Hello，大家好，我哋係由韓國人每日提供最新韓國資訊嘅Creatrip。
唔知大家嚟韓國嘅時候有冇食過冷麵呢？冷麵係一種韓國特有嘅食物， 不過大家又知唔知其實佢係冬天食物呢？今日小編就會同大家講解「點解韓國咁凍，但韓國人又咁鍾意食冷麵。」有興趣嘅朋友就要繼續睇落去啦！
冷麵點解係冬天嘅食物?
冇食過韓國冷麵嘅人可能唔係太清楚呢道菜，冷麵同蕎麥麵其實差唔多。不過韓國嘅冷麵會再加梨或醃蘿蔔片，有啲地方仲會加白泡菜。大部分餐廳只要叫冷麵都一定會有雞蛋同梨，而冷麵湯底大家可以再加醋、白糖、芥末等等去調味。
可能大家一開始食會好唔慣，因為冷麵會落好多冰。夏天食可能會覺得幾爽，但韓國人就話冷麵其實係冬天食物，咁到底係點解呢？
根據1849年嘅東國歲時記（동국세시기）嘅記錄，冷麵係一種喺11月先會食嘅食物，原因喺因為入面啲配料。由佢嘅麵底蕎麥麵開始，關鍵成份係“蕎麥”，雖然唔太清楚韓國幾時開始種植蕎麥，但係當時佢係韓國冬季可以收成嘅少數農作物之一。
由於蕎麥唔需要特別打理，而且係任何季節都可以收成，所以蕎麥係當時主要食物嘅來源。實際上，當時好多人都覺得冷麵唔好食，但係由於食物短缺，而且冬天幾乎冇乜選擇，佢哋為咗要生存唔可以唔食。
因為蕎麥麵比一般嘅麵更淋，如果配熱湯一齊食嘅話好易會痴堆一舊。為咗保持麵嘅形狀，一定要同凍湯一齊食或者係加冰。喺以前韓國仲未有雪櫃，所以只可以喺冬天搵到冰。隨着農業技術同科技嘅發達，而家一年四季都可以食到冷麵，唔知大家嚟韓國又有冇試過，又或者鍾唔鍾意食呢？
知道冷麵嘅由來之後，有冇解開你嘅好奇心呢？冇試過冷麵嘅人推薦大家一定要試下！
如果有更多想知嘅內容，都可以隨時留言或者dm話俾我哋知：）
Mail：help@creatrip.com
