子停，佢喺韓國人氣超高，喺江南、弘大都有分店，如果喺附近行完，肚餓都可以去食返餐。
忌廉咖哩烏冬（크림카레우동）₩12,500
兔子停招牌菜係「忌廉咖哩烏冬」，一上到檯可能會以為係甜品，但食落肚就會發現佢有幾好味！
漢堡排飯（함박스테끼밥）15,200
漢堡牛排飯一樣都好味，有好多小菜，配上照燒醬令人忍唔住食完一啖又一啖。
兔子停 KTX首爾歷史店（토끼정 KTX서울역사점）
- 地址：서울 중구 한강대로 405
- 營業時間：11:00 - 21:00
之後去首爾站搭車，或者去完樂天百貨、超市行完去補充體力，都可以去以上餐廳試吓！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
