偶像要遵守嘅10條「潛規則」
韓國娛樂圈偶像要遵守嘅10條「潛規則」，你又願唔願意為咗成為偶像去遵守呢啲規則？
Hello，大家好，我哋係由韓國人每日提供最新旅行資訊嘅Creatrip。
之前韓國藝人兼Youtuber Grazy Grace分享咗10條喺韓娛圈一定要遵守嘅規則，尤其係偶像同練習生。等我哋一齊睇下係邊10條唔可以違抗嘅規條，而你又願唔願意為咗成為偶像去遵守呢啲規則？
偶像要遵守嘅10條「潛規則」
1. 唔可以有男朋友
Grace就話因為女性偶像要維持佢地清純嘅形象，所以比起男性偶像會受到公司更加嚴厲嘅管理，呢條潛規則就係防止佢地為咗拍拖而放棄做偶像。Grace話佢有朋友俾公司發現拍拖之後，直接趕出公司！
2. 唔可以同公司入面嘅異性傾計
偶像保持禮貌係好重要，不過就僅限於打招呼，絕對唔可以同異性傾計或者太親近！公司甚至會為咗避免男女偶像同一時間喺同一地點相遇而特登調整行程，防止佢哋有機會拍拖。
3. 公司可以檢查藝人嘅電話
經理人係可以隨時睇偶像同練習生嘅電話，所以佢哋要小心電話入面嘅內容，如果發現有同異性嘅對話，就算只係親戚，都要作出解釋。Grace就話其實韓國娛樂圈有「3年戀愛禁令」，只要3年內無傳出緋聞，公司就會放鬆個禁令。
4. 唔可以食零食
呢條規矩應該都算為人熟悉，韓國偶像嘅身材管理有幾嚴格大家都知，為咗要喺鏡頭前面有完美嘅體型，喺飲食上就好需要注意。韓國娛樂公司會隨時檢查偶像嘅體重，如果唔小心肥咗1、2公斤，咁好有可能要被逼減肥。
5. 經理人可以隨時打俾你
無論係幾點、喺邊、咩場合，經理人都可以隨時打電話俾你，而如果無聽到電話，就算係有任何原因，都可能會受到批評或者審查。
6. 唔俾出街
練習生如果準備要出道，係絕對唔可以出街做任何野，喺每一日嘅訓練之後，佢哋淨係可以返屋企瞓覺。當Grace仲未成為獨立藝人嘅時候，佢嘅宿舍就喺公司入面，一開始佢覺得幾好因為可以慳交通費，後嚟佢就覺得咁樣好唔方便，公司簡直參與咗佢所有生活。
7. 唔可以用社交媒體
預備出道嘅練習生同埋新人係絕對唔可以用社交媒體，當然都係會有人偷偷哋用而公司係唔知啦。有啲公司就俾藝人用社交媒體，不過多數都係由公司管理入面嘅相同內容，確保維持偶像嘅良好形象。
8. 唔可以自己整頭髮
未經過公司嘅事先允許，藝人唔可以剪頭髮、染頭髮或者決定自己嘅髮型。TWICE嘅彩瑛有一次自己去咗剪短頭髮令到JYP相當頭痛，唔知大家仲記唔記得呢？
9. 唔可以做兼職
雖然主要係取決於公司，不過大部份公司都唔允許練習生、準備出道或者新出道嘅藝人做兼職，即使係因為佢哋收入唔夠所以想賺錢幫補下日常嘅開支。
10. 一定要鞠躬同尊重前輩
無論係練習生定偶像，見到前輩嘅時候90度鞠躬打招呼係基本，有啲公司甚至會俾旗下嘅藝人上禮儀課程。Grace話有一次佢鞠躬嘅時候，對手因為冬天太凍而擺咗喺外套口袋入面，就係因為咁而俾人鬧無禮貌。
今日就同大家分享咗10條韓國練習生、藝人、偶像都要遵守嘅「潛規則」，大家有咩睇法呢？
資料來源： GRAZY GRACE
如果有更多想知嘅內容，都可以隨時留言或者dm話俾我哋知：）
Instagram：creatrip.hk